بيىل العاش رەت «نۇر وتان» پارتياسىنىڭ قولداۋىمەن «قازاقستاننىڭ ۇزدىك الەۋمەتتىك جوبالارى» اتتى بايقاۋ ءوز مارەسىنە جەتتى. بايقاۋعا ەلىمىز بويىنشا 300-دەن استام جوبا قاتىستى، دەپ حابارلايدى Qamshy.kz اقپارات اگەنتتىگى.
جەڭىمپازدار مەن جۇلدەگەرلەردى ماراپاتتاۋ راسىمىنە «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ جانە ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا مەن پارلامەنت دەپۋتاتتارى، ۇكىمەتتىك ەمەس ۇيىم (ۇەۇ) وكىلدەرى ءارى بيزنەس قاۋىمداستىق وكىلدەرى قاتىستى.
«مەيىرىمگە عانا مۇقتاجبىن...». قازاقتىڭ ءبىرتۋار اقىن قىزى فاريزا وڭعارسىنوۆانىڭ «جەتىمنىڭ مونولوگى» دەگەن ولەڭىندەگى وسى جولدار بارشامىزعا جاقسى تانىس. كەيدە بۇل سوزدەر سول ءبىر جەتىم بالانىڭ عانا ەمەس، بۇكىل ادامزاتتىڭ اتىنان ايتىلىپ تۇرعانداي اسەر قالدىرادى. سەبەبى دامۋ جولىندا ۇلكەن جىلدامدىقپەن العا قاراي جۇيتكىپ كەلە جاتقان بۇگىنگى الەمدە شىن مانىندە مەيىرىم مەن مەيىرباندىلىق جەتىسپەي جاتقانىن كورىپ ءجۇرمىز.
قۋانىشىمىزعا وراي، ءبىزدىڭ ارامىزدا جۇرەكتەرىنە مەيىرىم ۇيالاعان جاندار ەمەس. وعان كەشە عانا مارەسىنە جەتكەن «قازاقستاننىڭ ۇزدىك الەۋمەتتىك جوبالارى» بايقاۋىنىڭ جەڭىمپازدارىن ماراپاتتاۋ راسىمىندە تاعى ءبىر مارتە كوز جەتكىزدىك»، - دەپ جازدى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ءوزىنىڭ Facebook-تەگى پاراقشاسىندا.
بايقاۋدىڭ الەۋمەتتىك، رۋحاني جانە تاربيەلىك ءمان زور. بىرىنشىدەن، بايقاۋ بەلسەندىلىگىمەن تانىلعان قوعامدىق ۇيىمدارعا ءارى جەكە ازاماتتارعا قولداۋ كورسەتۋگە مۇمكىندىك بەرەدى، ەكىنشىدەن، الگى جەكە ۇيىمدار مەن ازاماتتاردى كوپشىلىككە ۇلگى-ونەگە ەتىپ كورسەتۋگە جول اشادى. اشىمبايەۆتىڭ ايتۋىنشا، ءدال وسى سەبەپتى «نۇر وتان» پارتياسى بايقاۋعا بەلسەنە اتسالىسقان. ءارى بايقاۋدىڭ جالپىۇلتتىق دەڭگەيگە كوتەرىلۋىنە ايتارلىقتاي ۇلەس قوسىپ وتىر.
«وسى رەتتە بايقاۋعا قاتىسقان بارلىق جوبانىڭ جەڭىسكە لايىقتى بولعانىن ايتقىم كەلەدى. ولاردىڭ ءارقايسىسى قوعامداعى وزەكتى ماسەلەلەردى قامتىعان. ماسەلەن، جەڭىسكە جەتكەن ءراسيما تەمەربايەۆانىڭ باستاماسى شىن مانىندە ۇلكەن جۇرەك پەن مەيىرىمدى قاجەت ەتەدى. اتالعان جوبا بويىنشا سوڭعى ءۇش جىلدا 60 مىڭنان استام تۇسكى اس تەگىن تاراتىلعان. بۇل جۇرەكتەرگە مەيىرىم شۋاعىن شاشاتىن ىزگى امال ەكەنى ءسوزسىز»، - دەدى ماۋلەن اشىمبايەۆ.
ايتا كەتەيىك، 1-ورىندى «زەينەتكەرلەرگە تەگىن تۇسكى اس» جوباسىمەن قاتىسقان ءراسيما تەمىربايەۆا الدى. «بۇل – بارلىق قايىرىمدى جاننىڭ جەمىسى»، - دەدى جەڭىمپاز ءوز سوزىندە. ال ەكىنشى ورىندى «ارباداعى كەدەرگىسىز ءومىر» جوباسىمەن قاتىسقان نۇربولات قاراباسوۆ جانە «ەل نازى» ارت-تەراپيامەن دامىتۋ ورتالىعى جوباسىمەن قاتىسقان بەلگىلى ءانشى كەنجەبەك ءجانابىلوۆ الدى. ءانشىنىڭ ۇلىنىڭ ەستۋ قابىلەتى تومەن بولعاندىقتان ەم ىزدەپ الەم شارلاعان. ءتيىستى وپەراسيا ءساتتى وتكەندىكتەن بالاسى بۇگىن دە جازا دا، وقي دا الادى. مۇندايدى باسىنان وتكەرگەن كەنجەبەك ءجانابىلوۆتىڭ ءوزى دە باسقا اتا-انالارعا كومەكتەسۋدى ماقسات ەتەدى. ءسويتىپ «ەل نازى» اتتى جوباسىن جاساپ شىعارادى.
3-ورىندى «مەيكاتون «TOM: Kazakhstan» جوبالارىمەن مارجان مادييەۆا جانە ءسانيا اراپوۆا يەمدەندى. ماڭعىستاۋلىق ارۋلار «ءۇمىت ساۋلەسى» اتتى اۆتورلىق تەلەباعدارلامالار ارقىلى سوڭعى 11 جىلدا تالاي جانعا كومەك قولىن سوزىپ كەلەدى. اسىرەسە، جالعىز قالعان قاريالار مەن اتا-انانىڭ قامقورلىعىنسىز قالعان بالالارعا وسى باعدارلامانىڭ ارقاسىندا تىعىرىقتان شىعار جول تابۋعا كومەكتەسكەن.
بۇدان بولەك داۋىس بەرۋ ناتيجەسى بويىنشا ارنايى سىيلىقتار تابىستالدى.
«قازىرگى تاڭدا ىزگىلىك پەن مەيىرىمنىڭ دانەگىن سەۋىپ جۇرگەن وسىنداي جوبالاردى كەڭىنەن دارىپتەۋدىڭ بەرەرى مول. سوندىقتان پارتيامىز الداعى ۋاقىتتا دا بۇل باعىتتاعى جۇمىستارىن ودان ءارى جالعاستىراتىن بولادى. سەبەبى، قۇرمەت، ىزگىلىك، قامقورلىق سياقتى ادامي قاسيەتتەرگە نەگىزدەلگەن مۇنداي جوبالاردىڭ ماڭىزى قاشاندا جوعارى. ويتكەنى، الەمدى مەيىرىم قۇتقارادى. سوندىقتان ءارقايسىمىز قاسىمىزدا جۇرگەن جانعا مەيىرىم سىيلاپ، وسى ءبىر اسىل قاسيەتتىڭ اياسىن كەڭەيتۋگە اتسالىسايىق»، - دەپ ءسوزىن قورىتىندىلادى ماۋلەن اشىمبايەۆ.
