بۇل تۋرالى اقتوبە وبلىسىنىڭ مەملەكەتتىك ەڭبەك ينسپەكسياسى جونىندەگى باسقارما باسشىسىنىڭ مىندەتىن اتقارۋشى باۋىرجان ۋرازايەۆ مالىمدەدى.
ونىڭ ايتۋىنشا، 2018 جىلدىڭ باسىنان بەرى وبلىستىق ۇيىمدار مەن كاسىپورىنداردا 554 تەكسەرۋ جۇرگىزىلدى، ناتيجەسىندە 1074 ءتۇرلى بۇزۋشىلىقتار انىقتالعان. سونىڭ ىشىندە 883 – ەڭبەك قاتىناستارى، 165 – ەڭبەك قاۋىپسىزدىگى جانە ەڭبەكتى قورعاۋ، 26 - حالىقتى جۇمىسپەن قامتۋ ماسەلەلەرى بويىنشا انىقتالدى.
جۇمىس بەرۋشىلەرگە 417 ۇيعارىم بەرىلىپ، 156 لاۋازىمدى جانە زاڭدى تۇلعالار 28،8 ملن.تەڭگە كولەمىندە اكىمشىلىك جاۋاپكەرشىلىككە تارتىلدى، سونداي-اق باسقالارعا 47 ەسكەرتۋ بەرىلدى.
- ەڭبەك قاتىناستارى سالاسى بويىنشا، سونىڭ ىشىندە جالاقىنى ۋاقىتىلى تولەۋ ماسەلەلەرىنە ەرەكشە كوڭىل بولىنەدى. ءبىز الاتىن وتىنىشتەردىڭ 80% ەڭبەكاقى تولەۋ مەن جالاقى تولەمەۋ ماسەلەلەرىمەن بايلانىستى، ال بۇزۋشىلىقتاردىڭ 70% ەڭبەك قاتىناستارى سالاسىنا تيەسىلى بولىپ وتىر. وسى كەزەڭ ارالىعىندا جالاقى بويىنشا 381،9 ملن. تەڭگە كولەمىندە بەرەشەك وتەلدى. جالاقىنىڭ ۋاقىتىندا تولەنبەۋى فاكتىلەرى بويىنشا انىقتالعان كاسىپورىندارعا جەدەل شارالار قابىلدانىپ، ءقازىر جاعداي باقىلاۋدا، - دەدى باۋىرجان ۋرازايەۆ.
ەڭبەك قاتىناستارىن تيىسىنشە رەسىمدەۋ جانە شارۋاشىلىق جۇرگىزۋشى سۋبەكتىلەردىڭ قىزمەتكەرلەرىمەن ەڭبەك شارتتارىن ۋاقىتىلى جاساسۋ ماسەلەلەرى وزەكتى بولىپ قالۋدا، وسىعان بايلانىستى وڭىردە " ەڭبەك شارتىن جاسا!" اتتى اكسيا بويىنشا 302 جۇمىس بەرۋشى 1086 قىزمەتكەرمەن ەڭبەك شارتىن جاساستى.
بۇگىندە ەلىمىزدەگى شەتەلگە قاتىسى بار كومپانيالارداعى جاعداي ەرەكشە باقىلاۋدا.
- قازىرگى تاڭدا 1 قازانعا دەيىن وبلىستاعى 82 كومپانيا 991 شەتەلدىك جۇمىسشىلاردى الدىرتۋعا رۇقسات الدى. جىل باسىنان بەرى شەتەلدىك قاتىسىمى بار 42 كاسىپورىن تەكسەرىلدى، ناتيجەسىندە 149 بۇزۋشىلىق انىقتالدى. جۇمىس بەرۋشىلەرگە بۇزۋشىلىقتاردى جويۋ تۋرالى 37 ۇيعارىم بەرىلىپ، 10،3 ملن. تەڭگە كولەمىندە 20 ايىپپۇل سالىندى، - دەپ قورىتىندىلادى مەكەمە وكىلى.
