«نۇر وتان» پارتياسىنا جاڭا حاتشى بولىپ يليا تەرەنچەنكو كەلدى، دەپ حابارلايدى Qamshy.kz اقپارات اگەنتتىگى. ول بۇعان دەيىن پاۆلودار وبلىسىنداعى «نۇر وتان» پارتياسى فيليالىنىڭ ءتوراعاسىنىڭ ورىنباسارى بولىپ قىزمەت اتقارعان.
يليا تەرەنچەنكو ق ر پرەزيدەنتى نۇرسۇلتان نازاربايەۆتىڭ شەشىمىمەن پارتيا حاتشىسى بولىپ تاعايىندالدى. «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ارىپتەستەرىنە جاڭا ورىنباساردى تانىستىرىپ، پارتيانىڭ بۇدان بىلاي لايىقتى تۇردە جۇمىس ىستەيتىنىن ايتتى.
«پارتيانىڭ پاۆلودار وبلىسىنداعى فيليالى سوڭعى جىلدارى جاقسى كورسەتكىش كورسەتتى. پارتيالىق جوبالاردى جۇزەگە اسىرۋى، IT-كلاسس، IT-ورتالىقتار جانە باسقا دا باعىتتاردىڭ اشىلۋى بارىسىندا بەلسەندى بولدى. بۇگىندە پاۆلودار وبلىسى پارتيامىزدىڭ فيليالدارى اراسىندا كوش باستاپ تۇرعانىن نىق سەنىممەن ايتا الامىن. پاۆلودار وبلىستىق فيليالىنىڭ ءتوراعاسىنىڭ ورىنباسارى پارتيامىزدىڭ ورىنباسارى ەتىپ تاعايىندالۋى – پارتيانىڭ لايىقتى تۇردە جۇمىس ىستەيتىنىنىڭ ايعاعى. ءار وڭىرلەردە كىمنىڭ قالاي جۇمىس ىستەپ جاتقانىن ءبىز جاقسى بىلەمىز. بەرىلگەن تاپسىرمالاردى ورىنداي الۋى، تياناقتىلىعى، ۇقىپتىلىعى، جاۋاپكەرشىلىگى ءبىزدىڭ باقىلاۋىمىزدا»، - دەدى ماۋلەن اشىمبايەۆ.
سونىمەن قاتار جاڭا ورىنباساردىڭ پارتيانىڭ دامۋىنا، جاڭعىرۋىنا ۇلەسىن قوسىپ، تىڭ وزگەرىستەر اكەلەتىنىنە سەنىمدى. پارتيانىڭ الدىنداعى مىندەتتەر، مەملەكەت باسشىسىنىڭ 5 الەۋمەتتىك باستاماسىن جۇزەگە اسىرۋ، «نۇر وتاننىڭ» 20 جىلدىعىن اتاپ ءوتۋ جۇمىستارى ەندىگى جاڭا ورىنباساردىڭ موينىنا جۇكتەلدى. ال اشىمبايەۆ تەرەنچەنكونىڭ بۇل شارالاردى وڭايلىقپەن الىپ شىعاتىنىنا سەنىپ وتىر.
«مەملەكەت باسشىسى بىزگە، جاڭا ورىنباسارعا ۇلكەن سەنىم ارتىپ وتىر. ءارى يليا سەرگەي ۇلىنىڭ مۇمكىندىكتەرىن، ىسكەرلىك قاسيەتتەرىن، ەنەرگياسىن دا كورىپ وتىر. جاڭا تابىستار تىلەيمىن. بۇل كۇز «نۇر وتانعا» جاڭا لەپ اكەلمەك»، - دەدى ءبىرىنشى ورىنباسار.
وزىنە ۇلكەن سەنىم ارتىلعان يليا تەرەنچەنكو العىس ءبىلدىرىپ، جاۋاپكەرشىلىكتى ابىرويمەن اتقارىپ شىعاتىنىن، باسشىلاردىڭ، نۇروتاندىقتاردىڭ سەنىمىن اقتايتىنىن ايتتى.
«پارتيا قاتارىنا العاش 2004 جىلى قوسىلدىم. «جاس وتان» جاستار قاناتىنىڭ قوعامدىق جۇمىستارىنا بەلسەندى ارالاستىم. پاۆلودار قالالىق ءماسليحاتىنىڭ دەپۋتاتى بولعاندا دا. فراكسيا جەتەكشىسى، پارتيانىڭ وبلىستىق فيليالىندا ورىنباسار بولىپ قىزمەت ەتىپ جۇرگەنىمدە دە، جاۋاپكەرشىلىگىمدى جاقسى ءتۇسىندىم. ەندى، مىنە، جاڭا قىزمەتكە تاعايىندالىپ، مۇنى مەريتوكراتيانىڭ جارقىن ۇلگىسى دەپ قابىلدايمىن. ۇمىتتەرىڭىزدى اقتايمىن»، - دەدى ءسوز العان يليا تەرەنچەنكو.
ايتا كەتەيىك، يليا تەرەنچەنكو 1983 جىلى 15 قاراشادا پاۆلودار قالاسىندا تۋعان. زاڭگەر، قارجى جانە كرەديت، سونداي-اق، ساياساتتانۋ ماماندىقتارى بويىنشا جوعارى ءبىلىم العان. 2006 جىلدان بەرى «نۇر وتان» پارتياسىنىڭ مۇشەسى. بىرنەشە جىل بيزنەس سالاسىندا جۇمىس ىستەگەن ول پاۆلودار وبلىسىندا كاسىپكەرلەر پالاتاسىنىڭ اۋداندىق فيليالىن باسقارعان. سونداي-اق «نۇر وتان» پارتياسى پاۆلودار وبلىستىق فيليالى ءتوراعاسىنىڭ ورىنباسارى بولىپ قىزمەت اتقاردى. ال 2016 جىلدىڭ ءساۋىر ايىنان باستاپ بۇگىنگە دەيىن «نۇر وتان» پارتياسى پاۆلودار وبلىستىق فيليالى ءتوراعاسىنىڭ ءبىرىنشى ورىنباسارى بولىپ جۇمىس ىستەدى.
