ومبىنىڭ وبلىستىق سوتىندا ازيالىقتارعا شابۋىل جاساۋمەن اينالىسقان بانديتتەردىڭ ءىسى قارالۋ ۇستىندە. ماسەلەنىڭ ءمان-جايىنا كەلەر بولساق، مما-دىڭ بۇرىنعى بالۋانى، كەزىندە الەۋەتتى قۇرىلىمداردا قىزمەت اتقارعان  نيكيتا فەدونەنكو اتالمىش باندانىڭ ليدەرى. ونىڭ قاسىنان اركەز تەحنيكالىق ۋنيۆەرسيتەتتىڭ ءۇشىنشى كۋرس ستۋدەنتى الەكساندر بەزبورودوۆ پەن 17 جاستاعى الەكساندر لانبين تابىلا بىلگەن. كەيىننەن قاستارىنا 17 جاستاعى بويجەتكەن رەگينا ميكۋليچيەۆانى قوسىپ العان. «جەزوكشە» دەگەن لاقاپ اتپەن جۇمىس جاساعان وسى ميكۋليچيەۆا.

بۇل باندا ءبىر جىل بويى قاراڭعى كوشەلەردى كەزىپ، وزدەرىنە قۇربان بولار ازياتتاردى اڭدىعان. باستىسى ول ادامنىڭ قاسىندا سەرىك بولماۋى ءتيىس. قاراڭعى تۇندە جالعىز جۇرگەن ازياتتاردى كورگەندە ومبىلىق بانديتتەر قولدارىنداعى ءار ءتۇرلى قۇرال-سايمانداردى پايدالانۋ ارقىلى (پىشاق، گاز باللونچيگى، مىلتىق، ۇر توقپاق) تاپ بەرگەن.  

كۇندەردىڭ ءبىر كۇنىندە باندانىڭ جولى بولماي، لاندين دەگەن بانديت دوستارى اۋرۋحانادان ءبىراق شىعادى. سول كەزدە ومبىلىق بانديتتەر باسقاشا جوسپارمەن جۇمىس جاساۋعا كوشەدى. ەندىگى باستى ءرول ميكۋليچيەۆاعا تاپسىرىلدى. قىز الەۋمەتتىك جەلىدە ازيات جىگىتتەرمەن تانىسىپ، ولاردى كەزدەسۋگە شاقىرىپ وتىرعان. الايدا ونىڭ ورنىنا قارۋلى بانديت دوستارى كليەنتتەرمەن كەزدەسىپ وتىرعان. مۇنىڭ ارتى جاقسىلىقپەن بىتپەگەن.

سونداي كەزدەسۋلەردىڭ بىرىندە ۆاگا زاليبەكيان ەسىمدى ازامات كوز جۇمادى. كەيىنىرەك ادام ءولتىرۋ فاكتىسى بويىنشا باندا ىزدەۋگە جاريالانادى. 2018 جىلدىڭ 14 مامىرىندا اتالمىش ءىس بويىنشا العاشقى سوت وتىرىسى وتەدى. دەگەنمەن سوت الدىندا جاۋاپ بەرەتىن بانديتتەر ول كەزدە نە اباقتىدا، نە قالادان كەتپەۋ قولحاتىمەن جۇرگەندەر بولىپ شىقتى. بوستاندىقتا لانبين مەن ميكۋليچيەۆا بولاتىن. وقۋشى قىزدى ۇرىپ-سوعىپ، قانسىراعان كۇيىندە قالدىرىپ كەتكەن الەكساندر لانبين دە كوپ ۇزاماي قولعا تۇسەدى. ءتورت ايدان كەيىن ياعني ۇستىمىزدەگى جىلدىڭ قازاننىڭ 15ء-ى كۇنى ميكۋليچيەۆا دا قۇقىق قورعاۋ ورگاندارىنىڭ ۋىسىنا تۇسەدى. بۇگىن «جەزوكشە» ميكۋليچيەۆا سوت الدىندا بارلىق جاساعان قىلمىسى ءۇشىن تىك تۇرىپ جاۋاپ بەرمەك. ومبىنىڭ بانديتتەرى قانشا قارا كوزدىڭ وبالىنا قالعانىنان ءبىز بەيحابارمىز. بۇل تۋرالى ناقتى اقپارات ەشقايدا جوق. دەگەنمەن ومبىلىق وڭباعانداردىڭ اباقتىعا قامالاتىندارى كوڭىل جۇباتادى.