«I am a singer Kazakhstan» شوۋىنىڭ وسى جولعى ىرىكتەۋ ءبولىمى قاتىسۋشىلاردىڭ ەسىندە ماڭگى ساقتالاتىن شىعار. ويتكەنى ولار بيىل ەلحان احمەدوۆتىڭ بايقاۋ قاتىسۋشىسىنا جان داۋسى شىعىپ ايقايلاعانىن ءوز كوزدەرىمەن كوردى. 

ساكەن مايعازييەۆ ەلحاندى ازىلدەپ جيرينوۆسكييمەن سالىستىردى. الايدا، احمەدوۆ مىرزانى دا تۇسىنۋگە بولادى. ول «I am a singer Kazakhstan» جوباسىنا قاتىسۋشىلار كىل مىقتىدان تۇرسا ەكەن دەپ ۋايىمداعانى سونشا، تاماعى قارلىققانشا ايقايلاسا دا، فينالعا تەك قانا لايىقتى ءانشىنى عانا وتكىزۋگە بەل بۋىپتى. بۇل ىرىكتەۋ بولىمىندە قازىلار القاسى انشىلەردىڭ كەمشىلىكتەرىن قايتا-قايتا بەتتەرىنە باستى. ءتىپتى كەيبىر جۇلدىزدار ساحنادا تۇرىپ-اق «تاجىنەن» ايىرىلىپ قالدى.

ەلحان، اسىرەسە، سەمەيدەن كەلگەن 27 جاستاعى ەلدار ەسىمدى ۇمىتكەرگە قاتتى شۇيلىكتى. الدىمەن وعان ماقپال يسابەكوۆا ءوز پىكىرىن ءبىلدىرىپ: «ءسىز بۇل ءاندى جاڭا عانا جاتتاپ شىققانداي ورىندادىڭىز»، - دەدى. ال ەلحان بولسا: «مۋزىكادا شالاجانسارلىققا جول جوق! ساحنادا ولاي ءان سالۋعا بولمايدى. داۋىسىڭ جوعارى دا، تومەن دە ەمەس!» - دەپ، اشۋىن تىزگىندەي الماي، جان داۋسىمەن ايقاي سالدى.

الايدا، ەلدار مەن بىشكەكتەن كەلگەن ۇلاربەك نۇرمامات ۇلى ەسىمدى انشىگە اتا-انالارىنا دەگەن ەرەكشە قۇرمەتتەرى مەن ىستىق ىقىلاستارى ءۇشىن العىس ايتۋ كەرەك. ولار وسى شوۋدان وزىپ شىقسا، جەڭىستەرىن وزدەرىن وسى ءبىر ونەر دەگەن قيىن جولعا باپتاپ قوسىپ، ءاردايىم قولداۋ ءبىلدىرىپ وتىرعان اتا-انالارىنا ارناماقشى ەكەن. «اتا-اناما ۇلكەن ءۇي اپەرگىم كەلەدى»، - دەدى ەلدار. «قالاعاندارىنىڭ ءبارىن اپەرەر ەدىم»، - دەدى ۇلاربەك. ەكى ءانشى دە كەلەسى كەزەڭگە وتە الماعانىمەن بۇل شوۋدان ۇلكەن ساباق الىپ، قاتەلىكتەرىن ءتۇسىنىپ، ونەر جولىندا تاعى ءبىر ساتىعا وسۋگە مۇمكىندىك الدى.

سول سياقتى، 16 جاستاعى الماتىلىق اسەل دە، تەمىرتاۋ تۇرعىنى تيمۋر دا، ورالدىق ازامات امانگەلدى ۇلى دا بۇل جولى فينالعا وتپەگەنىمەن،  «I am a singer Kazakhstan» شوۋىنىڭ ۇلكەن ساحناسىنا شىعىپ، كوپتەگەن تاجىريبە جيناقتاپ قايتتى.

 قازىلار القاسىنىڭ ىشىندەگى ەڭ مەيىرىمدىسى، ەڭ سىپايىسى ساكەن مايعازييەۆ بولىپ شىقتى. ول ارىپتەستەرىنىڭ بەرگەن باعاسى مەن ايتقان سىنىنىڭ تىگىسىن جاتقىزىپ، قاتىسۋشىلارعا تاعى ءبىر مۇمكىندىك سىيلاپ، ءتىپتى بولماعان جاعدايدا جىلى لەبىزىمەن قولداۋ كورسەتىپ وتىردى. بۇل جولى ول شوۋعا دايىندالۋ ءۇشىن ارنايى وڭتۇستىك كورەيادا وتكەن شەبەرلىك كلاسىنا بارىپ، جارتى جىل بويى دايىندالعان 16 جاستاعى اسەل ەسىمدى ارۋعا ءوزىنىڭ وڭ پىكىرىن ءبىلدىردى: «شادو، بيورك سىندى باعىتتار دا بىزدە بولۋى كەرەك. ال مۋزىكاعا دەگەن قۇرمەت – بولەك اڭگىمە. سول سەبەپتى ءسىزدى دە، ءسىزدىڭ شىعارماشىلىعىڭىزدى دا ەرەكشە قۇرمەتتەيمىن. بولاشاقتا جولىڭىز بولادى دەپ ويلايمىن». 

ال ازامات امانگەلدىۇلىنا ساكەن بايقاۋلاردا ۇلكەن جاۋاپكەرشىلىك ارتاتىن اۋىر اندەردى ورىنداماۋعا كەڭەس بەردى. «قولىڭنان كەلمەسە، ورىنداما، - دەدى ول. – مەن مۇنى 1996-1998 جىلدارداعى ءوز تاجىريبەمنەن بىلەمىن. جاقسىلاپ دايىندالعانىڭ نە كەرەك، ساحناعا شىعىپ، يمپروۆيزاسيا جاسايمىن دەيسىڭ دە ءسۇرىنىپ-جىعىلاسىڭ». 

بۇل جولعى ىرىكتەۋ تۋرىندا «ءسۇرىنىپ-جىعىلعاندار» كوپ بولعانىمەن، قازىلار القاسى ەڭسەلەرىن تۇسىرمەي، ديماش قۇدايبەرگەنوۆ سىندى جاسىنداي جارقىراپ، قازاقستاندى بۇكىل الەمگە تانىتاتىن جاۋھاردى ىزدەۋدەن تانبايمىز دەپ وتىر.