E-commerce ورتالىعىندا ونلاين ساۋدامەن اينالىسقىسى كەلەتىن كاسىپكەرلەر ءۇشىن بار جاعداي جاسالعان. بۇل تۋرالى «قازپوشتا» اق ەلەكتروندى ساۋدا دەپارتامەنتىنىڭ ديرەكتورى مۇستافين سۇلتان E-commerce Meet UP-تا تىلشىلەرگە بەرگەن سۇحباتىندا مالىمدەدى.

 شارانى وتكىزۋدەگى باستى ماقسات ەلەكتروندى ساۋدامەن اينالىساتىن سەرىكتەستەردى ىسكە شاقىرۋ، وسى ارقىلى ەلەكتروندى ساۋدا نارىعىن العا شىعارۋ.

«ە-commerce ورتالىعى ينتەرنەت بيزنەسپەن اينالىساتىن كاسىپكەرلەرگە قىزمەت كورسەتۋ بولىمشەسى. قازپوشتا ءاردايىم بۇل جۇيەنى لوگيستيكا رەتىندە ۇسىنىپ وتىردى. ەندى ءبىز ناقتى بيزنەستى دامىتۋعا بەل بۋدىق. ياعني ءوزىمىز ەمەس، كەرىسىنشە وسى سالادا جۇمىس جاساۋعا قۇلشىنىس بىلدىرەتىن كاسىپكەرلەردى تارتۋ ارقىلى. دالىرەك ايتسام  وزگەلەردى تارتۋ ارقىلى قازاقستانداعى ەلەكتروندى ساۋدانىڭ وركەندەۋىنە ۇلەس قوسۋ. ول ءۇشىن ەلەكتروندى ساۋدا قىزىقتىراتىن سەرىكتەستەردى شاقىرىپ، وسى ورتالىقتا ولارعا ينتەرنەت-دۇكەندەر، ماركەتينگ، ساتۋ بولىمىمەن تانىستىراتىن جيىندار ۇيىمداستىرىپ وتىرامىز»، – دەدى مۇستافين سۇلتان.

سونداي-اق، سەمينار بارىسىندا ە-commerce ورتالىعىنىڭ اتقارۋشى ديرەكتورى نۇرلىحان حامزات ينتەرنەت-ساۋدانى باستاعانداعى العاشقى تاجىريبەسىمەن ءبولىستى.

«العاشىندا ءبىز شاعىن عانا كەڭسە اشىپ، جۇمىسىمىزدى باستاعانبىز. ەڭ العاشقى تاۋارىمىز كادىمگى كوكونىس كەسكىش قۇرال بولدى. سىرت كوزگە وعاش ەستىلەتىن بولار، ءبىراق ءبىز ينتەرنەت-ساۋدانى ءدال وسىلاي 8 ناۋرىزدىڭ الدىندا باستادىق. ەڭ العاشقى كۇننىڭ وزىندە ءبىزدىڭ تاۋارعا 200 ادام قىزىعۋشىلىق ءبىلدىرىپ، تاپسىرىس بەردى. ال بىزدە بار جوعى 50 كوكونىس كەسكىش قۇرال بولاتىن. ودان ءارى جۇمىسىمىزدى جالعاستىرىپ باسقا دا تاۋارلاردى تىكەلەي زاۋىتقا تاپسىرىس بەرۋ ارقىلى ساتا باستادىق. بارلىعىن ءوزىمىز جارنامالاپ، ساتىپ جانە تاۋاردى ساتىپ الۋشىعا جەتكىزىپ وتىردىق»، – دەدى نۇرلىحان حامزات.

ايتا كەتەلىك، شارادا اتالعان ورتالىقتىڭ بىلىكتى ماماندارى كاسىپكەرلەردى ءوز قىزمەتتەرىمەن تانىستىرىپ، تەرەڭدەتىلگەن كەڭەس الۋعا شاقىردى. ولاردىڭ ىشىندە ينتەرنەتتە جارنامالاۋ، ماركەتينگ، تاۋاردى جەتكىزۋ، فۋلفيلمەنت، CRM جۇيەسى بويىنشا ماماندار قاتىستى.