«7-20-25» يپوتەكالىق تۇرعىن ءۇي كرەديتتەۋ باعدارلاماسى نەگىزىندە ەكىنشى دەڭگەيلى بانكتەرمەن 1،6 ملرد. تەڭگەگە 194 ءوتىنىم ماقۇلداندى». وبلىس اكىمدىگىندە وتكەن اپپارات جيىنىندا قۇرىلىس، ساۋلەت جانە قالا قۇرىلىسى باسقارماسىنىڭ باسشىسى ەلدار ماشىرىقوۆ وسىلاي دەدى.

بيىل 9 ايدىڭ قورىتىندىسى بويىنشا 910،5 مىڭ شارشى مەتر تۇرعىن ءۇي قولدانىسقا بەرىلگەن. جىل سوڭىنا دەيىن ءىس جۇزىندە 1،0 ملن. شارشى مەتر تۇرعىن ءۇي پايدالانۋعا بەرىلەدى دەپ جوسپارلانعان.

وبلىس بويىنشا تۇرعىن ۇيمەن قامتاماسىز ەتىلۋ 1 تۇرعىنعا 22،4 شارشى مەتردى قۇرايدى (ق ر بويىنشا – 21،6 شارشى مەتر).

ايتا كەتەيىك، جىل سوڭىنا دەيىن اقتاۋ قالاسىندا 2300 پاتەر تاپسىرىلماق.

-پايدالانۋعا بەرىلەتىن تۇرعىن ۇيلەر كولەمىنىڭ قارقىنى جىل سايىن 10%-عا ءوسىپ وتىرسا جانە حالىق سانى 3%-عا وسسە، تۇرعىن ۇيمەن قامتاماسىز ەتىلۋ كولەمى 2025 جىلعا 1 تۇرعىنعا 30 شارشى مەتردى قۇرايدى. قوسىمشا نەسيەلەر تۇرعىندارعا قايتارىمدىلىق، اقىلىلىق جانە ماقساتتى پايدالانۋ نەگىزدەرىندە بەرىلەدى. قوسىمشا نەسيەنىڭ جىلدىق مولشەرلەمەسى 7%-دان اسپايدى، نەسيە مەرزىمى – 3 جىل، - دەيدى ەلدار ماشىرىقوۆ