اقتاۋدا وبلىستىق ونكولوگيالىق ديپانسەردىڭ قۇرىلىسى قايتا جانداندى. قۇرىلىسى 2011 جىلى توقتاپ قالعان نىساننىڭ جۇمىسىمەن وبلىس اكىمى ەرالى توعجانوۆ تانىسىپ قايتتى. بيىل نىسان قۇرىلىسىن جالعاستىرۋعا 7 ملرد. تەڭگەدەن استام قارجى بولىنگەن. ماڭعىستاۋ وبلىسى اكىمىنىڭ باسپا ءسوز قىزمەتىنىڭ مالىمەتىنشە، ديسپانسەر قۇرىلىسى 2019 جىلدىڭ سوڭىندا اياقتالماق.

وبلىستىق ونكولوگيالىق ديسپانسەردە 100 ورىندىق اۋرۋحانا جانە دياگنوستيكالىق ورتالىق بولادى دەپ جوسپارلانعان. ءبىرىنشى قاباتتا ەمحانا، ەكىنشى قاباتتا اكىمشىلىك كورپۋس ورنالاسپاق. جوعارعى قاباتتارىندا حيميوتەراپيا، حيرۋرگيا، ساۋلەلىك تەراپيا ت.ب. كۇندىزگى ەم-شارا بولىمدەرى جاساقتالادى.

قازىرگى تاڭدا جاڭا كلينيكادا جۇمىس ىستەۋ تۋرالى بىلىكتى مەديسينا ماماندارىمەن كەلىسسوزدەر جۇرگىزىلىپ جاتىر.

وبلىس اكىمى ەرالى توعجانوۆ جاۋاپتى قىزمەتكەرلەرگە قۇرىلىس بارىسى تۋرالى اپتا سايىن بايانداپ تۇرۋدى تاپسىرىپ، بارلىق قاجەتتى زاماناۋي جابدىقتاردى ساتىپ الۋ جولدارىن قاراستىرۋ قاجەتتىگىن ايتتى.

سونىمەن قاتار ايماق باسشىسى «ماڭگىلىك الاۋ» مونۋمەنتىنىڭ قايتا قالپىنا كەلتىرۋ جۇمىستارىمەن تانىستى. ءشىلد ەايىندا باستالعان جوندەۋ جۇمىستارى 2018 جىلدىڭ قاراشا ايىندا اياقتالادى دەپ جوسپارلانعان.

قازىرگى كەزدە اللەياداعى تروتۋار تولىعىمەن الىنىپ، ورنىنا بىردەن جاڭاسى توسەلىپ جاتىر. بۇدان بولەك، ەسكەرتكىشتىڭ سىرتقى ەسكى كەراميكالىق قاباتى الىنىپ، سۇيىق تراۆەرتينمەن قاپتالۋدا. ءمارمار ەدەن توسەنىشتەرى جاڭادان اۋىستىرىلادى. سونداي-اق، اينالادا جاڭا ورىندىقتار، قوقىس جاشىكتەرى مەن شامدار ورناتىلماق.