قاراقيا اۋدانىنىڭ 45 جىلدىعىنا وراي قۇرىق اۋىلىندا سالتاناتتى جيىن ءوتىپ، ءبىر توپ ەڭبەك ارداگەرلەرى، گەولوگ-بارلاۋشىلار، وسى اۋداندا كوپ جىلدار باسشىلىق ەتكەن، اۋداننىڭ قۇرىلۋى مەن قالىپتاسۋىنا اتسالىسقان ازاماتتار «قاراقيا اۋدانىنىڭ 45 جىلدىعى» مەرەكەلىك توسبەلگىمەن ماراپاتتالدى. سونىمەن قاتار بىنەشە ازاماتقا «قاراقيا اۋدانىنىڭ قۇرمەتتى ازاماتى» اتاعى تابىستالدى.

ماراپات العاندار قاتارىندا توكەن جۇماعۇلوۆ، تۇرسىنعالي كوشەن ۇلى، سۆەتقالي نۇرجان، مىرزاتاي بولات، ورىن قۇلسارييەۆ، ەسەن كۇمىسقالي، سالامات نۇر ۇلى، دانيار ارالبايەۆ، اسقار رزاحانوۆ، چاپاي ءابىلوۆ سىندى ەلگە تانىمال تۇلعالار بار.

قۇرىلعانىنا 45 جىل بولعان قاراقيا اۋدانىندا بۇگىندە 37 مىڭعا جۋىق تۇرعىن بار. اۋدانداعى 16 مەكتەپتە 7،5 مىڭنان اسا بالا ءبىلىم الىپ جاتىر.

اۋداننىڭ قۇرىلۋىنا، قالىپتاسۋىنا س.قىرىمقۇلوۆ، ءو.وزعانبايەۆ، ت. كوشەن ۇلى اتسالىسسا، ورىن قۇلسارييەۆ، اقسۇلۋ قۇدابايەۆا، ايگۇل قوسانوۆا، لۇقپان جولداسوۆ، اقمارال ەرىمبەتوۆا، جولامان كوشكىنوۆتەر ونەرىمەن قۇت مەكەن قاراقيانى الەمگە تانىتىپ ءجۇر. ءتورت تۇلىك مالدىڭ جايىن ءبىر كىسىدەي بىلەتىن، ونى دامىتۋعا ۇلەس قوسقان قالپاق ناۋرىزماعانبەتوۆ تە وسى اۋداننىڭ ازاماتى. قالامىنا ءتىل بىتىرگەن، ولەڭ-سوزدىڭ مارعاسقالارى سۆەتقالي نۇرجان، مىرزاتاي بولات وسى قاسيەتتى توپىراقتان شىققان.

«ءماشھۇر ءجۇسىپ اتامىز ەلىنەن ادام شىقپاعان ەلدى قاتارعا قوسپايدى ەكەن. بۇل كىسىلەر ماقتاۋعا مۇقتاج ەمەس. ءبىراق وسى توپىراقتا تۋىپ، ونىڭ قاسيەتىن بۇكىل ەلگە كورسەتىپ جۇرگەن تۇلعالاردى وسكەلەڭ ۇرپاق بىلە ءجۇرسىن دەگەن نيەتپەن اتتارىن اتاپ وتىرمىز. بۇل قاسيەتتى مەكەننەن ءالى دە تالاي ازامات شىعادى دەپ سەنەمىز»، — دەگەن ماڭعىستاۋ وبلىسى اكىمىنىڭ ورىنباسارى ماقسات سقاقوۆ قاراقيا اۋدانىنىڭ تانىمال وكىلدەرىنىڭ اتىن اتاپ، ءارقايسىسىنا ءوز العىسىن جەتكىزدى. ەلگە تانىمال اقىن مەلس قوسىمبايەۆ اۋداننىڭ مەرەيتويىنا تارتۋ رەتىندە ولەڭ جولدارىن ارنادى.

سونداي-اق سالتاناتتى شاراعا كەلگەن قوناقتار قاراقيا اۋدانىنىڭ 45 جىلدىعىنا وراي اۋدان كاسىپكەرلەرى ازىرلەگەن ۇلتتىق ونىمدەر مەن قولونەر بۇيىمدارىنىڭ كورمەسىن تاماشالادى. اۋداننىڭ 45 جىلدىعىنا ارنالعان شارالار «ىنتىماق» الاڭىنداعى مەرەكەلىك كونسەرتپەن جالعاسىپ، ءوڭىرىمىز بەن رەسپۋبليكاعا تانىمال ونەر يەلەرى كوڭىلدى كەشتىڭ كورىگىن قىزدىردى.

قۇرىق اۋىلىنىڭ ورتالىق ستاديونىندا اۋداننىڭ مەرەيتويىنا وراي فۋتبول سايىسى ءوتتى. بۇدان سوڭ سپورتتىق مەرەكەگە قاتىسۋشىلار قول كۇرەسىنەن سايىسىپ، جۇگىرۋدەن ەستفەتا ۇيىمداستىرىلدى. سونىمەن قاتار وسى كۇنى اۋداننىڭ ورتالىعى قۇرىق اۋىلىندا جاڭادان سالىنعان بىرنەشە نىسان اشىلىپ، پايدالانۋعا بەرىلدى. ولاردىڭ قاتارىندا كەڭ سپورتتىق زال مەن مۇراجاي دا بار.

ەستەرىڭىزگە سالا كەتەيىك، بىلتىردان بەرى اۋدان كولەمىندە «رۋحاني جاڭعىرۋ» باعدارلاماسى اياسىندا «جادىگەر جەردە قالماسىن»، «مۋزەيگە سىي تارتۋ» اكسيالارى ۇيىمداستىرىلىپ، ەل اراسىندا ەلەۋسىز جاتقان ماڭىزى زور قۇندى جادىگەرلەردى جيناقتاعان بولاتىن. كەشكىسىن قاراقيا اۋدانىنىڭ 45 جىلدىعىن ارنالعان سالتاناتتى جيىن ءوتىپ، مەرەكەگە ورايلاستىرىلعان شارالار گالا كونسەرتپەن اياقتالدى.