ماڭعىستاۋ وبلىسى مۇنايلى اۋدانى باسقۇدىق اۋىلىنا جاقىن جەردە قۋاتى جىلىنا 50 000 توننا قالدىقتاردى سۇرىپتاۋ ستانسياسىنىڭ قۇرىلىسى اياقتالدى.

بۇل جونىندە ماڭعىستاۋ وبلىسىنىڭ اكىمى ەرالى لۇقپان ۇلىنىڭ توراعالىعىمەن وتكەن اپپارات جيىنىندا تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى دۇيسەن قۇسبەكوۆ مالىمدەدى. جيىننىڭ كۇن تارتىبىندە بىرنەشە ماسەلە قارالدى. سونىڭ ءبىرى – تۇرمىستىق قاتتى قالدىقتاردى قايتا وڭدەۋ جانە وڭدەۋ.

-2018 جىلدىڭ 8 ايىندا پوليگوندا وڭىردەگى 129 521 توننا قاتتى قالدىقتىڭ 10 254 تونناسى وڭدەلدى. 10 093 نەمەسە (49%) قوقىس كونتەينەرلەرى ورناتىلدى، - دەدى دۇيسەن قۇسبەكوۆ.

ماڭعىستاۋ وبلىسىندا سانيتارلىق نورمالارعا سايكەس كەلەتىن قاتتى تۇرمىستىق قالدىقتارعا ارنالعان 8 پوليگون بار: اقتاۋ، جاڭاوزەن، فورت - شيەۆچەنكو، بەينەۋ، قۇرىق، جەتىباي، شەتپە، قالامقاس كەن ورنى. جاڭاوزەندە قۋاتتىلىعى 2،2 ملن م3 قاتتى تۇرمىستىق قالدىقتاردى قايتا وڭدەۋ جانە كادەگە جاراتۋ زاۋىتى جۇمىس ىستەيدى.

دۇيسەن قۇسبەكوۆتىڭ ايتۋىنشا، مۇنايلىداعى ستانسيادا پوليگوندا كومۋگە تىيىم سالىنعان 8 فراكسيانىڭ قالدىقتارى سۇرىپتالماق.