رەسەيدىڭ سانكت-پەتەربۋرگ قالاسىندا مەنتالدى اريفمەتيكا بويىنشا الەمدىك رەكورد جاڭاردى. 150 بالا ەستافەتالىق ادىسپەن 30 مىڭ ەسەپتى 26 مينۋت، 26 سەكۋند، 12 ميلليسەكۋندتا شىعاردى. 120 مەملەكەتتەن جينالعان بالالاردىڭ قاتارىندا اقتاۋلىق ورىنگۇل ارىستان دا بار. بۇل - العىر وقۋشىنىڭ بۇل العاشقى جەتىستىگى ەمەس.

رەكورد 20 قىركۇيەك كۇنى سانكت-پەتەربۋرگ قالاسىنداعى ءىى ەۋرازيالىق حالىقارالىق ايەلدەر فورۋمى اياسىندا ورناتىلعان. الەمدىك جانە ازيا رەكورد كىتابىنىڭ وكىلدەرى تاپسىرمانى قىزدارعا سىناق رەتىندە ۇيىمداستىرعان. بۇل – تاريحتا العاش رەت ورىن العان الەمدىك رەكورد. بالالاردىڭ بارلىعىنا فورۋمعا قاتىسقانى ءۇشىن، رەكورد ورناتقانى ءۇشىن ديپلومدار جانە رەسەيدەگى قازاقستان ەلشىسىنىڭ العىس حاتى تابىستالعان.

ورىنگۇل اقتاۋداعى №17 مەكتەپتىڭ 6 سىنىبىندا وقيدى. وقۋ وزاتى مەنتالدى اريفمەتيكاعا 4 سىنىپتان بەرى قاتىسادى. 2017 جىلى جەلتوقسان ايىندا مالايزيادا وتكەن مەنتالدى اريفمەتيكا وليمپياداسىندا باس جۇلدە يەلەنگەن. 3 مىڭ بالانىڭ ىشىنەن سۋىرىلىپ شىققان ەسەپكە جۇيرىك قىز تۋعان كۇنىندە وزىنە ۇلكەن سىي جاساعان.

-جارىستا كىشكەنە قوبالجۋ بولدى، ويتكەنى قاتىسۋشىلار وتە كوپ جانە بىرىنەن-بىرى مىقتى. بارىمىزگە ءبىر عانا قالام بەرىپ، ۋاقىتتى ەسەپتەپ تۇردى. ءبىز ءبىر تاپسىرمانى كەزەك-كەزەك ورىندادىق. سوندا مەنتالدى اريفمەتيكا بويىنشا رەكورد جاڭارتتىق، — دەيدى ورىنگۇل.

ورىنگۇل «UCMAS» حالىقارالىق ينتەللەكتۋالدىق دامۋ اكادەمياسىنىڭ اكتاۋداعى فيليالىندا وقىپ ءجۇر. ءقازىر ءتورتىنشى دەڭگەيگە جەتكەن.

-ورىنگۇل العاش ۇيىرمەگە كەلگەندە توپتا ودان وزگە 5-6 بالا بولدى. جالپى بالالار مەنتالدى اريفمەتيكاعا قىزىعىپ باستاعانىمەن، اياعىنا دەيىن جەتكىزە الماي، شىداماي جاتادى. ال ورىنگۇل ىنتاسىمەن، تالابىمەن بىردەن كوزگە ءتۇستى. كەز كەلگەن سالانى ءۇيىرىپ الىپ كەتەدى، قاتىساتىن ۇيىرمەسى كوپتىگى سونشا، بوس ۋاقىتى جوق، — دەيدى مەنتالدى اريفمەتيكادان ءدارىس بەرەتىن ءمۇعالىمى قارلىعاش ابدرەيموۆا.

ورىنگۇل ماتەماتيكامەن قوسا قازاق ءتىلى، دەنە شىنىقتىرۋ، تەحنولوگيا جانە مۋزىكا پاندەرىن ءسۇيىپ وقيدى. ەسەپ شىعارۋدان بولەك سۋرەت سالىپ، بي بيلەيدى. اعىلشىن ءتىلىن دە مەڭگەرىپ ءجۇر. بولاشاقتا دارىگەر بولۋدى ارماندايدى.

ول ەكى تاڭبالى سانداردى بىردەن قوسىپ، ولاردى ءبىر تاڭبالى ساندارعا جىلدام كوبەيتە الادى. 8 مينۋتتا 180 ەسەپكە دەيىن شىعارا الادى.

مەنتالدى اريفمەتيكا وليمپياداسى مالايزيا ەلىندە بيىل دا وتەدى. ورىنگۇل تاعى دا باعىن سىناپ كورگىسى كەلەتىنىن جەتكىزدى.