ماڭعىستاۋ وبلىسىنداعى ەڭ كونە اۋدان ماڭعىستاۋ اۋدانى قۇرىلعانىنا 90 جىل تولدى. وسىعان وراي ەكى كۇنگە ارنالعان مەرەيتويلىق شارالار جوسپارلاندى.

اۋداننىڭ قۇرىلۋى مەن قالىپتاسۋىنا ۇلەس قوسقان ءبىرقاتار ازاماتتارعا ماڭعىستاۋ اۋدانىنىڭ 90 جىلدىق مەرەيتويىنا وراي اۋداننىڭ «قۇرمەتتى ازاماتى» اتاعى بەرىلىپ، مەرەكەلىك مەدالدار تاپسىرىلدى.

سونىمەن قاتار اۋداننىڭ مەرەيتويىنا وراي ءبىرقاتار نىسان پايدالانۋعا بەرىلدى. ولاردىڭ قاتارىندا جىڭعىلدى اۋىلىندا، شەتپە-1 شاعىناۋدانىندا، قوسبۇلاق اۋىلىندا اشىق سپورت الاڭى، تۇششىبەك اۋىلىندا، ۇشتاعان اۋىلىندا 4 پاتەرلى مۋنيسيپالدى تۇرعىن ءۇي بار.

شارانىڭ ەكىنشى كۇنى ورتالىق پاركتە اعا بۋىن وكىلدەرىنىڭ 30 جىل بۇرىن «بولاشاق ۇرپاققا ارناپ قالدىرعان حاتىن» اشۋ ءراسىمى ءوتتى. سونىمەن قاتار، الامان بايگە، قۇنان، تاي جارىستارى، تەڭگە الۋ سىندى ۇلتتىق ويىندار ۇيىمداستىرىلدى.

mangystaumedia.kz مالىمەتىنشە، ماڭعىستاۋ وسىدان 90 جىل بۇرىن بۇكىلرەسەيلىك ورتالىق اتقارۋ كوميتەتىنىڭ «قازاق سسر اۆتونومياسىن اۋدانداستىرۋ تۋرالى» 1928 جىلدىڭ 3 قىركۇيەگىندەگى №743 قاۋلىسى بويىنشا اداي وكرۋگىنىڭ قۇرامىندا قۇرىلدى. ول كەزدە جاڭا اۋداننىڭ ورتالىعى فورت-شيەۆچەنكو قالاسى ەدى.

1939 جىلدىڭ 16 قازانىندا قازاق سسر جوعارعى كەڭەسىنىڭ جارلىعى بويىنشا ماڭعىستاۋ اۋدانى ەكى اۋدانعا بولىنگەن. ونىڭ ءبىرى – ورتالىعى فورت-شيەۆچەنكو قالاسى بولاتىن شيەۆچەنكو اۋدانى بولسا، ەكىنشىسى – ورتالىعى كۋيبىشيەۆ سەلوسى بولاتىن ماڭعىستاۋ اۋدانى. 1940 جىلى اۋدان ەڭبەكشىلەرىنىڭ ءوتىنىشى بويىنشا گۋريەۆ وبلىستىق كەڭەسى اتقارۋ كوميتەتىنىڭ شەشىمى بويىنشا اۋدان ورتالىعى تاۋشىق پوسەلكەسىنە (سوسياليستىك گورودوك) كوشىرىلگەن.

اۋداننىڭ قازىرگى ورتالىعى شەتپە سەلوسىنا 1964 جىلى 15 مامىردا كوشىرىلدى.

90 جىلدىق مەرەيتويىن تويلاپ جاتقان ماڭعىستاۋ اۋدانىندا بۇگىندە 38700 ادام تۇرادى، 7 اۋىلدىق وكرۋگ، 5 اۋىلعا قاراستى بارلىعى 21 ەلدى مەكەن بار.