ماڭعىستاۋ وبلىسى ەلىمىزدە العاشقى بولىپ انالوگتى حابار تاراتۋدى ءوشىرىپ، سيفرلىق ەفيرلىك تەلەحابار تاراتۋعا كوشتى.  سالتاناتتى شاراعا ق ر اقپارات جانە كوممۋنيكاسيالار ءمينيسترى داۋرەن ابايەۆ، ماڭعىستاۋ وبلىسىنىڭ اكىمى ەرالى توعجانوۆ جانە «قازتەلەراديو» اق باسقارما ءتوراعاسى يسكاندەر تاجىبەكوۆ قاتىستى.

جيىندا ءسوز العان ق ر اقپارات جانە كوممۋنيكاسيالار ءمينيسترى داۋرەن ابايەۆ وبلىس تۇرعىندارىن قۇتتىقتاپ، سيفرلىق ەفيرلىك تەلەحابار تاراتۋدىڭ ارتىقشىلىقتارىنا توقتالدى. «شەجىرەلى ماڭعىستاۋ وبلىسى تولىعىمەن سيفرلىق تەلەحابار تاراتۋعا كوشكەن ەلىمىزدەگى ەڭ العاشقى ايماق.  ماڭعىستاۋدا سيفرلىق تەلەحابار تاراتۋ ءۇشىن بارلىق جاعداي جاسالعان. سوندىقتان ەرالى لۇقپان ۇلى باستاعان جەرگىلىكتى اكىمدىك پەن «قازتەلەراديو» ۇجىمىنا اتقارىلعان اۋقىمدى جۇمىس ءۇشىن العىس ايتامىن. بىرىنشىدەن، بۇل «سيفرلىق قازاقستان» باعدارلاماسىن جۇزەگە اسىرۋعا باعىتتالعان ناقتى قادامنىڭ ءبىرى.
ەكىنشىدەن، وسى قادام ارقىلى مەملەكەتتىك اقپاراتتىق قاۋىپسىزدىكتى قامتاماسىز ەتۋگە جول اشىلادى. ويتكەنى وتاندىق ارنالاردىڭ حابار تاراتۋ ۇلەسى مەن ساپاسى ارتقالى وتىر. ۇشىنشىدەن، سيفرلىق حابار تاراتۋدى ەنگىزۋ قالا مەن اۋىل اراسىنداعى اقپاراتتىق الشاقتىقتى تومەندەتەدى» - دەدى داۋرەن ابايەۆ.

ءوز كەزەگىندە ماڭعىستاۋ وبلىسىنىڭ اكىمى ەرالى توعجانوۆ سيفرلىق ەفيرلىك تەلەحابار تاراتۋعا كوشۋ شەڭبەرىندە جاسالعان جۇمىستاردى قورىتىندىلاپ،  جوبانى ىسكە اسىرۋ 2015 جىلى اياقتالعانىن مالىمدەدى. حابار تاراتۋدىڭ جاڭا قالىبىنىڭ توقتاۋسىز جۇمىس ىستەۋىن قامتاماسىز ەتۋ ماقساتىندا 21 راديوتەليەۆيزيالىق ستانسيا قۇرىلىسى سالىنىپ، جاڭعىرتىلدى، بۇل حالقىنىڭ سانى شامامەن 500 مىڭ ادامدى قۇرايتىن 47 ەلدى مەكەندى، ياعني وبلىس حالقىنىڭ 99% قامتۋعا مۇمكىندىك بەرەدى. بۇل جوبا بويىنشا 2014 جىلى  جاڭاوزەن قالاسى سيفرلىق ەفيرلىك تەلەحابار تاراتۋ جۇيەسىنە كوشتى. ەندى مىنە تولىقتاي جاڭا فورماتقا ەلىمىزدە ەڭ العاشقى وبلىس بولىپ ماڭعىستاۋ وتۋدە. وبلىسىمىزدا سيفرلىق تەلەحابار تاراتۋ جەلىسىنىڭ قامتۋ اۋماعى 99%ء-تى قۇرادى. ءوڭىرىمىز ءقازىر انالوگتىق تەلەحابار تاراتۋ جەلىسىنىڭ وشىرۋگە دايىن. 14 ەلدى مەكەن جەر ەرەكشەلىكتەرىنە بايلانىستى سيفرلىق تەلەحابار تاراتۋ جۇيەسىنە تىكەلەي قوسىلۋ مۇمكىندىگى جوق بولماسا دا، ءبىز اۋىلداردى «OTAU TV» جەرسەرىكتىك تەلەحابار جۇيەسىنە قوسۋ ارقىلى 100 % تەلەحابار تاراتۋمەن قامتاماسىز ەتتىك»، - دەدى ەرالى توعجانوۆ.

 «قازتەلەراديو»  اق باسقارما ءتوراعاسى يسكاندەر تاجىبەكوۆ رەسپۋبليكانىڭ بارلىق اۋماعى بويىنشا ينفراقۇرىلىمنىڭ سيفرلىق ەفيرلىك حابار تاراتۋعا كوشۋگە دايىندىق بارىسى تۋرالى حابارلادى.  تاجىبايەۆتىڭ مالىمەتىنشە، سيفرلىق حابار تاراتۋعا تولىقتاي كوشۋ ءۇشىن بۇكىل ەلىمىز بويىنشا 827 راديوتەليەۆيزيالىق ستانسيانى پايدالانۋعا ەنگىزۋ كەرەك. بۇگىنگى تاڭدا 414 رتس سالىندى. 2018 جىلدىڭ اياعىنا دەيىن تاعى 130 جۋىعىن اياقتاۋ جوسپارلانۋدا. قالعان ستانسيالار 2019-2020 جىلدارداعى كەزەڭدە اياقتالاتىن بولادى. انالوگتى حابار تاراتۋدىڭ تولىقتاي ءوشىرىلۋى 2021 جىلى ىسكە اسپاق.