قازاقستان مەن مالايزيانىڭ 150-دەن اسا بيزنەس وكىلى  مەن رەسمي تۇلعاسى الماتىداعى فورۋمعا قاتىسۋدا. بيزنەس-فورۋمنىڭ ۇيىمداستىرۋشىسى – «قازاقستان-مالايزيا ىسكەرلىك كەڭەسى».

ۇيىمداستىرۋشىلاردىڭ ايتۋىنشا، بۇل فورۋمنىڭ باستى ماقساتى مەن مىندەتى – ەكى ەلدىڭ ىسكەرلىك توپتارى اراسىنداعى ءوزارا ءتيىمدى ىنتىماقتاستىقتى دامىتۋ، مالايزيا نارىعىندا قازاقستاندىق بيزنەستىڭ مۇددەسىن ىلگەرىلەتۋ ءۇشىن جايلى كليماتتى قالىپتاستىرۋ، سونداي-اق، قازاقستانعا مالايزيادان ينۆەستيسيالار تارتۋ.

«فورۋم ەكى ەلدىڭ بيزنەس قاۋىمداستىقتارى اراسىنداعى ءوزارا ءتيىمدى ىنتىماقتاستىق پەن سەرىكتەستىكتى دامىتۋعا ارنالعان كەرەمەت الاڭ بولىپ تابىلادى. ال «قازاقستان-مالايزيا ىسكەرلىك كەڭەسى» - قازاقستان مەن مالايزيا كومپانيالارىنا بيزنەستى تولىققاندى تۇردە ارى قاراي دامىتۋ ءۇشىن قاجەتتى قۇرالداردىڭ بارلىعىن ۇسىناتىن ۇيىم»، - دەپ مالىمدەدى «قازاقستان-مالايزيا ىسكەرلىك كەڭەسى» ورتاق ءتوراعاسى داتو بەرىكقازى سەكسەنبايەۆ ءىس-شارانىڭ اشىلۋى كەزىندە.

قازاقستان رەسپۋبليكاسى ۇلتتىق بانكىنىڭ مالىمەتتەرى بويىنشا قازاقستان ەكونوميكاسىنا مالايزيالىق تىكەلەي ينۆەستيسيالاردىڭ 2016-2017 جىلدار ىشىندەگى جانە 2018 جىلدىڭ ءبىرىنشى توقسانىنداعى  ۇلەسى 16،6 ملن. اقش دوللارىن قۇرادى. نەگىزگى ينۆەستيسيالار مۇناي-گاز، قۇرىلىس جانە ينفراقۇرىلىمعا باعىتتالدى.

ەكى ەل اراسىنداعى تاۋار اينالىمىنىڭ قارقىنى جاعىنان 2017 جىلدىڭ سايكەسىنشە كەزەڭىمەن سالىستىرعاندا ءوزارا ساۋدانىڭ 48%-عا (38،9 ملن. اقش دوللارى) وسكەنى بايقالىپ وتىر. 2018 جىلدىڭ ءقاڭتار-ساۋىر ايلارىنداعى قازاقستاندىق ءونىم ەكسپورتى 251 مىڭ اقش دوللارىن، ال يمپورت 38،6 ملن. اقش دوللارىن قۇرادى (2017 ج. ەكسپورت - 41،5 مىڭ اقش دوللارى، يمپورت – 26،1 ملن. اقش دوللارى).

فورۋم جۇمىسىنا ەكونوميكانىڭ ءتۇرلى سەكتورلارىندا (مۇناي-گاز سالاسى، مەتاللۋرگيا ونەركاسىبى، جەڭىل ونەركاسىپ جانە ت.ب.) قىزمەت ەتەتىن مالايزيانىڭ 40-تان اسا كومپانياسى، سونداي-اق، ءتۇرلى ەكونوميكا سەكتورلارىندا قىزمەت ەتەتىن كوممەرسيالىق جانە مەملەكەتتىك 60-تان اسا قازاقستاندىق كومپانيا قاتىسىپ جاتىر.

فورۋم اياسىندا ءىرى قازاقستاندىق قورلار جانە مالايزيا كومپانيالارى (قازاقستان-مالايزيا ىسكەرلىك كەڭەسى (ارى قاراي - قمىك) جانە «اتامەكەن» ۇكپ؛ قمىك جانە «قازاقينۆەست»؛ قمىك جانە «قازاقەكسپورت») اراسىندا ءوزارا تۇسىنىستىك جانە ىنتىماقتاستىق تۋرالى ءبىرقاتار مەموراندۋمدارعا قول قويىلادى دەپ كۇتىلۋدە.

فورۋم ساۋدا جانە ينۆەستيسيا سالاسىنداعى ءوزارا ارەكەتتەستىك سىندى كەڭ تاقىرىپتاردى قوزعايتىن پلەنارلىق سەسسيا جانە اشىق پانەلدىك پىكىرتالاس، ۆ2ۆ كەزدەسۋلەرى فورماتىندا ءوتىپ جاتىر. ءىس-شارانىڭ باستى سپيكەرلەرى – مالايزياداعى قازاقستان ەلشىسى سارەكەنوۆا دانيار قابيدوللا ۇلى، قازاقستانداعى مالايزيا ەلشىسى سايد موحاماد باكري بين سايد ابدۋل راحمان، «Resmi» كومپانيالار توبى ديرەكتورلار كەڭەسىنىڭ ءتوراعاسى قايرات ماجىبايەۆ، مالايزيا-قازاقستان ىسكەرلىك كەڭەسىنىڭ ورتاق ءتوراعاسى داتۋك لۋ تۋك دجي (Datuk Loo Took Gee) جانە ت.ب. تۇلعالار.