اتىراۋدا قالا كۇنىنە ۇيىمداستىرىلعان مەرەكەلىك شارالار ءوز مارەسىنە جەتتى. قالا كۇنى مەرەكەسىنە وراي قازاقستان مەن رەسەي ەستراداسىنىڭ جۇلدىزدارىنىڭ قاتىسۋىمەن وتكەن گالا-كونسەرت 20 مىڭعا جۋىق كورەرمەن جينادى. حالىق الدىندا اتىراۋ قالاسىنىڭ اكىمى اليمۇحاممەد قۇتتۇمۇرات-ۇلى قالا دامۋىنىڭ وڭ ديناميكاسىن اتاپ ءوتتى.
-بيىلعى جىلى اتىراۋدا رەكوردتىق تۇرعىن ءۇي ، قالا ماڭىنداعى اۋىلدىق وكرۋگتەردە جاڭا جولدار سالىناتىن بولادى جانە بالاباقشالار مەن مەكتەپتەردىڭ قۇرىلىسى بەلسەندى جۇرگىزىلۋدە. كوشەنى جارىقتاندىرۋ بويىنشا جوبالار ىسكە اسىرىلىپ، قوعامدىق كولىك تۇجىرىمداماسى ەنگىزىلۋدە. قالادا شاعىن جانە ورتا بيزنەس سۋبەكتىلەرىن دامىتۋ ءۇشىن بارلىق جاعدايلار جاسالىپ وتىر. بۇگىنگى كۇنى وتاندىق كومپانيالار مەن جەر قويناۋىن پايدالانۋشىلاردىڭ الەۋمەتتىك جاۋاپكەرشىلىگىنىڭ ارقاسىندا قالا كۇن سايىن كوركەيىپ كەلەدى. اتىراۋلىق بارشا تۇرعىنداردى قالا كۇنىمەن قۇتتىقتايمىن جانە سىزدەرگە جانە وتباسىلارىڭىزعا دەنساۋلىق پەن باقىت تىلەيمىن، -دەدى اليمۇحاممەد قۇتتۇمۇرات-ۇلى.
سونىمەن قاتار ، وبلىس ورتالىعىندا الەۋمەتتىك جانە قايىرىمدىلىق جوبالاردى جۇزەگە اسىراتىن دەمەۋشى كومپانيالار مەن مەسەنات كاسىپكەرلەر ماراپاتتالدى. ەلباسىنىڭ "بولاشاقكا باعدار: رۋحاني جاڭعىرۋ" باعدارلامالىق ماقالاسىن جۇزەگە اسىرۋ اياسىندا كاسىپكەر يبراگيم اقدراشيەۆ، دەپۋتات الىبەك سەمعالييەۆ، "ءومىر گ ۇلى" ءانسامبلىنىڭ جەتەكشىسى تانىش جاكۋپوۆا، "كتك جانە ك" كومپانياسىنىڭ جانە "Wheels brothers" موتوكلۋبىنىڭ وكىلدەرى ءتۇرلى نوميناسيالاردا ماراپاتتالدى.
كورەرمەندەر الدىندا ايماقتىڭ جەرگىلىكتى شىعارماشىلىق ۇجىمدارى، سونداي - اق، قازاقستاندىق جانە رەسەيلىك ەسترادا جۇلدىزدارى - ءمادينا ءسادۋاقاسوۆا، رايم مەن ارتۋر، Natan جانە MBand ونەر كورسەتتى. مەرەكە سوڭىندا 20 مىڭعا جۋىق كورەرمەن مۋزىكالىق وت شاشۋدى تاماشالادى.
