اقتوبەدە «جاسىل ەل» «Zhasyl el Awards» جاستار ەڭبەك جاساعى ماۋسىمىنىڭ سالتاناتتى تۇردە جابىلۋى ءوتتى. مۇندا ق ر قوعامدىق دامۋ مينيسترلىگىنىڭ، رەسپۋبليكالىق جاستار ۇيىمدارى مەن رەسەيلىك ستۋدەنتتەر جاساعىنىڭ ورتالىق شتابىنىڭ وكىلدەرى، سونىمەن قاتار رەسپۋبليكانىڭ بارلىق وڭىرلەرىنەن كەلگەن ەڭبەك جاساقتارىنىڭ ۇزدىك وكىلدەرى جينالدى.

شارانىڭ باستى ماقساتى - جاستاردىڭ بىرىگۋى جانە ولاردىڭ قوعامعا پايدالى ەڭبەككە دەگەن ءپوزيتيۆتى قارىم-قاتىناسى.

وبلىس اكىمى بەردبەك ساپاربايەۆ شارا قوناقتارىن جىلى قارسى الىپ، ۇيىمداستىرۋشىلارعا ەڭبەك ماۋسىمىنىڭ جابىلۋ سالتاناتىن اقتوبەدە وتكىزگەندەرىنە العىس ايتتى. ءىس-شارا ءۇشىن ەل پرەزيدەنتى كەلەسى جىلدى جاستار جىلى دەپ جاريالاعانى ەرەكشە ماڭىزدى بولدى.

- اقتوبەنى وسى شارانى وتكىزۋ ءۇشىن تاڭداعانى بەكەر ەمەس دەپ ويلايمىن. بۇل الدىمەن قاشاندا وزدەرىنىڭ بەلسەندىلىكتەرىمەن جانە پاتريوتتىق رۋحتارىمەن ەرەكشەلەنگەن اقتوبەلىك جاستاردىڭ ەڭبەگى. ءبىزدىڭ ۇل-قىزدارىمىز ەلباسى تاپسىرماسىن ورىنداي وتىرا ەل ومىرىنە تىكەلەي ات سالىسادى. نۇرسۇلتان نازاربايەۆ جاستاردى دامىتۋعا زور كوڭىل ءبولىپ، ءارقاشان ءسىزدىڭ باستامالدارىڭىزدى قولدايدى. ونىڭ باستى ماقساتى – قازاقستاندىق جاستار وزگە ەلدەردەگى قاتارلاستارىنان قالىسپاۋلارى كەرەك.

ول سونداي-اق، وسىدان 14 جىل بۇرىن ەلباسى باستاماسىنىڭ ارقاسىندا ستۋدەنتتىك ەڭبەك جاساقتارى جۇمىس جاساي باستاعانىن اتاپ ءوتتى. وسى جىلداردىڭ ىشىندە ولار ەلدى مەكەندەردى كوگالداندىرۋعا قاتىسىپ، نىساندار سالىپ، وزدەرىنىڭ تيىمدىلىكتەرىن دالەلدەدى. اقتوبە وبلىسىندا 2018 جىلدان باستاپ جاساقتار جۇمىسىن جىل بويعى ەتۋ شەشىمى قابىلدانعان بولاتىن.

- جاستار ەڭبەككە ەرتە ارالاسۋلارى كەرەك. ويتكەنى، قىز-جىگىتتەرگە ومىرلىك بەلەستەرگە جەتۋ ءۇشىن كومەكتەسەتىن – وسى ەڭبەك. سىزدەر – ەلىمىزدىڭ بولاشاعىسىزدار، لايىقتى ازامات بولىڭىزدار، سوندا عانا قازاقستاندى ۇلكەن بولاشاق كۇتەدى، - دەدى وبلىس اكىمى.

بۇدان كەيىن سالتاناتتى تۇردە ماراپاتتاۋ ءراسىمى باستالدى. «ۇزدىك شتاب»، «ۇزدىك جاساق»، «ونلاين-شتاب»، «ۇزدىك جوبا»، «Hero Jasyl el»، «ۇزدىك وقۋ ورنى»، «ۇزدىك جۇمىس بەرۋشى»، «جىل سەرپىنى»، «ۇزدىك جاۋىنگەر»، «ۇزدىك مادەني جاساق»، «ۇزدىك مەديا مامان»، «ۇزدىك كوماندير» سىندى 12 اتالىم بويىنشا ۇزدىكتەر انىقتالدى.

اقتوبەلىكتەر بىردەن ەكى اتالىممەن كوزگە ءتۇستى. بايىشيەۆ اتىنداعى ۋنيۆەرسيتەتتىڭ وكىلى ارتۋر ازييەۆ ۇزدىك كوماندير اتاندى. ول التى جىلدان بەرى «جاسىل ەل» جاستار جۇمىس توبىنىڭ كومانديرلەر اراسىنداعى جۇمىسىن ۇيىمداستىرۋعا جاۋاپ بەرەدى.

«جاسىل ەل» اقتوبە وبلىستىق شتابى «جىل سەرپىنى» اتاندى. بيىل ونىڭ قاتارىنا 6 مىڭعا جۋىق ادام كىردى. بۇل بۇكىل ەلدەگى ادامى ەڭ كوپ شتاب.

سونداي-اق، اقتوبەلىك سەكسەن ۇزدىك جاۋىنگەرگە استانا قالاسىنا جولداما بەرىلدى.

ەڭبەك ماۋسىمىنىڭ رەسپۋبليكالىق جابىلۋى اياسىندا «جاستار. ەكولوگيا. پاتريوتيزم» تاقىرىبىنا شەبەرلىك ساباقتارى ءوتىپ، «XXI عاسىردىڭ باسەكەگە قابىلەتتى جاستارى» اتتى ديالوگ الاڭى ۇيىمداستىرىلدى.

بۇدان باسقا، فورۋم قوناقتارىنا اقتوبە وبلىسىندا تۇسىرىلگەن جاستار تۋرالى فيلم تانىستىرىلدى. مەلودراما جانرىندا تۇسىرىلگەن «جاسا» كينولەنتاسىندا مەكتەپ جاسىنداعى بالانىڭ وتباسى جاعدايى جايلى باياندالادى.

مەرەكەنىڭ شارىقتاۋ شەگىندە ستۋدەنتتەر شىعارماشىلىق جانە مۋزىكالىق ونەرلەرىن كورسەتتى. كونسەرت «جاسىل ەل» جاساعىنىڭ انۇرانىمەن اياقتالدى.