الماتىدا «سپۋتنيك» ستاديونىن قايتا جاساعان سوڭ بالالاردىڭ «جاس قىران» اتتى وقۋ-جاتتىعۋ فۋتبول كەشەنى اشىلدى.

جاڭارعان ستاديون 800 كورەرمەنگە ارنالعان، شاتىرى كوز تارتادى، درەناجدى جۇيەلى الاڭ، فيفا سەرتيفيكاسيالاعان سوڭعى بۋىنداعى جاساندى يتالياندىق گازون بار. ورتالىقتا 500-دەن استام جاس فۋتبولشى جاتتىعا الادى، مۇندا 50 جاتتىقتىرۋشى جۇمىس ىستەيدى.

«مەن سەندەردى بۇگىنگى قۋانىشتى مەرەكەلەرىڭمەن قۇتتىقتايمىن. وسىنداي باستامالارعا العىس ايتامىن جانە قولداۋ بىلدىرەمىن. مۇنداي وڭ شارالاردىڭ بارلىعى مەملەكەت باسشىسىنىڭ سپورتى دامىتۋ جونىندەگى ساياساتىنىڭ ارقاسىندا جۇزەگە اسۋدا»، - دەپ اتاپ ءوتتى قازاقستان فۋتبول فەدەراسياسىنىڭ باسشىسى ادىلبەك جاقسىبەكوۆ.

ايتا كەتەرلىگى، جىل باسىنان بەرى الماتىلىق «مەنىڭ اۋلامداعى سپورت» جوباسى شەڭبەرىندە 18 مىڭنان استام بالا سپورتپەن اينالىسۋدا. جەكە سپورت ۇيىمدارىن تىكەلەي كومپەنساسيالاۋ بارىسىندا «باتىل بول» جوباسى قولعا الىندى، مۇندا تۇرمىسى تومەن وتباسىلاردىڭ بالالارى سپورتقا كەڭىنەن تارتىلۋدا.

«پرەزيدەنت قازاقستان حالقىنا جولداۋىندا سپورتتى دامىتۋعا ايرىقشا نازار اۋداردى جانە ەلىمىزدىڭ سپورت ينفراقۇرىلىمىن دامىتۋدىڭ وزەكتى جولدارىن بەلگىلەپ بەردى. ستاديوندى قايتادان كۇردەلى جوندەۋدەن وتكىزۋ ءۇشىن «جاس قىران» فۋتبول ورتالىعى اۋقىمدى جۇمىستار اتقاردى. وزدەرىڭىز بىلەسىزدەر،سپۋتنيكتىڭ ۇلكەن تاريحى بار، فۋتبولدىڭ وتاندىق جۇلدىزدارىنىڭ كوپشىلىگى وزدەرىنىڭ كاسىبي جولدارىن وسى جەردەن باستادى. مەن كەشەننىڭ جاس دارىنداردى تاربيەلەۋ ىسىنە تىڭ سەرپىن بەرەتىنىنە سەنىمدىمىن» ، - دەدى الماتى اكىمى باۋىرجان بايبەك.

قالا باسشىسى الماتى ۆەلوترەكىن رەكونسترۋكسيالاۋدىڭ اياقتالىپ قالعانىن، كەلەر جىلدان باستاپ 5 مىڭ ورىندى جەڭىل اتلەتيكا ستاديونىنىڭ قۇرىلىسى باستالاتىنىن ايتتى.

«باستى ماقسات بالالاردى سپورتقا كەڭىنەن تارتۋ، ولاردى ءوز ەلىنىڭ پاتريوتى ەتىپ تاربيەلەۋ، ال فۋتبول ءبىزدىڭ اتا-انالارىمىزعا قۋانىش اكەلەتىن، ءار وينالعان ماچ وڭ ەموسيا بەرەتىن بولسىن»، - دەدى ءوز كەزەگىندە بالالار مەن جاسوسپىرىمدەردىڭ «جاس قىران» قازاقستاندىق ليگاسىنىڭ پرەزيدەنتى بەرىك قانييەۆ.

ەسكە سالساق، مەملەكەت باسشىسى ءوز جولداۋىندا ۇكىمەت پەن اكىمدىكتەردىڭ نازارىن كەم دەگەندە 100 دەنەشىنىقتىرۋ-ساۋىقتاندىرۋ كەشەندەرىن سالۋعا اۋداردى جانە بۇرىننان بار سپورت نىساندارىن ءتيىمدى پايدالانۋدى نۇسقادى.

«جاس قىران» جاڭا فۋتبول اكادەمياسى 1964 جىلى اشىلعان سديۋشور №2 بازاسى نەگىزىندە جۇمىس ىستەيدى. بۇعان ەسكى «سپۋتنيك» ستاديونىن قايتا جاساۋ ارقىلى قولجەتتى. كەشەن الماتى اكىمدىگى مەن «جاس قىران» بالالار مەن جاسوسپىرىمدەردىڭ فۋتبول ورتالىعى» ج ش س مەملەكەتتىك-جەكە ارىپتەستىك ىنتىماعى ارقاسىندا ىسكە قوسىلدى.

كەشەننىڭ اشىلۋ سالتاناتىنا قازاقستان پرەمەر-مينيسترىنىڭ ورىنباسارى ەربولات دوسايەۆ، ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى قاتىستى.