قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ جولداۋىنا سۇيەنسەك، بەس الەۋمەتتىك باستاما وتاندىق بيزنەستى قولدايتىن بىردەن-بىر جول. بۇل تۋرالى ءماجىلىس دەپۋتاتى البەرت راۋ ايتتى.

«كوكتەمدەگى بەس الەۋمەتتىك باستاما مەن ەلباسىنىڭ بۇگىنگى كۇنگى جولداۋى ۇلكەن ماڭىزعا يە. نازاربايەۆ تا مۇنى انىق اتاپ ءوتتى: باستامانىڭ ءبارى دەرلىك قازاقستاندىقتاردىڭ باي-قۋاتتى ءومىر ءسۇرۋى ءۇشىن. الايدا مۇنىڭ ءبارى ەكونوميكامەن تىعىز بايلانىستى ەكەنىن ەستەن شىعارماۋىمىز ءتيىس»، - دەدى ول.

سول سەبەپتى ماجىلىسمەن ەلباسىنىڭ جولداۋى ايتىلعان كۇندى قازاقستاندىق بيزنەس، كاسىپورىن، وندىرىستەگى ەڭ قۋانىشتى كۇن ەكەنىن اتاپ ءوتتى. ءارى مەملەكەت باسشىسىنىڭ 5 الەۋمەتتىك باستامانى جۇزەگە اسىرۋ ءۇشىن 1،5 ترلن تەڭگەگە باعالاعانىن دا حاباردار ەتتى.

ايتا كەتەيىك، 5 قازان نۇرسۇلتان نازاربايەۆ جىل سايىنعى جولداۋىمەن قازاقستاندىقتاردىڭ الدىنا شىقتى. جولداۋىندا «قازاقستاندىقتاردىڭ ءال-اۋقاتىن ارتتىرۋ: تابىس پەن ءومىر ءسۇرۋ ساپاسىن كوتەرۋ» تاقىرىبىن قوزعادى.

بىرىنشىدەن، حالىق تابىسىنىڭ وسۋىنە اسا ءمان بەرۋ كەرەكتىگىن ەسكەردى. وسى ورايدا ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى، ياعني 28 مىڭنان 42 مىڭعا دەيىن ءوسىرۋدى، بيۋدجەتتىك مەكەمەلەردە جۇمىس ىستەيتىن 275 مىڭ قىزمەتكەردىڭ ەڭبەكاقىسىن 35 پايىزعا ءوسىرۋدى تاپسىردى. ءارى جاڭا جۇمىس ورىندارىنىڭ اشىلعانىن حابارلادى.

ەكىنشىدەن، ەكونوميكاداعى باسەكەلەستىكتى دامىتۋ جايىن ءارى تۇرعىن ۇي-كوممۋنالدىق شارۋاشىلىعى مەن تابيعي مونوپوليالار ءۇشىن بەلگىلەنگەن تاريفتەر سالاسىندا بەلگىلى ءبار ءتارتىپ ورناتۋدى تاپسىردى.

بۇعان قوسا، بيزنەس سالاسى، ەكسپورتقا باعىتتالعان يندۋستريالاندىرۋ ماسەلەسى، اگروونەركاسىپ كەشەنى، يننوۆاسيالىق جانە سەرۆيستىك سەكتورلاردى دامىتۋعا ەرەكشە كوڭىل ءبولۋدى تاپسىردى.

ۇكىمەتتىك نازارىنا تاعى مىنا ماسەلەردى ەرەكشە قاداپ ايتتى:

حالىقتىڭ تۇرمىس ساپاسىن ارتتىرۋ. وسىعان وراي تومەندەگىدەي تاپسىرمالار بەردى:

بىرىنشىدەن، 5 جىل ىشىندە ءبىلىم، عىلىم، دەنساۋلىق ساقتاۋ سالالارىنا جۇمسالاتىن قاراجاتتى ىشكى جالپى ءونىمنىڭ 10 پايىزىنا دەيىن جەتكىزۋ قاجەت؛

ەكىنشىدەن، مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋ؛

ۇشىنشىدەن، ورتا ءبىلىم بەرۋ جۇيەسىنە باسا نازار اۋدارۋ؛

تورتىنشىدەن، الداعى جىلى «پەداگوگ مارتەبەسى» تۋرالى زاڭ ازىرلەپ، مۇعالىمدەردىڭ قىزمەتىنە قۇرمەتپەن قاراۋ؛

بەسىنشىدەن، جوعارعى ءبىلىم بەرۋ ساپاسىنا ءمان بەرى ءارى مەديسينا سالاسىنا دا ايرىقشا نازار اۋدارىپ، ادام دەنساۋلىعىن ءبىرىنشى ورىنعا قويۋدى تاپسىردى.

ءارى ەلباسى ءومىر سۇرۋگە جايلى ورتا قالىپتاستىرۋ ماسەلەسىن دە ۇمىت قالدىرعان جوق. حالىققا ساپالى ءارى قولجەتىمدى تۇرعىن ءۇي قاراستىرۋ قاجەتتىگىن ايتتى. وسى ورايدا كوكتەمدە ەلباسىنىڭ باستاماسىمەن قولعا الىنعان 5 الەۋمەتتىك باستاما نەگىزىندە، «7-20-25» باعدارلاماسى جۇزەگە اسا باستاعان ەدى. الايدا ەلباسى حالىقتىڭ باعدارلاماعا قىزىعۋشىلىعى ازىن ايتىپ، شەنەۋنىكتەردى سىناپ، دەرەۋ شارا قولدانۋدى تاپسىردى.