الماتىدا اباي داڭعىلىن ۇزارتۋ كەزىندە قۇرىلىس الاڭىندا گاز قۇبىرىن اۋىستىرۋ جۇمىستارى اياقتالدى. ونداعى جوعارى قىسىمدى جەلىلەر تاعى دا ەكى مەترگە تەرەڭدەتىلدى. 

قۇرىلىس بارىسىندا ناۋرىزباي اۋدانىنىڭ 4 مىڭنان استام ابونەنتى گازدان اجىراتىلعان ەدى. جەرگىلىكتى تۇرعىندار كەلتىرىلگەن قولايسىزدىققا تۇسىنىستىكپەن قارادى.

«مەترو سالسا، ارينە، قولايلى بولار ەدى. اسىعا كۇتىپ ءجۇرمىز. كەيدە جارىقتى، كەيدە گازدى ءوشىرىپ تاستاپ ءجۇر، شىداۋعا تىرىسامىز»، - دەگەن قارت تۇرعىننىڭ ءسوزىن كەلەسى ءبىر تۇرعىن: «2-3 ساعات جارىقتى ءوشىردى، 2 كۇندەي گاز بولمادى. ءبىراق بارلىعىنا تۇسىنىستىكپەن قاراپ جاتىرمىز. ءۇيىمىزدىڭ جانىندا مەترو بولعانى وزىمىزگە دە ىڭعايلى»، - دەپ تولىقتىردى.

ال الاتاۋ اۋدانىنىڭ رىسقۇلوۆ داڭعىلىنداعى اقاۋى بار قۇبىرلاردى جوندەۋ جۇمىستارى شۇعىل تۇردە جۇرگىزىلدى. مامانداردىڭ ايتۋىنشا، مۇنداي شەشىم قابىلداماسا قىستىڭ كوزى قىراۋدا كوپتەگەن كەلەڭسىزدىكتەر تۋعىزار ەدى. گاز قۇبىرلارىن اۋىستىرۋ كەزىندە «شاڭىراق»، «وجەت» جانە «راحات» ىقشاماۋدانىنىڭ تۇرعىندارى كەزەڭ-كەزەڭىمەن كوگىلدىر وتىننان اجىراتىلدى. دەگەنمەن، كوممۋنالدىق قىزمەت وكىلدەرى جىل سوڭىنا دەيىن ەش تۇرعىننىڭ گازدان اجىراتىلمايتىنىن العا تارتتى.  

«الاتاۋ اۋدانىندا جوعارى قىسىمدى گاز قۇبىرىنىڭ كلاپانى جارىلىپ، ەكى كۇن بويى 8 مىڭنان استام ءۇي گازسىز وتىردى. اقاۋدى ورنىنا كەلتىرۋ جۇمىسىن «قازترانسگاز ايماق» مەكەمەسى جۇزەگە اسىردى. رەسەي فەدەراسياسىنان كلاپان تاپسىرىس بەرىلدى، ويتكەنى مۇنداي كلاپان قازاقستاندا جوق»، – دەپ ءتۇسىندىردى الماتى قالاسى ەنەرگەتيكا جانە كوممۋنالدىق شارۋاشىلىق باسقارماسىنىڭ باس مامانى ءابىل الديار.