الماتىداعى ەسكى ۇيلەردىڭ جارتىسى تۇركسىب اۋدانىندا ورنالاسقان. الداعى ۋاقىتتا ەكى قاباتتى 16 ءۇي سۇرىلسە، پايدالانۋعا بەرىلەتىن باسپانا سانى 4 ەسەگە كوبەيەدى. ال «وڭىرلەردى دامىتۋ-2020» باعدارلاماسى بويىنشا «جاس قانات» ىقشاماۋدانىندا 47 تۇرعىن ءۇي بوي كوتەردى. جىل اياعىنا دەيىن 90 وتباسى جاڭا پاتەردە قونىس تويىن تويلايدى.

الماتى قالاسىنىڭ تۇركسىب اۋدانىندا ەسكى ءۇيدى ءسۇرۋ باعدارلاماسى بويىنشا ناتيجەلى جۇمىستار اتقارىلىپ جاتىر دەدى اۋدان اكىمى. باعدارلامانى ىسكە اسىرۋ ءۇشىن اۋدان 4 اۋماققا بولىنگەن. وسى ارقىلى ءسۇرۋ مەن قۇرىلىس جۇمىستارى كەزەڭ-كەزەڭىمەن جۇرگىزىلەدى. ونىڭ العاشقىسى كەلەر جىلدىڭ ءبىرىنشى توقسانىندا باستالادى دەپ جوسپارلانىپ وتىر. كەزەكتە ەكىقاباتتى 16 ەسكى ءۇي تۇر. ولاردىڭ ورنىنا 800 پاتەردى قامتيتىن 40 جاڭا ءۇي بوي كوتەرەدى.

«بارلىق شارا كەلىسىم ارقىلى جۇرگىزىلەدى. كەلىسىم بولماسا سوت ارقىلى شەشىلەدى دە، ەسكى ۇيلەر سۇرىلەدى. ءقازىر ءتيىستى جۇمىستار ىستەلىپ جاتىر. جوبا بار، كەلەر جىلدىڭ ءبىرىنشى توقسانىندا، مەنىڭ ويىمشا، جاڭا ءۇيدىڭ قۇرىلىسى باستالادى»، – دەدى الماتى قالاسى تۇركسىب اۋدانىنىڭ اكىمى پاۆەل كۋلاگين.

اۋدان اكىمىنىڭ ايتۋىنشا تۇركسىبتەگى قوردالانعان ماسەلەلەردىڭ دەنى جاڭادان قوسىلعان اۋماقتاردا ەكەن. جارىقتاندىرۋ، گاز جۇرگىزۋ، ينفراقۇرىلىمدى جاقسارتۋ، زاڭسىز قۇرىلىستى جويۋ جۇمىستارى جۇرگىزىلۋدە. ءقازىردىڭ وزىندە 370 كوشەگە شام ورناتىلىپ، 3 جەراستى وتكەلى پايدالانۋعا بەرىلگەن. «الماتى-1» تەمىر جول ۆوكزالى الدىنداعى الاڭ دا كورىكتەندىرىلدى. ەكى اپتادان سوڭ قوعامدىق كولىكتەرگە ارنالىپ ايالدامالار قويىلادى. ال كەلەر جالى اۋدان تولىقتاي كوگىلدىر وتىنمەن قامتىلماق.

«جەكە تۇرعىن ءۇي سەكتورىندا بىرنەشە ۇيلەر كوگىلدىر وتىنمەن قامتىلۋى ءتيىس. ولاردىڭ دەنى ماگيسترالدى جەلىلەردەن الشاق ورنالاسقان. ولاردى بيىل قامتىپ ۇلگەرمەيمىز. ءبىراق كەلەر جىلدىڭ ءبىرىنشى جارتىسىندا اۋدانداعى بارلىق ۇيلەرگە گاز جۇرگىزىلەدى»، – دەدى پاۆەل كۋلاگين.

9 ايدىڭ كورسەتكىشى بويىنشا اۋداندا بارلىق سالادا وڭ ناتيجە بايقالعان. 30 ميلليارد تەڭگەگە جۋىق ينۆەستيسيا تارتىلىپ، شاعىن جانە ورتا بيزنەس مەكەمەلەرىنىڭ سانى 102 پايىزعا ارتىپتى. باس-اياعى 7 مىڭعا جۋىق كاسىپكەر پايدا كورۋدە. جىل باسىنان بەرى 3 مىڭ جاڭا جۇمىس ورنى اشىلعان. ولاردىڭ سانى جاڭا اۋەجاي تەرمينالى سالىنسا، تاعى ەسەلەنبەك.  

«ءقازىر جاڭا اۋەجاي تەرمينالىنىڭ سىزبالىق جۇمىستارىنا حالىقارالىق كونكۋرس جاريالاندى. جاقىن ارادا ءسىز بەن ءبىز سول جوبامەن تانىسامىز دەپ ويلايمىن. كوپشىلىك نازارىنا ۇسىنىلادى. ازىرلەنىپ جاتقان جوبا بويىنشا قازىرگى اۋەجايدىڭ وڭ جاعىندا بوس اۋماق تاڭدالىپ، ءتيىستى جۇمىستار جۇرگىزىلىپ جاتىر»، – دەدى الماتى قالاسى تۇركسىب اۋدانىنىڭ اكىمى.

اۋداندا جاڭا بالاباقشا، مۇگەدەكتەرگە ارنالعان پسيحونيەۆرولوگيالىق ينتەرنات ءۇيى جانە مەديسينالىق مەكەمەلەر سالىنىپ جاتىر. اۋلالاردى كورىكتەندىرۋ مەن ونىڭ قاۋىپسىزدىگىنە دە دەن قويىلۋدا. ءقازىر 4000 بەينەباقىلاۋ كامەرالارى ورناتىلعان.