الماتىلىقتاردىڭ كوممۋنالدىق قىزمەت اقىسىن تولەۋگە مەملەكەت جاردەمدەسپەك. ءبىراق ءبارى بىردەي ەمەس، تەك بەلگىلى ءبىر شارتتارعا ساي كەلەتىن جاندار عانا وسى قايىرىمدىلىقتىڭ قىزىعىن كورە الادى.
مۇنداي جاردەم 2500-گە جۋىق وتباسىعا بەرىلمەك. وسى ماقساتتا بيۋدجەتتەن 55 ميلليونعا تاياۋ تەڭگە بولىنگەن. كومەك كوممۋنالدىق شىعىن جانۇيا تابىسىنىڭ ون پايىزىنان اسقان جاعدايدا عانا جاسالادى.
«مىسالى، بەلگىلى ءبىر وتباسىنىڭ تابىسى 70 مىڭ تەڭگە بولسا، ءبىراق ول وتباسىنىڭ كوممۋنالدىق تولەمدەر شىعىنى 12 مىڭ تەڭگەنى قۇرايتىن بولسا، وسى تۇرعىن ءۇي كومەگىن الا الادى. ياعني، اتالعان وتباسىعا 5 مىڭ تەڭگە كولەمىندە تۇرعىن ءۇي كومەگى تاعايىندالادى»، – دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باس مامانى رۇستەم يسمايلوۆ.
اتالعان قولداۋعا يە بولۋ ءۇشىن تۇرمىسى تومەن وتباسىلار حالىققا قىزمەت كورسەتۋ ورتالىعىنا بارىپ، جەكە كۋالىگىنىڭ كوشىرمەسىن، مەكەنجايى مەن جۇمىس ورنى جونىندەگى انىقتامالاردى وتكىزۋى ءتيىس. سونىمەن قاتار، كوممۋنالدىق قىزمەتتەرگە تولەنگەن تۇبىرتەكتەردى كورسەتۋى قاجەت. وسى ۋاقىتقا دەيىن 2200-دەن اسا وتباسىعا 40 ميلليون تەڭگە شاماسىندا تۇرعىن ءۇي كومەگى تولەنگەن.
«تۇرعىن ءۇي كومەگىن الۋدا جىلىتۋ كەزەڭىندە ادامداردىڭ كوپ جۇگىنەتىنىن ەسكەرە كەتكەن ءجون. سوعان بايلانىستى ءبىزدىڭ باسقارما ماماندارىمەن، سونىمەن قاتار، اۋداندىق باسقارما بولىمدەرى ماماندارىمەن اقپاراتتىق تۇسىندىرمە جۇمىستارى جۇرگىزىلۋدە. سونىمەن قاتار، اۋداندىق باسقارما بولىمدەرى پاتەر يەلەرى كووپەراتيۆتەرىن جيناپ، وسى تۇرعىن ءۇي كومەگى بويىنشا تۇسىندىرمە جۇمىستارى جۇرگىزىلۋدە. ارى قاراي پاتەر يەلەرى كووپەراتيۆتەرى تۇرعىندارعا تۇسىندىرمە جۇمىستارىن جۇرگىزەدى»، – دەدى رۇستەم يسمايلوۆ.
