جىل سوڭىنا دەيىن 1،5 مىڭ الماتىلىق «نۇرلى جەر» باعدارلاماسىنىڭ شاراپاتىن كورەدى. 800-دەن استام پاتەرگە كونكۋرس اياقتالسا، قالعان 620 پاتەر بويىنشا وتىنىشتەردى قابىلداۋ قاراشا ايىندا باستالماق. ولاردىڭ دەنى «سايالى» ىقشاماۋدانىندا بەرىلەدى. 5 قاباتتى ۇيلەردەگى پاتەرلەردىڭ اۋماعى 29 بەن 84 شارشى مەتر ارالىعىندا.
«نۇرلى جەر» باعدارلاماسى بويىنشا باسپانالى بولۋ ءۇشىن ءۇي باعاسىنىڭ كەم دەگەندە، 20 پايىزىن جيناپ نەمەسە بىردەن دەپوزيتكە اۋدارۋ كەرەك. بەرىلەتىن نەسيەنىڭ جىلدىق مولشەرلەمەسى 5 پايىزدى قۇرايدى. ماسەلەن، باعاسى 6 ميلليون 300 مىڭ تەڭگە بولاتىن ءبىر بولمەلى پاتەردى ساتىپ الۋ ءۇشىن بانكتەگى دەپوزيتكە ميلليون 200 مىڭ جيناۋ جەتكىلىكتى. بۇل جاعدايدا نەسيە بويىنشا اي سايىنعى تولەم 52 مىڭ 500 تەڭگەگە تەڭ.
«2014 جىلى «تۇرعىنۇيقۇرىلىسجيناقبانكىنەن» دەپوزيت اشتىق. سودان سوڭ ءۇش جىلداي اقشامىزدى جينادىق. «نۇرلى جەر» باعدارلاماسى بويىنشا كونكۋرس بولىپ جاتقانىن ەستىدىك. «باسپانا.كز» سايتى ارقىلى ءوتىنىم بەردىك. بانكتەن حابارلاسىپ، وتكەنىمىزدى ايتتى. قۇجاتتارىمىزدى جيناپ، ءۇيىمىزدى الدىق. ءۇش اي بولدى تۇرىپ جاتقانىمىزعا. ۇيلەردىڭ ساپاسى جاقسى»، – دەيدى نۇراحمەت بەردىمۇراتوۆ.
«سايالى-2» ىقشاماۋدانىندا بوي كوتەرىپ جاتقان ۇيلەردىڭ قۇرىلىسى بىتۋگە جاقىن. قالا شەتىندە سالىنىپ جاتقان باسپانالار 10 بالدىق ءزىلزالاعا توتەپ بەرەدى ءارى ءقاۋىپسىز جەردە ورنالاسقان دەيدى ماماندار. بيىل بوي كوتەرەتىن ۇيلەرگە 11 ميلليارد تەڭگە قارجى ءبولىنىپتى.
«وسى 2018 جىلى الماتىدا 121 ءۇي سالىنىپ جاتىر. 443 مىڭ شارشى مەتردى قۇرايتىن 6 433 پاتەر سالىنىپ جاتىر. سونىڭ 68ء-ى تاپسىرىلدى، قالعانى جەلتوقسان ايىنا دەيىن تاپسىرىلادى»، – دەدى الماتى قالاسى قۇرىلىس باسقارماسى باسشىسىنىڭ ورىنباسارى قۋاندىق ايتماعامبەتوۆ.
كەلەر جىلى «نۇرلى جەر» باعدارلاماسى بويىنشا العاباس ىقشاماۋدانىندا جاڭا ۇيلەر بوي كوتەرەتىن بولسا، 2020-2021 جىلدارعا قاراي الماتىدا «سايالى-3»، «سايالى-4» ىقشاماۋداندارى پايدا بولادى.
بىلتىر وسى باعدارلاما اياسىندا الاتاۋ اۋدانىندا 2 تۇرعىن ءۇي كەشەنى بوي كوتەرىپ، ونداعى 650 سالىمشى قونىس تويلارىن تويلادى. ال بيىل 886 پاتەر بويىنشا قۇجاتتاردى قابىلداۋ اياقتالىپتى. قاراشا ايىندا سايالى ىقشاماۋدانىندا 621 پاتەرگە وتىنىشتەر قابىلدانادى. جاۋاپتىلاردىڭ مالىمەتىنشە، ءبىر پاتەرگە 6 الماتىلىق ءۇمىتتى.
«نۇرلى جەر» باعدارلاماسىمەن ءۇي الۋ ءۇشىن قازاقستان ازاماتى بولۋى كەرەك، الماتى قالاسىندا كەم دەگەندە ەكى جىل تىركەۋدە بولۋى ءتيىس. جانە ءوزىنىڭ، وتباسى مۇشەلەرىنىڭ اتىندا ءۇي بولماۋى قاجەت. سوڭعى بەس جىل ىشىندە قازاقستان بويىنشا تەكسەرىلەدى. سونداي-اق، ءوزىنىڭ نەسيە تولەۋ قابىلەتتىلىگىن دالەلدەۋ قاجەت. وسى ءتورت تالاپقا سايكەس كەلگەن ادام مەملەكەتتىك «نۇرلى جەر» باعدارلاماسى بويىنشا ءۇي الا الادى»، – دەپ ءتۇسىندىرىپ ءوتتى «تۇرعىنۇيقۇرىلىسجيناقبانكى» اق الماتى قالاسى بويىنشا تۇتىنۋشىلارمەن جۇمىس جۇرگىزۋ ءبولىمىنىڭ باسشىسى داناگۇل ءتۇسىپوۆا.
ال «نۇرلى جەر» باعدارلاماسىنىڭ تالاپتارىنا ساي كەلمەي نەمەسە ءوزى مەن وتباسى مۇشەلەرىندە جىلجىمايتىن مۇلىك بولسا، «تۇرعىنۇيقۇرىلىسجيناقبانكىنىڭ» باعدارلاماسىنا قاتىسۋعا مۇمكىندىك بار. «ءوز ءۇيىم» جوباسى بويىنشا، پاتەر قۇنىنىڭ 20 پايىزىن جيناساڭىز، جىلدىق مولشەرلەمەسى 7 پايىزبەن باسپانا الا الاسىز.
