الماتىدا جاستار سلەتى ءوتىپ جاتىر. ەرىكتىلەردەن قۇرالعان ستۋدەنتتەردىڭ رەسپۋبليكالىق سلەتىنە 17 ايماقتان جۇزدەن اسا دەلەگاسيا كەلگەن. ولار الداعى ءتورت كۇن قاتارىنان ءتۇرلى سەمينارلارعا قاتىسىپ، ترەنينگتەر بارىسىندا تاجىريبە جيناقتايدى.
شارانىڭ سالتاناتتى اشىلۋى بارىسىندا ەرىكتى تۇردە ءتۇرلى جۇمىستارعا بەلسەنە ارالاسقان جاستار ماراپاتتالدى. جالپى، ەلىمىزدەگى ەرىكتىلەردىڭ ارقاسىندا اۋقىمدى شارالار وتكىزىلىپ كەلەدى. ماسەلەن، وسىدان جەتى جىل بۇرىن الماتىدا وتكەن قىسقى ازيا ويىندارىندا، ستۋدەنتتەر اراسىندا وتكەن ۋنيۆەرسيادا مەن ەحرو سىندى ءىرى-ىرى شارالارعا جاستار بەلسەنە ارالاستى.
«2016 جىلدىڭ جەلتوقسان ايىندا ۆولونتەرلار تۋرالى زاڭعا قول قويىلعان بولاتىن. سول زاڭدى ءتۇسىندىرۋ، سول باعىتتا قانداي قۇقىقتارى بار سونى ناسيحاتتاۋ باعىتىندا جۇمىستار اتقارىلادى. سونىمەن قاتار، بۇگىنگى كۇنى حالىقارالىق دونور، حالىقارالىق ۇيىمدار جانە حالىقارالىق تاجىريبە بويىنشا جۇمىستار اتقارىلۋدا. ءقازىر ۇلكەن ونلاين پلاتفورما جاساپ جاتىرمىز. وعان ەرىكتى تۇردە تىركەلۋ ارقىلى ءوزىڭ تۋرالى تولىققاندى اقپاراتتى قالدىرۋعا مۇمكىندىك بولادى»، – دەيدى ق ر قوعامدىق دامۋ مينيسترلىگى ازاماتتىق قوعام كوميتەتى ءتوراعاسىنىڭ ورىنباسارى باقىتجان نارىمبەتوۆ.
«قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى ەلباسىنىڭ بيىلعى جولداۋى دا تالقىلانىپ، الداعى «جاستار جىلىنىڭ» ماڭىزدىلىعى ءتۇسىندىرىلدى. جالپى، «ەرىكتىلەر» دەگەن ۇعىم رەسمي تۇردە ەلىمىزدە 1993 جىلدان باستاپ قولدانا باستاعانمەن، كەز كەلگەن ىسكە كومەك كورسەتۋ، اسارلاتۋ، ەل بولىپ ءىس ءبىتىرۋ سىندى ۇعىمدار قازاق حالقىنىڭ عۇرپىندا بۇرىننان بار. ستاتيستيكا بويىنشا ەلىمىزدە 22 مىڭنان استام ەرىكتى بار ەكەن. ءبىراق بۇل كورسەتكىش دامىعان ەلدەرمەن سالىستىرعاندا از. ماسەلەن، يرلانديا حالقىنىڭ 33%-ى ۆولونتەر بولسا، گەرمانيانىڭ ءاربىر ءۇشىنشى ازاماتى، جاپون حالقىنىڭ 4/1 بولىگى ۆولونتەرلىق جۇمىسقا بەلسەنە ارالاسادى ەكەن.
«كەلەسى جىل «جاستار جىلى» دەپ جاريالاندى. جاستاردىڭ پاتەر ماسەلەسىنە قاتىستى ەلباسى جارلىق شىعارىپ، قامقورلىق كورسەتىپ جاتىر. جالپى، جاستارعا كوپتەگەن جاعدايلار جاسالۋدا. جاستار ءونسىن، ءوسسىن، ءبىزدىڭ مەملەكەتىمىز العا قاراي جۇرە بەرسىن دەپ تىلەيمىز. سوندىقتان اۋىلداعى بالالار دا وسىندا ءبىلىم الىپ، اۋىلدى دا كوركەيتسىن»، – دەدى قوعامدىق كەڭەستىڭ مۇشەسى مايرا ساعىمبەكوۆا.
