قارتتار ايى شەڭبەرىندە مەدەۋ اۋدانى اكىمدىگىنىڭ قولداۋىمەن قاريالارعا قۇرمەت كورسەتىلدى.

ولاردىڭ قاتارىندا سوعىس ارداگەرلەرى، اۋداننىڭ قۇرمەتتى ازاماتتارى جانە زەينەتكەرلەر، جالپى، 100-گە جۋىق ازامات بار. شارا اياسىندا ەسترادا جۇلدىزدارى مەن اۋدان ونەرپازدارى اۋەلەتىپ ءان سالىپ، ۇلتتىق اسپاپتارمەن كۇي ورىندادى. قازىنالى قارتتارعا قۋانىش سىيلاعان شاراعا اۋدان اكىمى قاتىسىپ، ەسەلى ەڭبەكتەرىنە العىس ايتتى.  

«مەدەۋ اۋدانىنىڭ ارداگەرلەر كەڭەسىنىڭ ءتوراعاسى بولىپ سايلانعانىما 10 جىل بولىپ وتىر. مەن كەلگەندە ۇلى وتان سوعىسىنا قاتىسقان 526 اعا-اپامىز بار ەدى. ءقازىر سولاردىڭ 63ء-ى قالدى. مەنىڭ ايتايىن دەگەنىم، ءبىرىنشى وسى كىسىلەردى، اسىرەسە، ۇلى وتان سوعىسىندا تىلدا جۇمىس ىستەگەن قارتتاردى قۇتتىقتاپ، دەنساۋلىق، بالالارىنا باقىت تىلەگىم كەلەدى. ويتكەنى، بالالار باقىتتى بولسا، بۇلار ءالى دە ءومىر سۇرەدى. كوزدەرىنىڭ ءتىرى ۋاقىتىندا بارلىق قۇرمەتىمىزدى وسى اعا-اپالارىمىزعا كورسەتۋ كەرەك دەپ ويلايمىن»، – دەپ اعىنان جارىلدى مەدەۋ اۋدانى ارداگەرلەر كەڭەسىنىڭ ءتوراعاسى كيم سەرىكبايەۆ.