وسى جەكسەنبىدە الماتىنىڭ بىرنەشە كوشەلەرى ۋاقىتشا جابىق بولادى. قالادا العاش رەت جارتىلاي مارافون ۇيىمداستىرىلماق. سونىمەن قاتار، ءداستۇرلى ۆەلوشەرۋ وتپەك. اتالعان 2 شارا ءال-فارابي داڭعىلىنىڭ بويىندا وتەدى. بۇدان وزگە تاعى قانداي كوشەلەردە قوزعالىسقا شەكتەۋ قويىلادى؟ سپورتتىق شارالار قانشا ۋاقىتقا سوزىلادى؟
جارتىلاي مارافون الماتىدا العاش رەت وتكەلى وتىر. سوندىقتان ۇيىمداستىرۋشىلار شارانى ويداعىداي ەتىپ وتكىزۋ ءۇشىن تىڭعىلىقتى دايىندالعان ەكەن. مارافونعا قاتىسۋشىلار 21 شاقىرىمدى وڭاي ەڭسەرەدى دەگەن سەنىمدە. ويتكەنى جول بويىندا سپورتشىلار ءۇشىن شاتىرلار تىگىلمەك. وندا قاتىسۋشى سۋ ءىشىپ، تەز تاماقتانىپ الۋىنا بولادى.
«جول بويىنداعى شاتىرلاردى، باعىتتى كورسەتىپ تۇراتىن بەلگىلەردى ورناتۋ جۇمىستارى تۇندە جۇرگىزىلەدى. ياعني تۇنگى ساعات 12.00-دەن باستاپ تۇڭعىش پرەزيدەنت ساياباعىنان باستاپ ءال-فارابي داڭعىلىنىڭ كەيبىر بولىكتەرى جابىلادى. ماسەلەن، مارافونشىلار كوشەنىڭ سولتۇستىك بەتىمەن جۇگىرسە، وڭتۇستىگىندە كولىكتەر ەركىن قوزعالا بەرەدى. اباي داڭعىلىندا سولتۇستىك باعىتى اشىق بولادى. ءبىز جۇرگىزۋشىلەرگە دە ىڭعايسىزدىق تۋدىرماۋدىڭ جولدارىن قاراستىرۋدامىز. جارتىلاي مارافونعا قاتىسۋشىلارعا بارلىق جاعداي جاسالىپ جاتىر. شارا ويداعىداي وتەدى دەپ ويلايمىن»، – دەدى «الماتى مارافون» ديرەكتورى سالتانات قازىبايەۆا.
جارتىلاي مارافون تاڭعى ساعات 8-دە تۇڭعىش پرەزيدەنت ساياباعىنان باستالادى. سپورتشىلار تۇسكى 11 شاماسىندا ورتالىق ستاديوندا ورنالاسقان مارەگە كەلەدى دەپ جوسپارلانىپ وتىر. قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا، مارافونشىلار جۇگىرىپ وتەتىن ءال-فارابي داڭعىلى نازاربايەۆتان ساين كوشەسىنىڭ ارالىعى، ودان تومەن اباي داڭعىلىنا دەيىن كولىك قوزعالىسىنا تىيىم سالىنادى. بيىل جارتىلاي مارافون شاراسى ءداستۇرلى ۆەلوشەرۋمەن تۇسپا-تۇس كەلىپ وتىر. ۆەلوسيپەدشىلەر ادەتتەگىدەي تاڭعى ساعات 9.30-دا «نۇرلى تاۋ» بيزنەس ورتالىعىنان تۇڭعىش پرەزيدەنت پاركىنە دەيىن ءجۇرىپ وتەدى. ياعني، ءال-فارابي داڭعىلىنىڭ وسى ارالىعى شامامەن، ساعات 11:00-گە دەيىن جابىق بولادى.
«ۆەلوشەرۋ وتەتىن باعىت تولىعىمەن جابىلمايدى. ماسەلەن، سپورتشىلار جارىسى باستالعان سوڭ، سوڭعى قاتىسۋشى سەيفۋللين كوشەسىن ءجۇرىپ وتكەننەن كەيىن، سول ارالىقتى اشامىز. كەلەسى شاشكين، ماركوۆ كوشەلەرى دەپ جالعاسىپ كەتە بەرەدى. كوشەلەر كەزەكپەن كەزەك اشىلا بەرەدى. مۇنداي شەشىم جۇرگىزۋشىلەردىڭ دە ىڭعايلىلىعى ءۇشىن جاسالىپ وتىر»، – دەدى ۆەلوشەرۋ ۇيىمداستىرۋشىسى ايدوس باعاشيەۆ.
سپورتتىق شارالاردى ۇيىمداستىرۋشىلار تۇرعىندارعا باعىتتارىن الدىن الا جوسپارلاپ الۋلارىن ەسكەرتەدى. ايتا كەتەيىك، مارەدە بارلىق قاتىسۋشىلاردىڭ اراسىندا باعالى سىيلىقتار مەن ۆەلوسيپەدتەر ويناتىلادى. اتالمىش ۆەلوشەرۋ 2018 جىلى جوسپارلانعان 21 ۆەلوشەرۋدىڭ ون توعىزىنشىسى.
