الماتىدا سەنبى كۇنى وتەتىن جارمەڭكەگە 240 توننا ءونىم جەتكىزىلەدى.
ەرتەڭ قالادا اۋىلشارۋاشىلىق ونىمدەرىنىڭ جارمەڭكەسى وتەدى. الماتى وبلىسىنىڭ فەرمەرلەرى 240 توننانى قۇرايتىن تاۋارلارىن تومەن باعامەن ۇسىنادى.
«اتاكەنت» كورمە ورتالىعىنىڭ الدىنان ورىن تەپكەن جارمەڭكەدەن تۇرعىندار 1300 تەڭگەگە قوي ەتىن، 1500 تەڭگەگە سيىر ەتىن جانە 610 تەڭگەگە تاۋىق ەتىن ساتىپ الا الادى. سونداي-اق، ساتىپ الۋشىلارعا جەمىس-جيدەك، كوكونىس، ءسۇت، بالىق ونىمدەرىنىڭ كەڭ اسسورتيمەنتى ۇسىنىلادى. جارمەڭكە ءتورت اپتا بويى ءار سەنبىدە ۇيىمداستىرىلىپ وتىرادى.
«جىل باسىنان باستاپ 430-داي جارمەڭكە وتكىزىلدى. جارمەڭكەگە الماتى قالاسىنا جاقىن ورنالاسقان، الماتى وبلىسى اۋداندارىنىڭ تاۋار وندىرۋشىلەرى كەلەدى. قاراساي اۋدانى، جامبىل اۋدانى، ەڭبەكشىقازاق اۋدانى، تالعار اۋدانى، ىلە اۋدانى، ۇيعىر اۋدانى قالامىزداعى ءار جەردە ۇيىمداستىرىلىپ جاتقان جارمەڭكەلەردى تاۋارمەن قامتىپ وتىر»، – دەدى الماتى قالاسى اۋىل شارۋاشىلىعى باسقارماسىنىڭ ءبولىم باسشىسى قانات كاكەن ۇلى.
