الماتىداعى 300-گە جۋىق جەكەمەنشىك بالاباقشا بەينەباقىلاۋ كامەرالارىمەن جاراقتاندىرىلماعان. بۇل كاسىپكەرلەر اشقان 600 بالاباقشانىڭ جارتىسىن قۇراپ وتىر. ال مەملەكەتتىك بوبەكجايلاردا جاعداي ءبىرشاما جاقسىراق. ءبىراق قوسىمشا كامەرالاردى ساتىپ الۋعا ءبىلىم باسقارماسى ءتيىستى وتىنىشتەرىن دايىنداپ قويىپتى. بالالاردىڭ قاۋىپسىزدىگى قالاي شەشىلىپ جاتىر؟
الماتى قالاسىنداعى بۇل بالاباقشانىڭ اۋماعى الاقانعا سىيىپ كەتكەندەي. ولاي دەيتىنىمىز، مۇنداعى ءاربىر قيمىل بەينەباقىلاۋ كامەرالارىنىڭ نازارىنا بىردەن ىلىگەدى. 48 كامەرا جاتىن بولمەلەردە، توپتاردا، سپورت جانە مۋزىكا ساباعى كابينەتتەرىندە ورناتىلعان. ءبىراق مەڭگەرۋشىنىڭ ايتۋىنشا، بۇل دا جەتكىلىكسىز. ويتكەنى، بەينەباقىلاۋ كامەرالارى قىزمەتكەرلەردىڭ ءتارتىبى مەن اتا-انالارمەن بولاتىن كەي جاعدايلاردى شەشۋگە كومەكتەسەدى.
«سىرت جاقتا 8، ءىش جاقتا 24 جانە بالالار ۇيىقتايتىن بولمەلەردە 9 بەينەكامەرا ورناتىلعان. 2019 جىلى ءبىز بيۋدجەتكە ەنگىزدىك. ەندى اۋلا جاققا، كوشە تۇسقا جانە كىرەبەرىس ەسىكتەرگە تاعى بەينەكامەرالار ورناتامىز دەپ ۇمىتتەنىپ وتىرمىز»، – دەدى الماتى قالاسى №109 بالاباقشاسىنىڭ مەڭگەرۋشىسى ورىنباسار قۇرمانبايەۆ.
ءار بولمەدە ءبىر كامەرا ورناتىلعان. كەيدە ىستەن شىعىپ قالادى ەكەن. ولاردى وسىدان بەس جىل بۇرىن ورناتقان. بۇعان دەيىن قىزمەت كورسەتەتىن فيرما 3 جىل كولەمىندە تەگىن جاساپ بەرىپ كەلسە، ءقازىر بالاباقشا كامەرالاردىڭ قالتقىسىز جۇمىس ىستەپ تۇرۋى ءۇشىن ايىنا 50 مىڭ تەڭگە كولەمىندە تولەپ وتىر. ەلباسىنىڭ كەزەكتى جولداۋىنان كەيىن بالالار قاۋىپسىزدىگى ءۇشىن ەشتەڭەنى اياپ جاتقان جوق. ەندىگى كەزەك جەكەمەنشىك بالاباقشالاردا.
«ءبىز جەكەمەنشىك بالاباقشالاردىڭ بيۋدجەتىن قاراستىرا المايمىز. ءبىراق الماتى قالاسى ءبىلىم باسقارماسى مەڭگەرۋشىلەرمەن كەزدەسىپ، ەلباسى جولداۋىن سول كىسىلەرگە جەتكىزۋ جۇمىستارىن جۇرگىزبەكپىز. جەكەمەنشىك بالاباقشالاردا دا بالالار جۇرەتىن جەرلەردە بەينەكامەرالار ورناتىلۋى كەرەك»، – دەدى الماتى قالاسى ءبىلىم باسقارماسىنىڭ ءبولىم باسشىسى ءاليا ساعييەۆا.
الماتى قالاسىندا 781 بالاباقشا بولسا، ونىڭ 180ء-ى مەملەكەتتىك، قالعان 601ء-ى جەكەمەنشىك يەلىكتە. قالالىق ءبىلىم باسقارماسى 2019 جىلدىڭ باسىنا قاراي مەكتەپكە دەيىنگى بارلىق مەكەمەدە بەينەباقىلاۋ كامەراسى ماسەلەسى تولىقتاي شەشىلەتىنىن جەتكىزدى.
ايتا كەتەيىك، جىل سوڭىنا دەيىن الماتىدا تاعى ەكى بالاباقشا ءوز جۇمىسىن باستايدى. ولار الاتاۋ مەن ناۋرىزباي اۋدانىندا ورنالاسقان. ەلباسى جولداۋىنا سايكەس، 2021 جىلعا دەيىن مەكتەپتەر مەن بالاباقشالار بەينەباقىلاۋ كامەرالارىمەن 100 پايىز قامتىلۋى كەرەك. قازىرگى جاعداي بويىنشا بۇل كورسەتكىش مەكتەپتەردە 80 پايىزدى، بالاباقشالاردا 58 پايىزدى قۇراپ وتىر.
