الداعى جىلدارى الماتىدان كوزدى شارشاتاتىن قىزىلدى-جاسىلدى عيماراتتاردى كورمەۋىڭىز مۇمكىن. قالانىڭ ارحيتەكتۋرالىق كەلبەتى بىرەگەي ستيلگە كوشپەك. ەندى قالا كوشەلەرىن جارىقتاندىرۋ، كوگالداندىرۋ، عيماراتتاردىڭ قاسبەتى مەن جول جابىندارى بىركەلكى بولادى. 

ساۋلەت جانە قالا قۇرىلىسىن رەتتەۋ ادىستەمەسىن، ياعني ديزاين-كودتى وتكەن جىلى الماتى قالاسى ساۋلەت جانە قالا قۇرىلىسى باسقارماسى ازىرلەگەن. 40 بەتتىك ەرەجە مەن ۇسىنىمدار جيناعىنا قالاداعى 175 كوشە كىرەدى. پيلوتتىق رەجيمدە باستالعان جوبانىڭ ءقازىر ءبىرىنشى كەزەڭى اياقتالدى.  

«ديزاين-كود – قالانى قولايلى ءارى ءقاۋىپسىز ەتۋ ماقساتىندا عيمارات يەلەرى مەن قۇرىلىس سالۋشىلارعا ارنالعان ەرەجەلەردىڭ جيىنتىعى. كەيدە تۇرعىندار ۇلكەن قالانىڭ ۋ-شۋىنان الماتىمىزدىڭ قۇندىلىقتارىن سەزىنە بەرمەيدى. عيماراتتىڭ ارحيتەكتۋرالىق قۇندىلىعى جوعالعان سايىن، ادامداردىڭ كوزى شارشايدى. ناتيجەسىندە، تۇرعىندار قالا كوشەلەرىندە سەرۋەندەۋدى دوعارادى. ال قالا ساۋلەتىن بىركەلكىلەندىرۋ ارقىلى ءجۇرۋ مادەنيەتىن قالىپتاستىرامىز»، – دەدى الماتى قالاسى ساۋلەت جانە قالا قۇرىلىسى باسقارماسى باسشىسىنىڭ ورىنباسارى الماسحان احمەدجانوۆ.

عيماراتتىڭ قاسبەتىن ديزاين-كود بويىنشا العاشقىلاردىڭ ءبىرى بولىپ جاساعان كاسىپكەر – ءاشىم تويلىبايەۆ. ارباتتا ورنالاسقان مىنا عيماراتتىڭ قۇرىلىسى وتكەن جىلى باستالىپ، تۇگەلدەي ديزاين-كود تالاپتارىنا ساي سالىنعان. جاقىندا ىشكى ارلەۋ جۇمىستارى اياقتالسا، مۇندا حالىقارالىق بانك اشىلماق. اينەكتەن جاسالعان بەسقاباتتى عيماراتتىڭ سىرتقى كەلبەتى قازىردەن-اق تۇرعىنداردىڭ كوڭىلىنەن شىعۋدا دەيدى كاسىپكەر.

«ارباتتا» جوندەۋ جۇمىستارى باستالعان كەزدە، ءبىز دە مىنا عيماراتتى قاتار باستاپ ەدىك. سول كەزدە عيماراتتى بارىنشا «ارباتپەن» ۇليەستىرۋگە تىرىستىق. بارلىعى ديزاين-كودپەن شىقتى. بىزگە قويىلعان تالاپتار ۇدەسىنەن ەش قيىندىقسىز شىعا بىلدىك. قالا اكىمدىگى تاراپىنان دا قولداۋ بولدى»، – دە»ءدى كاسىپكەر ءاشىم تويلىبايەۆ.

الماتىنى ديزاين-كود بويىنشا بىركەلكىلەندىرۋ جۇمىستارى ازىرگە تەك قالانىڭ ورتالىق بولىگىندە عانا اياقتالعان. بۇل باعىتتاعى جۇمىستار 2019 جىلدىڭ اياعىنا دەيىن جالعاسىپ، مەگاپوليس تۇگەلدەي كەزەڭ-كەزەڭىمەن قامتىلاتىن بولادى.

ەندى كاسىپكەرلەر جاڭعىرتۋ جۇمىستارىن جاسار كەزدە ديزاين جۇمىستارىنا ۋاقىت كەتىرمەيدى. باسقارما سايتىنا كىرىپ قاجەتتى كوشەنى كورسەتسە بولعانى، قۇرىلىسقا كەرەك ماتەريالدار مەن تۇستەردىڭ دايىن نۇسقالارى شىعا كەلەدى. كوشەلەرگە قاتىستى دا ءدال سولاي.

«قالاداعى تيپتىك ۇيلەردىڭ بارلىعىنا ديزاين-كودتار جاسالعان. جانە ولار جىل سايىن جاڭا تەحنولوگيالارمەن جانە ارحيتەكتۋرالىق شەشىمدەرمەن تولىعىپ وتىرادى. وندا ۆەلوسيپەد جولدارىن، اعاشتاردى جانە كوشە جيھازدارىن ورنالاستىرۋ ستاندارتتارى دا ەسكەرىلەدى. بۇل بارلىق ۇيلەر بىردەي بولادى دەگەن ءسوز ەمەس. تەك ولاردىڭ ساۋلەتى بىركەلكى ستيلدە بولادى»، – دەدى الماسحان احمەدجانوۆ.

جاۋاپتى باسقارما باسشىلىعىنىڭ ايتۋىنشا، بيىل ەلىمىزدەگى «ساۋلەت، قالا قۇرىلىسى جانە قۇرىلىس قىزمەتى تۋرالى زاڭعا» قالالارعا ءبىرىڭعاي ارحيتەكتۋرالىق ستيل قالىپتاستىرۋ شارتى ەنگىزىلگەن. ياعني، الداعى جىلدارى الماتىنىڭ ىزىمەن ەلىمىزدەگى بارلىق قالالاردىڭ كەلبەتى بىركەلكى ستيلگە كوشۋى مۇمكىن.