الماتى قالاسىنىڭ ءماسليحاتى ءۇش دەپۋتاتپەن تولىقتى. ولار بوساپ قالعان ورىندارعا تالاسقان بولاتىن. كانديداتتاردى سايلاۋ 40 ۋچاسكەدە وتكىزىلدى.

سايلاۋعا جەتىسۋ جانە تۇركسىب اۋداندارىنىڭ 22 مىڭنان استام حالقى قاتىستى. ناۋقانعا جالپى سانى 9 ادام، ياعني ءار وكرۋگتەن 3 كانديداتتان تالاسقا ءتۇستى. سايلاۋدىڭ ناتيجەسىندە، №25 وكرۋگتەن اسحات شىلىكبايەۆ، ال №34 وكرۋگتەن گۇلناس احمەتوۆا جانە №36 وكرۋگتەن ميحايل گراچيەۆ ءماسليحات دەپۋتتاتتارى بولىپ سايلاندى. ايتا كەتەيىك، سايلانعان دەپۋتتاتتار جوعارى ءبىلىمدى، باسشى لاۋازىمدارىندا قىزمەت ەتەدى. ال قالعاندارى 5 پايىزدان جوعارى داۋىس جيناعاندىقتان سايلاۋ جارناسىن قايتارىپ الۋعا قۇقىلى.  

«داۋىس بەرۋدىڭ قورىتىندىسى بويىنشا مىنانداي ناتيجە بولدى. №25 وكرۋگ بويىنشا شىلىكبايەۆ اسحات قاشقىنباي ۇلى 70،4 پايىز داۋىس جينادى. وسىمەن ول سايلاۋدا جەڭىسكە جەتىپ، دەپۋتات اتاندى. ال №34 وكرۋگ بويىنشا احمەتوۆا گۇلناس كەنجەتاي قىزى 73،3 پايىز داۋىس جيناسا، №36 وكرۋگتەن گراچيەۆ ميحايل ۆلاديميروۆيچ 72،8 پايىز داۋىسقا يە بولدى. وسىلايشا، كوشباسشىلار انىقتالىپ، ولار جاقىن ارادا جۇمىسقا كىرىسەدى»، – دەدى الماتى قالالىق سايلاۋ كوميسسياسىنىڭ ءتورايىمى جاننا اسانوۆا.

ەسكە سالا كەتەيىك، الماتىدا 28 قازان كۇنى شىعىپ قالعان جەرگىلىكتى ءماسليحات دەپۋتاتتارى ورنىنا سايلاۋ وتكەن بولاتىن. سايلاۋ كەزىندە ەشقانداي زاڭبۇزۋشىلىق تىركەلگەن جوق. ساياسي دودانىڭ بارىسىن 300-دەي باقىلاۋشى مەن دەپۋتاتتىققا ۇمىتكەرلەردىڭ سەنىمدى وكىلدەرى باقىلادى. ال سايلاۋدا العاش رەت داۋىس بەرگەن 18 جاسقا تولعاندار مەن قارتتارعا سىيلىقتار ۇلەستىرىلدى. سونداي-اق، تىزىمگە ىلىنبەي قالعاندارعا ءار وكرۋگتە تۇرعان حالىققا قىزمەت كورسەتۋ وكىلدەرى كومەكتەستى.  

«تاڭ اتپاي ەرتە تۇرىپ، ءوزىمنىڭ كونستيتۋسيالىق قۇقىعىمدى نەگىزگە الا وتىرىپ، تاڭداۋ جاسادىم. داۋىس بەردىم. داۋىس بەرۋ ءاربىر قازاقستان ازاماتىنىڭ مىندەتى دەپ بىلەمىن. بۇگىنگى تۇرعىندار سايلاۋعا بەلسەنە اتسالىسۋدا. ەلىمىزدىڭ وركەندەۋى ءۇشىن، رۋحاني جاڭعىرۋى ءۇشىن ءاربىر 18-گە تولعان كامىلەتتىك جاسقا تولعان ازامات پەن ەڭكەيگەن قارتقا دەيىن داۋىس بەرۋدى مىندەت ساناۋى ءتيىس دەپ بىلەمىن»، – دەدى №84 جالپى ءبىلىم بەرەتىن مەكتەپتىڭ باستاۋىش سىنىپ ءمۇعالىمى ادەما كوكەكوۆا.

«ءبىزدىڭ جاعدايىمىز جاسالعان. بارلىعى جاقسى. ەندى وسى اۋدانىمىزعا بالالار وينايتىن الاڭ جاساپ بەرەمىن دەگەن ۋادە بەرىلدى، سول ۋادە ورىندالادى دەگەن سەنىم بار. كورشىلەرىم وتە جاقسى، ۇيىمشىل. ءبارىمىز بىرگە كەلدىك. داۋىس بەرىپ شىعىپ كەتتى ول كىسىلەر»، – دەدى زەينەتكەر ءمارزيا اتاجانوۆا.