ەڭ تومەنگى ەڭبەكاقىنى 1،5 ەسەگە، بيۋدجەتتىك سالا قىزمەتكەرلەرىنىڭ جالاقىسىن 35 پايىزعا ءوسىرۋ كەرەك. بيىلعى جولداۋداعى پرەزيدەنت جۇكتەگەن بۇل تاپسىرما حالقىمىزدىڭ 10 پايىزعا جۋىعىنىڭ ناقتى تابىسىن ارتتىرادى دەيدى الماتى اكىمى باۋىرجان بايبەك. بۇگىن مەگاپوليس باسشىسى قالا اكتيۆىمەن كەزدەسىپ، جولداۋ جۇكتەگەن مىندەتتەردى سارالاپ شىقتى.  

حالىقتىڭ تۇرمىس ساپاسىن ارتتىرۋ، الەۋمەتتىك سەكتورعا ءمان بەرۋ مەن قاۋىپسىزدىك ساپاسى بيىلعى جولداۋدا باستى نازارعا الىندى. حالىق دەنساۋلىعى دا ەڭ ماڭىزدى قۇندىلىق رەتىندە اتالىپ ءوتتى. ەلباسى 2020 جىلعا قاراي بۇكىل تۇرعىنداردىڭ ەلەكتروندى پاسپورتى جاسالىپ، كەزەكتەر مەن بيۋروكراتيانى جويۋدى  نىقتاپ تاپسىردى. ۇلت ساۋلىعىن ساقتاپ تۇرۋ ءۇشىن حالىقتى ساپالى ازىق-تۇلىك، كيىم-كەشەكپەن قامتاماسىز ەتۋدى، بۇل ورايدا وتاندىق ءوندىرىستى قولداپ، «بيزنەستىڭ جول كارتاسى» سىندى باعدارلاماردى ءالى دە نىسانادا ۇستاۋدى قاداپ ايتتى. باۋىرجان بايبەك جىل سوڭىنا دەيىن الماتىداعى بارلىق قالالىق ەمحانالار قاعازسىز جۇمىس ىستەۋ جۇيەسىنە كوشەدى دەدى. ال پرەزيدەنتتىڭ بيىلعى جولداۋىن «حالقىمىزدىڭ الەۋمەتتىك احۋالىن ەداۋىر ارتتىرۋعا باعىتتالعان تەڭدەسسىز اۋقىمدى قۇجات» دەپ اتاپ ءوتتى.

«ەلباسى جولداۋىندا قازاقستاندىقتاردىڭ ءال-اۋقاتىنىڭ ءوسۋى باستى باسىمدىققا يە بولۋى ءتيىس دەپ ەرەكشە اتاپ ءوتىپ، ەڭ تومەنگى ەڭبەكاقىنى 1،5 ەسەگە، بيۋدجەتتىك سالا قىزمەتكەرلەرىنىڭ جالاقىسىن 35 پايىزعا ءوسىرۋدى تاپسىردى. بۇل حالقىمىزدىڭ 10 پايىزعا جۋىعىنىڭ ناقتى تابىسىن ارتتىرىپ، ازاماتتاردىڭ قالىڭ جىگىنە ۇلكەن كومەك بولماق. ورىنسىز راسىمدەردى مەيلىنشە ازايتۋ، ىشكى ىستەر ورگاندارىن جاڭعىرتۋ جونىندەگى جول كارتاسىن ازىرلەۋ، سىبايلاس جەمقورلىقپەن كۇرەستى كۇشەيتۋ، مەملەكەتتىڭ اشىقتىق جانە ەسەپتىك قاعيداتتارىنا نەگىزدەلگەن قىزمەت جۇيەسىن جەتىلدىرە ءتۇسۋ – حالىقتىڭ سەنىمىن ارتتىرۋدىڭ بىردەن ءبىر جولى»، – دەدى الماتى قالاسىنىڭ اكىمى باۋىرجان بايبەك.

بۇدان بىلاي مەگاپوليستى تارتىمدى ەتۋگە دەن قويىلماق. الداعى 15 جىلدا قوعامدىق كولىكپەن جۇرەتىندەر سانىن 4 ەسەگە ءوسىرۋ مىندەتى تۇر. جۇرگىنشىلەر مەن ۆەلوسيپەدشىلەر جولىن ءۇش ەسەگە ارتتىرۋ قاجەت. ال جەكە ترانسپورت سانى بۇگىنگى دەڭگەيىندە ساقتالۋى قاجەت. ءقازىر الماتىدا 600 مىڭعا جۋىق اۆتوكولىك تىركەلگەن. ەگەر بۇل ساندى ساقتاماساق ەكولوگيانى قۇرتامىز دەيدى قالا باسشىسى.

«2035 جىلعا دەيىن ءبىز 700 مىڭ ادامدى ءبىلىم، دەنساۋلىق، IT، ونەر جانە تۋريزم سالالارىندا جۇمىسپەن قامتاماسىز ەتۋىمىز كەرەك. ول ءۇشىن ساپالى ءبىلىم مەن دەنساۋلىق ساقتاۋ سالاسى دامىعان قولايلى، يننوۆاسيالىق جانە ەكولوگيالىق ورتا قالىپتاستىرۋىمىز قاجەت»، – دەپ اتاپ ءوتتى باۋىرجان بايبەك.

ال قاشاندا باستى ماسەلە بولعان باسپانا جايى نازاردان تىس قالعان جوق. حالىققا قولايلى تۇرعىن ۇيلەر سالۋ دا نەگىزگى ماقساتتاردىڭ ءبىرى بولماق.

«الاتاۋ، ناۋرىزباي سياقتى شەت اۋدانداردىڭ دا تۇرعىندارى ءۇشىن بارلىق قىزمەت قولجەتىمدى بولۋى ءتيىس. دۇكەن، مەكتەپ، بالاباقشا، قاجەتتى دەمالىس ورىندارى، ءبارى-بارى ادامداردىڭ ءوزى تۇراتىن اۋماعىنان تابىلۋى كەرەك»، – دەدى الماتى اكىمى.

بيىلعى جولداۋدا بارشا ۇستازدارىنىڭ كوپتەن كۇتىپ جۇرگەن ماسەلەلەرى ءدوپ باسىپ ايتىلدى. ول – مۇعالىمدەرگە ءبىلىم بەرۋدەن باسقا مىندەتتەردىڭ جۇكتەلمەۋى، ولاردىڭ قوعامداعى ءرولى مەن ابىرويى. ۇستاز مارتەبەسىنىڭ زاڭمەن بەكىتىلەتىنى بارشا مۇعالىمدەر قاۋىمىن قۋانتتى.  

«ۇستازداردىڭ بەدەلىن كوتەرۋ شىنىندا دا قۋانتاتىن جاڭالىق بولدى. ءقازىر ۇستازدىڭ بەدەلى ءبىتتى دەسەك تە بولادى. ۇستاز بەدەلىنىڭ تومەندەگەنى سونشالىق، تىپتەن شەگىنە جەتتى. ۇستازعا قوعامنىڭ كوزقاراسى دا وزگەرىپ كەتتى. شىن مانىسىندە، تەرەڭ ءبىلىم الاتىنداي، ۇستازدىڭ سول ءبىلىمدى بەرۋگە جان-جاقتى مۇمكىندىگى بولاتىنداي جاعداي بولادى دەپ سەنەمىن»، – دەدى قازاقستاننىڭ ەڭبەك ەرى، قۇرمەتتى ۇستاز اياگۇل ميرازوۆا.

«بۇل جولداۋعا مەن تەك قانا حالىققا جولداۋ رەتىندە عانا قارامايمىن. مەن ونى قازاقستان حالقىنىڭ دامۋ ستراتەگياسى، ۇلت جوسپارى جانە مانيفەسى رەتىندە دە قاراستىرامىن. مەكتەپ پروبلەماسى، مۇعالىمدەردىڭ ستاتۋسى تۋرالى زاڭدى قابىلداۋ ماسەلەسى، جاستارعا ارنالعان باعدارلاما، «نۇرلى جول»، «نۇرلى جەر» باعدارلامالارىن ارى قاراي دامىتۋ، تۇرعىنداردى الەۋمەتتىك جاعىنان قورعاۋ ماسەلەلەرى جاقسى كوتەرىلىپ وتىر»، – دەدى م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ءۋاليحان قاليجان.

ەلباسى ءوز جولداۋىندا جاستار مەن وتباسى ينستيتۋتىن كەشەندى قولداۋ – مەملەكەتتىك ساياساتتىڭ باسىمدىعىنا اينالۋى قاجەت دەپ اتاپ ءوتتى. سونداي-اق، كەلەسى جىلدى «جاستار جىلى» دەپ جاريالاۋدى ۇسىندى. وسى ورايدا، الماتى اكىمى جاستاردى بىلىمگە باۋلۋ ءۇشىن الدىمەن ولارعا قولايلى جاعداي جاساپ، ستۋدەنتتەردى جاتاقحانامەن قامتۋ قاجەت دەدى.  

«ستۋدەنتتەردى جاتاقحانامەن قامتۋ بويىنشا جۇيەلى جۇمىس جۇرگىزىلۋدە. ەكەۋى سالىندى، جىل سوڭىنا دەيىن تاعى ەكۋىنىڭ قۇرىلىسى اياقتالادى. كەلەسى جىلدىڭ ورتاسىنا دەيىن 3 جاتاقحانا پايدالانۋعا بەرىلەدى. بۇل 3000 ستۋدەنتتى جاتاتىن ورىنمەن قامتيدى. بۇل دا ءبىلىم سالاسىنا وڭ اسەر ەتەرى انىق. الداعى ەكى جىلدا 19 مىڭ ورىنعا ارنالعان 37 جاتاقحانا سالىنادى. ءبىز بارلىعىنا جەر تاۋىپ قويدىق»، – دەدى الماتى قالاسىنىڭ اكىمى باۋىرجان بايبەك.

«وسى جولداۋ ارقىلى جاستاردىڭ بارلىق كوكەيكەستى ماسەلەلەرىن كوتەرە وتىرىپ  كەلەسى جىلدى جاستار جىلى دەپ جاريالاۋى ءبىز ءۇشىن ۇلكەن سىيلىق رەتىندە قابىلدادىق. جالپى، وسى باستامانى ءبىز 5 الەۋمەتتىك باستامانىڭ جالعاسى رەتىندە قابىلدادىق»، – دەدى ماگيسترانت گۇلجاينا انۋاربەكوۆا.

كەلەر جىلى ەلىمىزدە كەم دەگەندە، 100 سپورت كەشەنى سالىنۋى قاجەت. ەلباسى نۇرسۇلتان نازاربايەۆ حالىققا ارناعان جولداۋىندا وسىنداي تاپسىرما قويدى. سونىمەن قاتار، دەنە شىنىقتىرۋ جانە ساۋىقتىرۋ ورتالىقتارى بالالار مەن جاسوسپىرىمدەر ءۇشىن قولجەتىمدى بولۋى كەرەك دەدى. سپورت مايتالماندارى دا دەنى ساۋ ۇلت قانا ەلدىڭ ءال-اۋقاتىن ارتتىرۋعا جۇمىس ىستەي الادى دەگەن پىكىردە.

«ەلباسى 2018 جىلعى جولداۋىندا سپورتقا ەرەكشە توقتالىپ كەتتى. ول كىسىنىڭ 2030 جىلعا دەيىن قازاقستان حالقىنىڭ 30 پايىزى سپورتپەن شۇعىلدانۋى كەرەك دەگەن تاپسىرماسى بار. سول مەجەگە جاقىنداپ قالدىق»، – دەدى وليمپيادا چەمپيونى، بوكستان وليمپياداعا دايىندىق ورتالىعىنىڭ ديرەكتورى ەرماحان يبرايموۆ.

باۋىرجان بايبەك حالىقتى ساپالى مەديسينالىق قىزمەتپەن قامتۋ، ينفراقۇرىلىمدى دامىتۋ، ءبىلىم بەرۋ جانە بۇقارالىق سپورتتى دامىتۋ حاقىندا جاۋاپتى باسقارمالار مەن باسشىلارعا ناقتى تاپسىرمالار جۇكتەدى. الماتى اكتيۆى ەندى جولداۋ ايقىنداپ بەرگەن مىندەتتەردى جۇزەگە اسىرۋعا كىرىسپەك.