بايدىبەك اۋدانىندا ءوڭىر باسشىسى جانسەيىت تۇيمەبايەۆتىڭ قاتىسۋىمەن ءبىرقاتار سپورت نىساندارى ەل يگىلىگىنە بەرىلدى. اتاپ ايتقاندا، بۇگىن اۋداندا بۇعان دەيىن بولماعان جابىق تەننيس كورتى مەن جابىق ءجۇزۋ باسسەينى اشىلدى. وبلىس اكىمى سپورتقا دەن قويعان اۋداننىڭ ءبىر توپ جاستارىمەن ارنايى كەزدەسىپ، پىكىر الماستى.
"بۇرىن مۇنداي نىساندار، كوبىنەسە، قالالىق جەرلەردە بوي كوتەرىپ، شاھاردا ءومىر سۇرەتىن جاستار ءۇشىن عانا قول جەتىمدى بولاتىن. ەندى، مىنە، اۋىلدى جەرلەردە دە تەك سپورتتىڭ كۇرەس، بوكس تۇرلەرىنە عانا ەمەس، وزگە دە سيرەك شۇعىلداناتىن سپورت تۇرلەرىنە مەملەكەت تاراپىنان باسىمدىق بەرىلىپ كەلەدى. بۇل ەلباسىمىزدىڭ تاياۋدا جاريالاعان جولداۋىندا ايتىلعانداي سپورتقا تەرەڭىرەك ءمان بەرىپ، حالىقتىڭ سالاۋاتتى ءومىر سالتىمەن اينالىسۋى كەرەكتىگى تۋرالى ايتقان تاپسىرماسىنىڭ ءبىزدىڭ وڭىردە ورىندالىپ جاتقانىنىڭ ايعاعى دەپ بىلەم"، - دەدى ايماق باسشىسى.
ايتا كەتۋ كەرەك، اۋدان مەن اۋىلدى جەرلەردە زاماناۋي سپورت نىساندارىنىڭ كوپتەپ اشىلۋى تەگىن ەمەس. بايدىبەكتەن بۇعان دەيىن مارات مىقتىبەكوۆ (ازياداعى دزيۋدو فەدەراسياسىنىڭ پرەزيدەنتى)، ەركەبۇلان شىنالييەۆ (بوكستان 2008 جىلى بەيجىڭدە وتكەن وليمپيادانىڭ قولا مەدال يەگەرى)، قاسىمحان تولەنباي (قازاق كۇرەسىنەن الەم چەمپيونى) سىندى سپورتتاعى وعلاندار شىققانى بەلگىلى. بۇدان كەيىن دە اۋداندا بۇگىنگى پايدالانۋعا بەرىلگەن سپورت نىساندارىنىڭ ارقاسىندا اتالعان سايىپقىرانداردىڭ جولىن قۋىپ، جالعاۋشىلار كوپتەپ شىعىپ، اۋداننىڭ مەرەيىن ودان ءارى ۇستەم ەتەدى دەگەن سەنىم زور.
جالپى قۇنى 1،3 ملرد. تەڭگە بولاتىن شايان اۋىلىندا اشىلعان نىسانداردىڭ دەمەۋشىسى شەتەلدىك ينۆەستورلار. اتاپ ايتقاندا، قۇرىلىسى بىلتىر باستالعان سپورتتىق وبەكتىلەردىڭ تاپسىرىس بەرۋشى مەكەمەسى «International fund for Houbara Conservation» كورپوراتيۆتىك قورى. جابىق تەننيس كورتىندا ارنايى جۋىناتىن بولمەلەر قامتاماسىز ەتىلىپ، بارلىق جاعدايى جاسالسا، باسسەيندە ءبىر اۋىسىمدا 32 ادام ءجۇزۋ سپورتىمەن ماشىقتانا الادى.
وسىدان سوڭ، بۇل كۇنى سپورتتىڭ ۆولەيبول، باسكەتبول، فۋتبول، تەننيس تۇرلەرى مەن سپورت زالدارىنا ارنالعان اشىق الاڭشالار پايدالانۋعا بەرىلدى.
جالپى بۇگىنگى تاڭدا بايدىبەك اۋدانىندا بالالار مەن جاسوسپىرىمدەر سپورت مەكتەبى جۇمىس ىستەيدى. وندا سپورتتىڭ 10 تۇرىنەن ۆولەيبول، باسكەتبول، فۋتبول، ۇستەل تەننيسى، توعىزقۇمالاق، بوكس، قازاق كۇرەسى، دزيۋدو، گرەك-ريم، ەركىن كۇرەس بولىمدەرى بولاشاق چەمپيونداردى جاتتىقتىرۋدا. سپورت مەكتەبىندە قازىرگى تاڭدا 84 باپكەر 157 توپتا 1810 وقۋشىمەن جاتتىعۋ جۇمىستارىن جۇرگىزەدى. جىل باسىنان بەرى اۋداندا 97 سپورتتىق ءىس-شارا ۇيىمداستىرىلىپ، 9 مىڭعا جۋىق اۋدان تۇرعىنى قاتىسقان.
وبلىستان بارعان جۇمىسشى توپ اۋدانعا ساپارى اياسىندا بايدىبەك قاراشا ۇلى ەسكەرتكىشىنە گۇل قويۋ ءراسىمىن وتكىزدى.
وسىدان سوڭ، بايدىبەك اۋدانىنان شىققان ەلىمىزگە بەلگىلى ازاماتتاردىڭ باسىن قوسقان «شەجىرەلى شايان، بەرەكەلى بايدىبەك» فورۋمى ءوتتى. وندا تاريحقا باي اۋداننىڭ وتكەنى مەن كەلەشەگى تۋرالى باياندامالار وقىلىپ، بايدىبەكتىڭ الەۋمەتتىك-ەكونوميكالىق دامۋىنا ۇلەس قوسقان ءبىرقاتار ازاماتتار ماراپاتتالدى.
