تۇركىستان قالاسىنا «لاتىن نەگىزدى ءالىپبي مەن ەملە ەرەجەسى تۋرالى ناسيحات» جوباسى بويىنشا عالىمداردان قۇرالعان ناسيحاتتىق توپ كەلدى. بەلگىلى مەملەكەت جانە قوعام قايراتكەرى ورازكۇل اسانعازى قىزى، نازاربايەۆ ۋنيۆەرسيتەتىنىڭ پروفەسسورى جازيرا اعابەك قىزى باستاعان توپ اۋەلى تۇركىستان وبلىسى اكىمى جانسەيىت تۇيمەبايەۆپەن كەزدەستى. باسقوسۋدا ق ر مادەنيەت جانە سپورت مينيسترلىگى ءتىل ساياساتى كوميتەتى جانە ش.شاياحمەتوۆ اتىنداعى «ءتىل قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن وبلىستا وتەتىن سەمينارلار بارىسى باياندالدى.
كەيىن ناسيحاتتىق توپ تۇركىستان وبلىسىنىڭ وڭىرلىك كوممۋنيكاسيالار قىزمەتىندە وتكەن بريفينگتە لاتىن ءالىپبيىنىڭ ءمان-ماڭىزى مەن ەملە-ەرەجەسىنە كەڭىرەك توقتالدى.
«قازىرگى تاڭدا emle.kz سايتى جۇمىس ىستەيدى. وندا بارلىق ازاماتتار لاتىن الىپبيىمەن تانىسىپ، ۇسىنىس-تىلەكتەرىن جولداي الادى. لاتىن ءالىپبيى ءبىزدىڭ تاريحىمىزدا بولعان. سوندىقتان قايتا ورالۋ قيىنعا سوقپايدى. جاڭا جاساقتالعان لاتىن ءالىپبيى ارقىلى ءبىز سىرتتان ءسوز العاندا ءوزىمىزدىڭ ءتول دىبىستارىمىزعا رەتتەپ الاتىن بولامىز. بۇل بايتۇرسىنوۆ سىندى قايراتكەرلەرىمىزدىڭ باستاماسى»، - دەدى ورازكۇل اسانعازى قىزى.
باسپا ءسوز ءماسليحاتىندا عالىم جازيرا اعابەكوۆا جاڭا ءالىپبي 2019 جىلدان باستالىپ كەزەڭ-كەزەڭىمەن ساتىلاپ ەنگىزىلەتىنىن ايتتى.
«قازىرگى كيريلليسامەن ايتىلىپ جۇرگەن سوزدەر الداعى ۋاقىتتا ءتول دىبىستارىمىزبەن وقىلاتىن بولادى. ءبىز وسىلاي ۇلتتىق ارتيكۋلياسيامىزدى ساقتاۋىمىز قاجەت. الداعى ۋاقىتتا وقۋ ورتالىقتارى مەن ءتىل باسقارمالارى جانىنان وقىتۋ جانە بىلىكتىلىكتى ارتتىرۋ كۋرستارى اشىلىپ، مەكتەپ، جوعارى وقۋ ورىندارى مەن مەملەكەتتىك قىزمەت سالاسىندا 2025 جىلعا دەيىن ساتىلاپ ەنگىزىلەتىن بولادى. سونداي-اق، الداعى ۋاقىتتا جاڭا ەملە بويىنشا ورفوگرافيالىق، ورفوەپيالىق سوزدىكتەر جاسالادى»، - دەدى جازيرا اعابەك قىزى.
ايتا كەتەرلىگى، اعىمداعى جىلدىڭ 14 قاراشا كۇنى قازاقستان بويىنشا لاتىن الىپبيىندە ونلاين رەجيىمىندە ديكتانت جازىلىپ، بۇكىلحالىقتىق قولداۋ كورسەتىلمەك.
