2019 جىلعى 1 قاڭتاردان باستاپ مەملەكەت باسشىسىنىڭ قازاقستان حالقىنا جولداۋىندا بەرىلگەن تاپسىرماسى اياسىندا اقتوبە وبلىسىنىڭ 70 مىڭنان اسا تۇرعىنىنىڭ ايلىعى وسەدى.

بۇل تۋرالى وبلىس اكىمدىگىندە ءوڭىر باسشىسى بەردىبەك ساپاربايەۆتىڭ توراعالىعىمەن وتكەن جيىن بارىسىندا ءمالىم بولدى.

بۇدان بۇرىن حابارلانعانداي، پرەزيدەنتتىڭ ەڭ تومەن ەڭبەكاقى مولشەرىن 42،5 مىڭ تەڭگەگە دەيىن كوتەرۋ تۋرالى تاپسىرماسىن ءتيىمدى ورىنداۋ ءۇشىن وبلىستا ەكونوميكانىڭ بارلىق سەكتورلارىنداعى ەڭبەكاقىنى تولەۋگە قاتىستى اعىمداعى جاعدايىن تالدايتىن ارنايى جۇمىس توبى قۇرىلدى.

ناتيجەسىندە 42500 تەڭگەدەن از ايلىق الاتىن 70 مىڭ ادام انىقتالدى، ولاردىڭ 32 مىڭى بيۋدجەت سالاسىنىڭ قىزمەتكەرلەرى. ماسەلەن، ءبىلىم بەرۋ سالاسىندا 25 مىڭنان اسا قىزمەتكەردىڭ ەڭبەكاقىسى ورتاشا العاندا 48 مىڭ 600 تەڭگەگە دەيىن كوتەرىلەدى دەپ كۇتىلىپ وتىر. سونداي-اق، وبلىس بويىنشا 15 872 جەكەمەنشىك كومپانيا بار. ول جەرلەردە ايلىعى 42 500 تەڭگەدەن از 39 مىڭعا جۋىق ادام ەڭبەك ەتەدى.

باياندامانى تىڭداپ شىققان وبلىس اكىمى ەڭ تومەن ەڭبەكاقىنى كوتەرۋ تۋرالى باستاماعا كىرەتىن ازاماتتاردىڭ ناقتى سانىن انىقتاۋ جۇمىستارىن جالعاستىرۋدى تاپسىردى.

- بۇل وتە كۇردەلى سۇراق. ونى شەشۋ ءۇشىن فورمالدى تۇردە ارەكەت ەتپەۋ كەرەك. تەك ستاتيستيكالىق مالىمەتتەرگە عانا سۇيەنبەڭىزدەر، ءىستىڭ جاعدايىن سول جەردە تەكسەرىڭىزدەر. 1 قاڭتاردان باستاپ بارلىق جۇمىس بەرۋشىلەر ەلباسى تاپسىرماسىن ورىنداۋلارى قاجەت،-دەپ اتاپ ءوتتى بەردىبەك ساپاربايەۆ.