اقتوبە وبلىسىنىڭ اكىمى بەردىبەك ساپاربايەۆ كوممۋنالدى قىزمەتتەردىڭ، مەردىگەر مەكەمەلەردىڭ، توتەنشە جاعدايلار دەپارتامەنتىنىڭ كۇشتەرى مەن قۇرالدارىنىڭ الداعى قىسقى كەزەڭگە دايىندىعىن تەكسەردى.

ءوڭىر باسشىسى قار تازالايتىن جانە باسقا دا مامانداندىرىلعان تەحنيكالاردى قاراپ شىعىپ، جاۋاپتى مەملەكەتتىك ورگاندار مەن مەردىگەر كاسىپورىنداردىڭ باسشىلارىمەن كەزدەستى.

كۇن سايىن ءبىزدىڭ وبلىستىڭ اۋماعىندا 30 مىڭعا جۋىق اۆتوكولىك، سونىڭ ىشىندە جولاۋشىلار كولىگى ترانزيتپەن تاسىمالدايدى. بيىل قىس قارلى بولادى دەپ بولجانىپ وتىر، سوندىقتان الدىن الا دايىندالۋ كەرەك. سىزدەردىڭ مىندەتتەرىڭىز – كەدەرگىسىز جول ءجۇرۋدى قامتاماسىز ەتۋ، ال ەگەر جولدا ادامدار قيىندىققا تاپ بولسا – ولارعا قوناتىن جەر مەن تاماقتانۋلارىن ۇيىمداستىرۋ كەرەك،- دەپ اتاپ ءوتتى بەردىبەك ساپاربايەۆ.

ءوڭىر باسشىسى قالا بيلىگىنىڭ نازارىن تازالىقتى، قالا كوشەلەرىندەگى قاردىڭ ۋاقىتىلى جينالىپ، شىعارىلۋىن قامتاماسىز ەتۋگە اۋداردى. اقتوبە قالاسىندا قىسقى كەزەڭدە قار تازالاۋ جۇمىستارىمەن 11 كاسىپورىن اينالىساتىن بولادى. بارلىعى 220 بىرلىكتەن اسا ارنايى تەحنيكا، سونىڭ ىشىندە اۆتوگەيدەرلەر، قايىرماسى مەن ششەتكاسى بار متز-80 كولىكتەرى، جول-كومبيناسيالى ماشينالار، شنەكوروتورلار، قۇمشاشىراتقىشتار، جۇك تيەگىشتەر، جۇك تۇسىرگىش ماشينالار مەن تاعى باسقالار جۇمىلدىرىلعان. بارلىق جابدىق دايىن كۇيدە. 600 توننا تۇز، 1500 توننا تۇز قوسپاسى جانە 1000 توننا قۇممەن قامدانعان. تجد جەلىسى بويىنشا 139 جىلىتۋ بەكەتى مەن ءۇش تاس جول مەديسينالىق-قۇتقارۋ پۋنكتى، 600 بىرلىكتەن اسا تەحنيكا دايىندالعان، ونىڭ ىشىندەگى 44 بىرلىك تەحنيكانىڭ وتكىشتىگى جوعارى.