تۇركىستان وبلىسىنىڭ سايرام اۋدانىندا 9 جاستاعى بالانى زورلاماق بولعان كۇدىكتى ۇستالدى. قۇزىرلى ورگانداردىڭ دەرەگىنشە، 42 جاستاعى ەر ادام ىشىمدىك ءىشىپ كەلىپ، كامەلەت جاسقا تولماعان بالاعا سەكسۋالدىق سيپاتتاعى زورلىق-زومبىلىق ارەكەتتەر جاساپتى. وڭىردە ءدال وسىنداي وقيعا ءبىر اي بۇرىن عانا بولعان ەدى. ول كەزدە 56 جاستاعى ەر ادام كورشىسىنىڭ 7 جاسار قىزىن زورلاپ، قاماۋعا الىندى. ال ءبۇلدىرشىننىڭ اكە-شەشەسى سۇمدىق جاعداي بولعاندا جۇمىستا بولىپتى. مۇنداي كىسى جانىن تۇرشىكتىرەر قىلمىستاردىڭ وڭتۇستىك وڭىردە ءجيىلىپ كەتۋىنە نە سەبەپ؟ پەدوفيلدەرگە كاستراسيا ارقىلى جازا قولدانىلعانىمەن، ولار نەگە كوبەيىپ بارادى؟ بۇل تۋرالى ەۋرازيا ءبىرىنشى ارناسى حابارلايدى. 

قىلمىستىق وقيعالارمەن اسا اتى شىقپاعان اقسۋكەنت اۋىلىنداعى جەكە تۇرعىن ۇيلەردىڭ بىرىندە سۇمدىق وقيعا بولدى. مەكتەپتە وقيتىن 9 جاستاعى بالانى 42 جاستاعى اۋىل تۇرعىنى زورلاماق بولادى. وقيعانىڭ قالاي وربىگەنى تەرگەۋگە بايلانىستى قۇپيا ساقتالۋدا. ءبىراق ەر ادامنىڭ ىشىمدىككە تويىپ الىپ، كىشكەنتاي بالاعا تيىسپەك بولعانى اقپارات قۇرالدارىندا جاريالاندى.  

"ىشىمدىك ءىشىپ الىپ، كامەلەت جاسقا تولماعان بالانى زورلاماق بولعان ەر ادامعا قاتىستى قىلمىستىق كودەكستىڭ 24-بابى، ياعني "قىلمىسقا دايىندالۋ جانە قىلمىسقا وقتالۋ" جانە 121-بابى "سەكسۋالدىق سيپاتتاعى زورلىق-زومبىلىق ارەكەتتەر" بويىنشا قىلمىستىق ءىس قوزعالدى. كۇدىكتىنى ەكى ايعا قاماۋعا الۋ تۋرالى سانكسيا بەرىلدى”، – دەيدى سايرام اۋداندىق سوتىنىڭ سۋدياسى دينا تويجانوۆا.

وتكەن ايدا عانا شىمكەنتتە كورشىسىنىڭ 7 جاسار قىزىن زورلاعان 56 جاستاعى ەر ادام قاماۋعا الىنعان ەدى. جاسى الپىستى القىمداعان شىمكەنتتىك كورشىسىنىڭ 7 جاسار قىزىن ءوز ۇيىنە ەرتىپ اكەپ، ازعىندىق ارەكەتتەرىن جاساعان. پوليسياعا كۇدىكتى بۇل ىسكە اراققا ماس بولعان حالدە بارعانىن ايتىپ اقتالعىسى كەلىپتى. 

تاعى ءبىر وقيعا. تاپا-تال تۇستە 11 جاستاعى ۇل بالانى ۇستاپ الىپ، تۋرا پودەزدىڭ ىشىندە زورلاماق بولعان پەدوفيلدىڭ ارەكەتى كۇللى ەلدى  شوشىتقان ەدى. ەسىك الدىندا الاڭسىز ويناپ جۇرگەن جەتكىنشەكتى جەلكەلەپ، ءوزىنىڭ ازعىن قيالىنا ەرىك بەرمەك بولعان ەر ادامدى تۇرعىنداردىڭ ءبىرى كورىپ قالعان. ابىروي بولعاندا، كۇدىكتى از ۋاقىتتىڭ ىشىندە ارام ويىن جۇزەگە اسىرىپ ۇلگەرمەگەن.

♦شىمكەنتتە ەر ادام 11 جاستاعى بالانى زورلادى: پوليسيا پىكىر ءبىلدىردى

“بالا سول كەزدە ۇيگە كىرمەي اق-قويايىن، دوموفونمەن ايتا قويامىن دەپ دوموفوندى باسىپ تۇرعاندا اناۋ ارتىنان كەلەدى عوي. ءسويتىپ زورلىقپەن ىشكە كىرگىزەدى. ەسىكتى ىشىنەن جاۋىپ قويادى”، – دەيدى وقۋشىنىڭ اجەسى.

وڭىردە ايتۋعا اۋىز بارمايتىن وسى تەكتەس قىلمىستار ءجيىلىپ كەتۋىنە تاعى مىسال. ءدال وسى تۇركىستان وبلىسىندا ەلىمىزدە العاش رەت پەدوفيلدى حيميالىق جولمەن كاستراسيا جاسالدى. جالپى بيىل قىلمىسكەرلەردىڭ جىنىستىق قارىم-قاتىناسقا دەگەن قۇشتارلىعىن باسۋعا باعىتتالعان شارالارعا قازىنا قارجىسىنان 9،5 ميلليون تەڭگە  بولىنگەن ەدى. ءبىراق جازانىڭ جاڭا ءتۇرى كەساپاتتى ازايتىپ جاتقان جوق دەيدى ماماندار. سەبەبى اقپارات قۇرالدارىنىڭ بەتىندە ەكى كۇننىڭ بىرىندە پەدوفيلدەن زارداپ شەككەن بۇلدىرشىندەر تۋرالى اقپارات شىعىپ جاتادى. ودان بولەك بەيكۇنا جەتكىنشەكتىڭ تاعدىرىن ويرانداعان قىلمىسكەرگە ەگىلەتىن پرەپاراتتىڭ كۇشىن جوياتىن دارىلەر دە بار بولىپ شىقتى. 

“انتيدوتتار دەيدى. جاڭاعى حيميالىق كاستراسيادان كەيىن ونىڭ كۇشىن جويىپ تاستايتىن دارىلەر بار. مەنىڭ ويىمشا، بۇل دارىلەر رەسەپت ارقىلى ساتىلادى”، – دەيدى ۋرولوگ مارات سىيحىمبايەۆ.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، ءالى دۇنيەتانىمى قالىپتاسىپ ۇلگەرمەگەن بالا وزگە بىرەۋدىڭ تاراپىنان زورلىق ارەكەتتەن زارداپ شەكسە، ەسەيگەندە دەپرەسسياعا ءجيى ۇشىرايدى ەكەن. ءتىپتى، ەمى جوق پسيحيكالىق اۋرۋلارعا شالدىعادى. ەڭ قورقىنىشىتىسى كەيىن پەدوفيل بولىپ شىعۋى دا مۇمكىن.   

«بۇل  زورلىق زومبىلىقتىڭ باسىم بولىگىنە، زورلانۋ تۇرىنە بايلانىستى، جىنىستىق قاتىناس، ۇرىپ-سوعۋ بولسا،  ول پەدوفيلدىك ارەكەتكە دەيىن بارۋى مۇمكىن. ال ودان زورلىق-زومبىلىق شەكتەن شىقپاعاننىڭ وزىندە ول بولاشاق قىزمەتكەر دايىنداۋعا تولىعىمەن اسەر ەتەدى»، - دەيدى پسيحولوگ اقگۇل مولدابەكوۆا.

پەدوفيليا دۇنيەجۇزىلىك اۋرۋلار كلاسسيفيكاسياسىنا سەكسۋالدىق قالاۋدىڭ ءبىرى رەتىندە ەنگەن. پسيحولوگ ماماندار پەدوفيلدەردىڭ قۇربانى بولۋ دەگەن ونداعان ءتىپتى جيىرما جىل بۇرىن دا بولعانىن ايتادى. ياعني ولار وزدەرىنىڭ قۇربان بولعاندارىن اتا-انالارىنا ايتپاعان جانە ءتارتىپ ساقشىلارىنىڭ كومەگىنە جۇگىنبەگەن. ال قازىرگى ولارعا قاتىستى جازا حيميالىق كاستراسيا بيىل عانا كۇشىنە ەندى. ءبىراق ونىڭ قانشالىقتى ازعىنداردى جونگە سالعانىن ەشكىم ايتا المايدى.