اقوردادا قازاقستان پرەزيدەنتىنىڭ ءتوراعالىق ەتۋىمەن  ىشكى ىستەر ورگاندارى قىزمەتىن رەفورمالاۋعا قاتىستى ۇلكەن كەڭەس ءوتتى. وعان ەلباسى مەن ءتيىستى مينيسترلىكتەردىڭ جەتەكشىلەرى مەن ماماندارى قاتىستى.

كەڭەستە ءسوز العان مەملەكەت باسشىسى نۇرسۇلتان نازاربايەۆ تياناقتى جۇمىستاردىڭ ارقاسىندا ەلىمىزدە، اسىرەسە سوڭعى ءۇش جىلدا قىلمىس دەڭگەيى 17،5 پايىزعا قىسقارعانىن اتاپ ءوتتى.

–ادام قىلمىستىق، قاسكويلىك ارەكەتتەردەن قورعانۋ ءۇشىن ءبىرىنشى كەزەكتە پوليسياعا جۇگىنەدى. تاۋەلسىزدىك جىلدارى ىشىندە 779 قىزمەتكەر قازا تاۋىپ، شامامەن 2،5 مىڭى جاراقات الدى. مۇنى ەستەن شىعارماۋىمىز كەرەك. بۇعان قوسا، ىشكى ىستەر ورگاندارىنىڭ اعىمداعى جاعدايى قوعامنىڭ سۇرانىسىنا تولىق كولەمدە جاۋاپ بەرە المايدى، - دەدى مەملەكەت باسشىسى.

كەڭەستە نۇرسۇلتان نازاربايەۆ قۇقىق قورعاۋ قىزمەتكەرلەرىنىڭ ازاماتتارمەن اراداعى ءىسى ۇيلەسىمدى بولۋ قاجەتتىگىن قاداپ ايتتى. سوندىقتان دا حالىقتىڭ رەنىشىن تۋعىزباس ءۇشىن بۇگىنگى پوليسيا زامان تالابىنا ساي قىزمەت ەتۋى كەرەك.

–ىشكى ىستەر ورگاندارى جۇيەسىنىڭ قىزمەتى قوعامنىڭ سەنىمىن اقتاي المايدى، ازاماتتاردىڭ كەيىستىگىن تۋدىرۋدا. ادامدار وزدەرىن ءقاۋىپسىز سەزىنبەيدى. ونسىز ءبىز قازاقستاندىقتاردىڭ جوعارى ءومىر ساپاسىن قامتاماسىز ەتە المايمىز. سوندىقتان پوليسيانى رەفورمالاۋ ىسىنە شۇعىل كىرىسۋىمىز قاجەت، - دەدى ەلباسى نۇرسۇلتان نازاربايەۆ كەڭەستە سويلەگەن سوزىندە.

راسىندا پرەزيدەنت حالىققا ارناعان جولداۋىندا اتاپ كورسەتكەندەي، پوليسيا قىزمەتىنىڭ ساپاسى وتە جوعارى دارەجەدە بولۋى كەرەك. بۇل ورايدا ەلباسى پوليسياعا دەگەن سەنىم ارتىپ، قىزمەت تە جەدەل بولا تۇسەتىنىنە سەنىم ءبىلدىردى. ارينە پوليسيانىڭ جۇمىس ساپاسىن ارتتىرۋ ءۇشىن كەيبىر قۇرام وڭتايلاندىرىلۋى مۇمكىن.

– ارتىق نارسەنىڭ بارىنەن ارىلىپ، قىلمىسپەن كۇرەس ءجۇر­گىزۋ جانە قۇقىقتىق ءتارتىپتى ساقتاۋ ىسىنە ءمان بەرۋ كەرەك. قۇرىلىمدار وڭتاي­لان­دىرىلادى. سونىڭ ناتيجەسىندە ءبىر باسشىنىڭ قاراماعىندا ۇشەۋ ەمەس، بەس ادام بولادى. شتات سانى 10 پايىزعا قىسقارادى. وسى شارالار پوليسەيلەر سانىنىڭ 100 مىڭ ادامعا شاققاندا 471 پوليسەيدەن كەلۋىن 424-كە دەيىن تومەندەتۋگە جول اشتى. بۇل ەۋروپالىق ورتاشا دەڭگەيگە سايكەس كەلەدى. وسىعان وراي، 16 ميلليارد تەڭگە ۇنەمدەلمەك، – دەدى قازاقستان پرەزيدەنتى.

وسى جەردە ايتا كەتەتىن ءبىر نارسە، پرەزيدەنت ۇنەم­­دەلگەن قاراجاتتى قىزمەت­كەر­لەردىڭ ەڭبەكاقىسى مەن الەۋ­مەتتىك قامتۋ جۇيەسىن جاق­سار­تۋعا جۇمساۋدى تاپسىردى.

سونىمەن قاتار، ىشكى ىستەر ورگاندارى قىزمەتىن رەفورمالاۋعا قاتىستى ۇلكەن كەڭەستە ەلباسى تاراپىنان پوليسەيلەردىڭ جالاقىسىن ارتتىرۋعا قوسىمشا 21،4 ميلليارد تەڭگە بولىنەتىنى  ايتىلدى. تەك ءبىر-اق نارسە، وسى ورايدا جاسالىنىپ جاتقان رەفورماعا سايكەس، پوليسيا وكىلدەرى دە ءوز مىندەتىن ءمىنسىز اتقارۋى كەرەك.

ارينە، قۇقىق قورعاۋ ورگانى وكىلدەرىنىڭ جۇمىسى ساپالى بولۋى ءۇشىن ەڭ الدىمەن ولاردىڭ الەۋمەتتىك-تۇرمىستىق جاعدايىنىڭ جاقسارعانى دا ابزال. ول پوليسەيلەر تۇرعىن ۇيمەن قامتاماسىز ەتىلۋى قاجەت. بۇل ورايدا  پرەزيدەنت قوعامدى ءتارتىپتى ساقتاپ، قىلمىستىق ىسپەن كۇرەسەتىن قۇقىق قورعاۋ ورگاندارى وكىلدەرى جۇمىسىن بۇرىنعىدان دا كۇشەيتۋى قاجەت ەكەندىگىن ايتتى.

ەڭ باستى ماسەلە، «مەنىڭ پوليسيام – مەنى قورعاي ما؟ بۇگىنگى مازاسىزدانعان قوعامنىڭ باستى ساۋالى دا وسى. سوندىقتان نە ىستەۋمىز كەرەك؟ ول ءۇشىن ەڭ الدىمەن پوليسەيلەردىڭ وزدەرى ءتارتىپتى قاتاڭ ساقتاۋى قاجەت. ەگەر قۇقىق قورعاۋ ورگاندارى وكىلدەرى تاراپىنان قانداي دا ءبىر تەرىس قىلىق جاسالاتىن بولسا، وندا پوليسەيلەر بارلىق جەڭىلدىكتەرىنەن ايرىلىپ، جۇمىس ورنىنان بوساتىلادى. 

–بىزگە جاڭا فورماسيانىڭ پوليسەيلەرى قاجەت. كادرلاردى ىرىكتەۋ، دايارلاۋ جانە ىلگەرىلەتۋ جۇيەسى قايتا قاراستىرىلاتىن بولادى. ۆەدومستۆولىق ءبىلىم بەرۋ ءىسى ايتارلىقتاي وزگەرەدى. مامانداردى دايارلاۋ ساپاسى الەمدىك ستاندارتتارعا ساي كەلەتىن زاماناۋي پوليسيا اكادەميالارى قاجەت، – دەدى مەملەكەت باسشىسى.

 ەلباسى وسىعان بايلانىستى «ىشكى ىستەر مينيسترلىگىنە تيەسىلى 12 وقۋ ورنىنىڭ ۇزدىك بەسەۋى عانا قالاتىنىن ايتىپ، وعان بىلىكتى وقىتۋشىلار ىرىكتەلەدى»،- دەپ اتاپ كورسەتتى.

كەڭەس سوڭىندا پرەزيدەنت نازاربايەۆ جۇرتشىلىققا جاڭادان تانىستىرىلىپ جاتقان پوليسيا فورماسىن كورىپ، ءوز وي-ۇسىنىسىن ايتتى.

ەركىن قالدان