بوكستان ەرلەر اراسىنداعى قازاقستان چەمپيوناتى ماڭعىستاۋ جەرىندە العاش رەت ءوتتى. وعان ەلىمىزدىڭ 14 وبلىسى مەن 3 قالاسىنان 206- بوكسشى قاتىستى. تۋرنير قورىتىندىسىندا 2 التىن، 3 كۇمىس جانە 2 قولا مەدالمەن تۇركىستان وبلىسى – 1 ورىن، 1 التىن، 3 كۇمىس جانە 4 قولامەن ماڭعىستاۋ – 2 ورىن، 1 التىن، 2 كۇمىس جانە 3 قولا العان جامبىل وبلىسى – 3 ورىنعا تۇراقتادى.

چەمپيوناتقا الەمدىك ارەنالاردا قازاقستاننىڭ ابىرويىن اسقاقتاتىپ جۇرگەن قايرات ەرالييەۆ، ۆاسيليي ليەۆيت، ءابىلحان امانقۇل، اسلانبەك شىمبەرگەنوۆ، بەكداۋلەت يبراگيموۆ، ابىلايحان ءجۇسىپوۆ، تەمىرتاس ءجۇسىپوۆ، يلياس سۇلەيمەنوۆ، ەرىك ءالجانوۆ، اعايىندى تولتايەۆتار بار.

جابىلۋ سالتاناتىن ءسوز العان وبلىس اكىمى ەرالى توعجانوۆ ءتۋرنيردىڭ جوعارى دەڭگەيدە وتۋىنە ات سالىسىپ، قولداۋ كورسەتكەن قازاقستان بوكس فەدەراسياسىنىڭ باسشىلىعىنا العىسىن ايتىپ، جارىستىڭ قۇرمەتتى قوناعى ەرماحان ىبرايىموۆ، باقتيار ارتايەۆ، بولات ءجۇمادىلوۆ، باۋىرجان وسپانوۆ، مىرزاعالي ايتجانوۆ، مارات مازىمبايەۆ، مەرەي اقشالوۆ، ءبىرجان جاقىپ، نۇرجان كارىمجانوۆقا ماڭعىستاۋ حالقىنىڭ اتىنان ريزاشىلىعىن ءبىلدىردى. "سپورت سالاسى قاشان دا ەلباسىمىز نۇرسۇلتان ءابىش ۇلىنىڭ باستى نازارىندا. ءتىپتى حالىققا ارناعان ءار جولداۋىندا دا وتاندىق سپورتتى دامىتۋ جانە سالاۋاتتى ءومىر سالتىن ناسيحاتتاۋعا باسىمدىق بەرە وتىرىپ، الدىمىزعا ناقتى تاپسىرمالار قويعان بولاتىن. سەبەبى بۇگىنگى جاس سپورتشىلار – ەرتەڭگى ەلدىڭ مىقتى ازاماتتارى مەن ەل مەرەيىن اسقاقتاتاتىن چەمپيوندار. تىنىمسىز تەر توگىپ، ايانباي ەڭبەك ەتكەن ەلىمىزدىڭ سپورتشىلارىنىڭ تۋعان ەلىمىزدىڭ داڭقىن اسىرىپ، جاڭا بيىكتەردى باعىندىرا بەرۋلەرىنە شىن جۇرەكتەن تىلەكتەسپىن" دەدى ايماق باسشىسى.

سونىمەن قاتار، سالتاناتتى شارادا ەكى بىردەي وليمپيادا ويىندارى مەن الەم چەمپيوناتتارىنىڭ ەكى دۇركىن كۇمىس جۇلدەگەرى، ازيا ويىندارىنىڭ چەمپيونى، ادىلبەك نيازىمبەتوۆ ۇلكەن سپورتتاعى كارەراسىن اياقتاعان مالىمدەدى. كوپشىلىك الدىندا بوكسشىمىزعا قۇرمەت كورسەتىلىپ، حالىق زور قوشەمەتپەن شىعارىپ سالدى.

ماڭعىستاۋدىڭ تاعى ءبىر باتىر ۇلى، حالىقارالىق دارەجەدەگى سپورت شەبەرى، بوكستان ازيا چەمپيونى، الەم چەمپيوناتىنىڭ قولا جۇلدەگەرى، بىرنەشە دۇركىن ەل چەمپيونى بەرىك ابدراحمانوۆ تا بىلعارى قولعابىن شەگەگە ءىلىپ، شارشى الاڭداعى ورنىن كەيىنگى جاستارعا اماناتتادى.

ايتا كەتەيىك، تۋرنير جەڭىمپازدارى 2019 جىلى وتەتىن ازيا جانە الەم چەمپيوناتتارىنا قاتىسۋ مۇمكىندىگىنە يە بولدى. ال الەم چەمپيوناتىندا 2020 جىلعى توكيو وليمپياداسىنىڭ جولداماسى ساراپقا سالىنادى. ماڭعىستاۋلىق 8 جۇلدەگەر ۇلتتىق قۇراما ساپىنا ەنەدى. كەلەر جىلى اتالمىش سايىستارعا دايىندىقتى باستايدى.