14 قاراشا كۇنى رەسپۋبليكا بويىنشا جالپىحالىقتىق ديكتانت ءوتتى. «رۋحاني جاڭعىرۋ» تاقىرىبىنداعى ديكتانتتى ەلىمىزدىڭ 2 ميلليونعا جۋىق تۇرعىنى ءبىر مەزەتتە جازىپ شىقتى. 90 سوزدەن تۇراتىن ءماتىندى قاتىسۋشىلار جارتى ساعات كولەمىندە اياقتادى.

شارادان سوڭ ءار وڭىردە قۇرىلعان ارنايى جۇمىس توپتارى ديكتانتتىڭ ناتيجەسىن 5 جۇمىس كۇنى ىشىندە جاريالاۋى ءتيىس بولاتىن. سوعان وراي، وبلىستاعى جۇمىس توپتارى ماڭعىستاۋداعى ديكتانتتىڭ قورىتىندىسىن شىعاردى.

ماڭعىستاۋ وبلىسىنان جوسپارلانعانداي، 80 مىڭ ادام ديكتانتقا قاتىستى. 3273 – مەملەكەتتىك قىزمەتشى، 18953 – مەملەكەتتىك قىزمەت ۇسىناتىن ۇيىمدار قىزمەتكەرى، 21719 – ستۋدەنت، 21828 – وقۋشى، 14227 – باسقا دا قاتىسۋشىلار بار.

اۋدان، قالالاردان ديكتانتقا جاڭاوزەن قالاسىنان – 15178، اقتاۋ قالاسىنان – 9320، وبلىستىق ءبىلىم باسقارماسىنان – 18 000، قاراقيا اۋدانىنان – 5 مىڭنان اسا، بەينەۋ اۋدانىنان – 5400، ءتۇپقاراعاننان – 5000، مۇنايلىدان – 7000، ماڭعىستاۋ اۋدانىنان – 5000 ادام قاتىسقان.

تىلدەردى دامىتۋ جانە ونوماستيكا ءبولىمىنىڭ باسشىسى ايگۇل ىقىلاس قىزىنىڭ ايتۋىنشا، قاتىسۋشىلاردىڭ 40 312 – وتە جاقسى، 31 712 – جاقسى، 7976 – قاناعاتتانارلىق باعا العان.