ۇلت تاريحى مەن وركەنيەتىن ساناعا ءسىڭىرۋ - ۇلتتىق ءپاتريوتيزمدى دامىتىپ، ءوز ەلى مەن جەرىنە دەگەن قۇرمەت پەن ماقتانىش سەزىمىن قالىپتاستىرادى. پرەزيدەنتتىڭ «ۇلى دالانىڭ جەتى قىرى» اتتى ماقالاسىنا پىكىرىن بىلدىرگەن م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ءۋاليحان قاليجانوۆ وسىلاي ايتتى.

فيلولوگيا عىلىمدارىنىڭ دوكتورى ءۋاليحان قاليجانوۆتىڭ ايتۋىنشا، ەلباسىنىڭ بۇل ماقالاسى  قازاقستان قوعامىنىڭ بارلىق توپتارىنا اسەر ەتتى.

«نۇرسۇلتان نازاربايەۆ كەزىندە «رۋحى مىقتى حالىق قانا مىقتى مەملەكەت قۇرا الادى» دەپ جازعان ەدى. سول حالىق رۋحىن كوتەرۋ ءۇشىن، ەڭ الدىمەن، ءوزى سۇيگەن، ءوزىن سۇيگەن ۇلتىنىڭ تاريحىنا ءۇڭىلدى. 1994 جىلى جازعان «تاريح تولقىنىندا» اتتى كىتابىندا «ەل پرەزيدەنتى رەتىندە ءوز حالقىمنىڭ كەمىندە بەس مىڭ جىلدىق تاريحىن ءبىلۋىم كەرەك» دەپ ەدى. ءارى قازاق رۋحانياتى وركەنيەتىنىڭ نەگىزگى 12 جولىن اشىپ كورسەتتى. ارينە، بۇعان تاعى ءبىر ساياسي، تەڭدەسسىز شەشىم - قازاقستاننىڭ ەگەمەندىگىن جاريالاۋىن قوسايىق. سونداي-اق، ەگەمەن ەل قۇرۋداعى قازاقستان دامۋىنىڭ پرەزيدەنتتىك باسقارۋ جۇيەسى جانە نازاربايەۆ فەنومەنى بار»، - دەدى عالىم.

ساراپشىنىڭ ايتۋىنشا، مەملەكەت باسشىسى ۇلى دالا وركەنيەتىنىڭ جەتى قىرىن جۇزەگە اسىرۋ جولدارىن انىق كورسەتكەن.

«ەلباسى اتقا ءمىنۋ مادەنيەتىنە قاتىستى سوزبەن عانا ايتىپ قويماي، ونى ات ابزەلدەرىمەن، اسكەردىڭ كيگەن كيىمدەرىمەن ۇيلەستىرە زەرتتەۋ كەرەكتىگىن ايتتى. بۇل، ارناۋلى عىلىمي تىقىرىپقا سۇرانىپ وتىر. ۇلى دالاداعى ەجەلگى مەتاللۋرگيا دالا وركەنيەتىنىڭ تەحنولوگياسى بار ەكەندىگىن كورسەتتى. ەندەشە، ونى عىلىمي-تانىمدىق تۇرعىدان زەردەلەپ، حالىققا جەتكىزۋ مىندەتى تۇر. ەلباسى الەمدىك وركەنيەتتە ەرەكشە ورنى بار اڭ ءستيلىن ۇلتتىق بولمىس، كەڭىستىك پەن ۋاقىت ولشەمدەرىن ەسكەرە وتىرىپ باعامداۋعا شاقىرادى. التىن ادامنىڭ التىنمەن اپتالعان كيىمدەرى ەجەلگى شەبەرلەردىڭ التىن وڭدەۋ تەحنيكاسىن جاقسى مەڭگەرگەنىن اڭعارتادى. سونىمەن بىرگە بۇل جاڭالىق دالا وركەنيەتىنىڭ زور قۋاتى مەن ەستەتيكاسىن ايگىلەيتىن باي ميفولوگيانى پاش ەتتى. كۇمىس كەسەدەن تابىلعان جازۋ دا ءالى وقىلا قويعان جوق. وقىلعانمەن، ول عىلىمي توقتام رەتىندە مويىندالمادى. بۇل دا لينگۆيستەر الدىندا تۇرعان ۇلكەن مىندەت. تۇركى يمپەرياسىنىڭ اۋماعىن قامتىعان كونە جىبەك جولى جاھاندانۋ زامانىندا قانداي ترانسفورماسياعا ۇشىراپ وتىر؟ ونىڭ قازاقستان ەكونوميكاسىنىڭ دامۋىنا قانداي ۇلەس اكەلگەنىن سانا، ەكونوميكالىق، رۋحاني-مادەني تۇرعىدا ساراپتاۋ قاجەت.  بۇعان عالىمدار ءوز ءسوزىن ايتۋى كەرەك دەپ بىلەمىن»، - دەدى فيلولوگ.

ساراپشى ۇلت تاريحى مەن وركەنيەتىن ساناعا ءسىڭىرۋ ۇلتتىق ءپاتريوتيزمدى دامىتىپ، ءوز ۇلتىنا، ءوز مەملەكەتىنە دەگەن قۇرمەت پەن ماقتانىش سەزىمىن قالىپتاستىراتىنىن ايتتى.

«ەلباسىنىڭ ماقالاسى رۋحاني جاڭعىرۋدىڭ كەمەلدەنۋىن تەزدەتە تۇسەدى. ويتكەنى بۇل ماقالاداعى ويلارمەن تۇجىرىمدار «مادەني مۇرا»، «حالىق تاريح تولقىنىندا»، «بولاشاققا باعدار: رۋحاني جاڭعىرۋ» جوبالارىنىڭ زاڭدى جالعاسى بولىپ تابىلادى. - دەدى ول.

ەسكە سالايىق،  ق ر پرەزيدەنتى نۇرسۇلتان نازاربايەۆ «ۇلى دالانىڭ جەتى قىرى» اتتى ماقالاسىن جاريالاعان بولاتىن.