ماڭعىستاۋدا بالاباقشامەن قامتۋ 97 پايىزعا ارتتى

ماڭعىستاۋ وبلىستىق قازاقستان حالقى اسسامبلەياسىنىڭ ءححىى سەسسياسى وترىسىندا جاساعان بايانداماسىندا وبلىس اكىمى دەنساۋلىق، ءبىلىم، مادەنيەت، سپورت جانە الەۋمەتتىك سالا قىزمەتكەرلەرى مەن جاستار ءۇشىن جاسالعان يگى ىستەرگە توقتالىپ ءوتتى.

بيىل 3 پەن 6 جاس ارالىعىنداعى بالالاردى بالاباقشامەن قامتۋ كورسەتكىشى – 84%-تەن 97%-كە ارتقان (رك – 93،1%). كەلەسى جىلى بۇل كورسەتكىشتى 100%-كە جەتكىزۋ كوزدەلگەن.

وڭىردە اپاتتى جاعدايداعى مەكتەپتەر جوق. دەموگرافيالىق ءوسىمنىڭ جوعارىلىعىنا بايلانىستى ءۇش اۋىسىمدىق وقىتۋ ماسەلەسىن شەشۋ جولعا قويىلعان. وسى باعىتتا جاڭا وقۋ جىلىندا جالپى سىيىمدىلىعى 6300 ورىندىق 9 جاڭا مەكتەپ قولدانىسقا بەرىلدى.

تاعى 4 مەكتەپتىڭ (سىيىمدىلىعى 2200 ورىندىق) قۇرىلىسى 2019-2021 جىلدارى رەسپۋبليكالىق بيۋدجەتتەن قارجىلاندىرۋعا ۇسىنىلعان.

-وقۋشىلار كونتينگەنتىنىڭ جىل سايىن 6 مىڭعا ارتۋىن ەسەپكە الا وتىرىپ، 2019 جىلعا تاعى 14 مەكتەپ قۇرىلىسى رەسپۋبليكالىق بيۋدجەتتەن قارجىلىندىرۋعا قوسىمشا ۇسىنىلاتىن بولادى. الدىمىزدا تۇرعان وزەكتى ماسەلەنىڭ ءبىرى – ستۋدەنتتەردى جاتاقحانامەن قامتۋ. جالپى قاجەتتىلىك 2600 ورىن (كوللەدجدەر ءۇشىن – 1600 ورىندىق 5 جاتاقحانا، ۋنيۆەرسيتەت ءۇشىن – 1000 ورىندىق 2 جاتاقحانا)، ونىڭ ىشىندە وسى جىلدىڭ سوڭىنا دەيىن 550 ورىندىق 2 جاتاقحانا پايدالانۋعا بەرىلەدى (ەنەرگەتيكالىق كوللەدج – 200 ورىن، گۋمانيتارلىق كوللەدج – 350 ورىن)، - دەدى ايماق باسشىسى.

دەنساۋلىق ساقتاۋ سالاسىندا مەملەكەتتىك-جەكەمەنشىك ارىپتەستىك مەحانيزمىن كەڭىنەن قولدانۋ قولعا الىنعان. ماسەلەن جاڭاوزەن قالاسىنداعى گەمودياليز ورتالىعى، ماڭعىستاۋ وبلىستىق جانە بەينەۋ اۋداندىق اۋرۋحانالارىندا كومپيۋتەرلىك توموگراف ورناتۋ، دەنساۋلىق ساقتاۋ ۇيىمدارىندا ۋزي ورناتۋ.

-وبلىس ورتالىعىندا انا مەن بالا وڭىرلىك ورتالىعى قولدانىسقا بەرىلدى. كوپتەن شەشىمىن تاپپاي كەلگەن، قۇرىلىسى ۇزاققا سوزىلعان ونكولوگيالىق ورتالىقتىڭ قۇرىلىسى جەر قويناۋىن پايدالانۋشى كومپانيا قارجىسى ەسەبىنەن (NCOC – 7 ملرد.تەڭگە، مەردىگەر – ەۆروستروي) قازان ايىندا قايتادان باستالدى، - دەدى ەرالى لۇقپان ۇلى.