كەشە «دوستىق ۇيىندە» فيلوسوفيا، ساياساتتانۋ جانە ءدىنتانۋ ينستيتۋتىنىڭ ۇيىمداستىرۋىمەن «تاريحي سانانى جاڭعىرتۋ اياسىنداعى قازىرگى زامانعى گۋمانيتارلىق ءبىلىم مەن عىلىمنىڭ جاڭا كوكجيەكتەرى» اتتى حالىقارالىق عىلىمي-تاجىريبەلىك كونفەرەنسيا بولىپ ءوتتى. ەلباسىنىڭ «ۇلى دالانىڭ جەتى قىرى» باعدارلامالىق ماقالاسىن تالقىلاۋعا ارنالعان جيىن فيلوسوفيا، ساياساتتانۋ جانە ءدىنتانۋ ينستيتۋتىنىڭ 60 جىلدىعىنا وراي ۇيىمداستىرىلدى. باسقوسۋعا ءبىرقاتار قوعام قايراتكەرلەرى، جوعارى وقۋ ورىندارىنىڭ باسشىلارى، وتاندىق جانە شەتەلدىك عالىمدار قاتىستى، دەپ حابارلايدى Qamshy.kz اقپارات اگەنتتىگى الماتى اقشامى باسىلىمىنىڭ دەرەگىنە سۇيەنە وتىرىپ.
كونفەرەنسيا قازاقستاندىق الەۋمەتتىك عىلىمداردىڭ تاريحي جولىن، مەملەكەت پەن قوعام الدىندا تۇرعان مىندەتتەردى جۇزەگە اسىرۋ بويىنشا نەگىزگى ناتيجەلەر مەن بولاشاعىن زەردەلەۋ ماقساتىن كوزدەدى.
كونفەرەنسيا قازاقستاندىق فيلوسوفيا مەكتەبى: قوعامدىق سانانى جاڭعىرتۋدىڭ جاڭا كوكجيەكتەرى، قازاقستاننىڭ وزىندىك ەرەكشەلىگىن قالىپتاستىرۋداعى ساياساتتانۋ عىلىمىنىڭ ءرولى، قازىرگى زامانعى ءدىنتانۋلىق زەرتتەۋلەر: ءادىسناماسى، تاجىريبەسى جانە كەلەشەگى اتتى ءۇش سەكسيا اۋقىمىندا وتكىزىلدى.
جيىندى كىرىسپە ءسوز سويلەپ اشقان فيلوسوفيا، ساياساتتانۋ جانە ءدىنتانۋ ينستيتۋتىنىڭ ديرەكتورى اقان بيجانوۆ ونىڭ تىنىس-تىرشىلىگىمەن جان-جاقتى تانىستىرىپ، قازىرگى تاڭدا «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالىق ماقالالارى اياسىندا جۇزەگە اسىرىلىپ جاتقان ىرگەلى ىستەردى اتاپ ءوتتى. باسقوسۋ بارىسىندا قازاقستان رەسپۋبليكاسى ءبىلىم جانە عىلىم مينيسترلىگى عىلىم كوميتەتى ءتوراعاسىنىڭ ورىنباسارى اسقار جاركەنوۆ ق ر ءبىلىم جانە عىلىم ءمينيسترى ەرلان ساعادييەۆتىڭ قۇتتىقتاۋ حاتىن، ال الماتى قالاسى ىشكى ساياسات باسقارماسىنىڭ باسشىسى نۇرلان سىدىقوۆ الماتى قالاسىنىڭ اكىمى باۋىرجان بايبەكتىڭ جىلى لەبىزدەرگە تولى قۇتتىقتاۋ حاتىن ينستيتۋت باسشىسىنا تابىستادى. سونداي-اق، ق ر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ، اباي اتىنداعى پەداگوگيكالىق ۋنيۆەرسيتەءتىنىڭ رەكتورى تاكير بالىقبايەۆ جانە تاعى باسقالار ينستيتۋت ۇجىمىن قۇتتىقتاپ، ەگەمەن ەلىمىزدىڭ دامۋىنداعى ونىڭ قوسقان ۇلەسى ۇلكەن ەكەندىگىن اتاپ ءوتتى.
1958 جىلى وتاندىق عىلىم اكادەمياسىنىڭ قۇرامىندا قۇرىلعان فيلوسوفيا، ساياساتتانۋ جانە ءدىنتانۋ ينستيتۋتى سول كەزدە فيلوسوفيا جانە قۇقىق ينستيتۋتى بولىپ اتالعان جانە ديالەكتيكالىق لوگيكا، قۇقىقتانۋ جانە عىلىم ءادىسناماسى سالالارىندا ءىرى زەرتتەۋلەر جۇرگىزگەن. عىلىمنىڭ وسى سالالارىنداعى ەلەۋلى جەتىستىكتەردىڭ ارقاسىندا ينستيتۋت سسرو-دا جانە ودان تىس جەرلەردە كەڭىنەن تانىلدى. ينستيتۋتتىڭ جۇمىسى س.ز.زيمانوۆ، ج.م.ءابدىلدين، م.ت.بايماحانوۆ، ا.ن.نىسانبايەۆ ءتارىزدى اكادەميكتەردىڭ جانە تاعى باسقا الەۋمەتتىك-گۋمانيتارلىق ءبىلىم سالاسىنداعى كوپتەگەن بەلگىلى مامانداردىڭ ەسىمدەرىمەن تىعىز بايلانىستى بولدى. بۇگىنگى تاڭدا ينستيتۋت ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەندەي، قوعامدىق سانانىڭ جاڭا باعدارلارىن عىلىمي تۇرعىدا نەگىزدەۋدى وزىنە مىندەت ەتىپ قويادى.
