بۇگىن استانادا كەزەكتى قازاق ينتەرنەتىندە كونتەنت جاساۋشىلاردىڭ ءىىى فورۋمى باستالىپ كەتتى. ق ر اقپارات جانە كوممۋنيكاسيالار ءمينيسترى داۋرەن ابايەۆ ءسوز سويلەپ، شارانىڭ شىمىلدىعىن اشتى.

اقش-تىڭ قازاقستانداعى ۋاقىتشا سەنىمدى وكىلى تەودور لينگ فاكچەكينگ ماسەلەسىن قوزعاي وتىرىپ، بۇگىنگى كۇنگە بارشا جۋرناليستكە ساتتىلىك تىلەدى.

Qazaqstan كورپوراسياسىنىڭ باسقارما ءتوراعاسى ەرلان قارين ۇلتتىق ارنا ءموبيلدى قوسىمشاسىنىڭ جۇكتەۋشىلەردىڭ سانى 500000-عا جەتكەنىن جەتكىزدى.

مىنە، رەسمي ءبولىمنىڭ قىسقاشا كارتيناسى وسىنداي. ەكى مينۋت وتپەي جاتىپ، ءى سەسسيا ءوز جۇمىسىن باستاپ كەتتى.

"قازاق ينتەرنەتى دە نامىستان جارالعان"، - دەپ ءسوزىن باستاعان ساياساتتانۋشى ايدوس سارىمنىڭ ەلباسى نۇرسۇلتان ءابىش ۇلى نازاربايەۆ تۋرالى ءسوز قوزعاۋى ۇيقىلى-وياۋ وتىرعان ارىپتەستەرىمىزدىڭ ۇستىنەن سۋىق سۋ قۇيعانداي بولدى.

"سىن ايتقان سايت جابىلىپ قالاتىنى شىندىق قوي، سوسىن كەپ اسىرا ماقتايمىز بيلىكتى"، - دەپ قالدى سارىم. وسى تۇستا قازكونتەنتتىڭ سۋ جاڭا باسشىسى دۋمان قوجاحمەتوۆ وعان قارسى شىقتى. ءسوز دۋەلىندە اعاسى ىنىسىنەن باسىم ءتۇستى.

"قازاقپارات" حاا باس ديرەكتورى اسقار ۋماروۆ كەرىسىنشە، ەلباسىنىڭ " ۇلى دالانىڭ جەتى قىرى" ماقالاسىنىڭ جاقسى وقىلعانىنا ەرەكشە نازار اۋدارتتى. ال ايدوس سارىم بولسا، "اۋديتورياعا نە قاجەت ەكەنىن ءوزىمىز بىلمەيمىز" دەپ ماسەلە-سۇراقتى توتەسىنەن قويدى.

قازاق سايتتارىن اشقان ازاماتتار قازاق ينتەرنەتىنىڭ نامىستان جارالعانىنىڭ اقيقات ەكەنىن باسا ايتتى.. "Baribar.kz" سايتىنىڭ نەگىزىن قالاۋشى ەربول سەرىكباي بۇل پىكىرگە قوسىلا كەتتى. 2013 جىلى "Baribar" - نامىستان دۇنيەگە كەلگەن سايت ەكەندىگىن ايتقان سەرىكبولدىڭ ەربولى ءدال قازىرگى تاڭدا  سايتتىڭ  ەكىنشى تىنىسى  اشىلىپ، جارناما ارقىلى قاراجات تابا الاتىن سايتقا اينالعانىن اتاپ ءوتتى. فورۋم جۇمىسى قىزا ءتۇستى.

جازيرا بايدالى