بۇگىنگى تاڭدا قازاقستاندا دەنساۋلىق ساقتاۋ سالاسىنداعى كەدەرگىلەر مەن ماسەلەلەردى جويۋ ماقساتىندا قۇجات اينالىمدارىن ەلەكتروندى فورماتقا كوشىرۋ جۇمىستارى جۇرگىزىلۋدە. ويتكەنى، قاعازباستىلىقتان ارىلۋ – دارىگەرلەر مەن پاسيەنتتەردىڭ ۋاقىتىن ۇنەمدەپ، ءبىرقاتار ەكونوميكالىق تيىمدىلىكتەر بەرەدى. وسىعان وراي، 2019 جىلدىڭ 1ء-شى قاڭتارىنان باستاپ بۇكىل قازاقستاننىڭ مەديسيناسى ەلەكتروندى فورماتقا كوشىرىلەدى.
قازىرگى كورسەتكىشتەرگە سۇيەنسەك، ەلىمىزدىڭ 8 ايماعىنداعى ەمحانالاردا قاعازسىزداندىرۋ جۇمىستارى اتقارىلۋدا. وسى جونىندە ارنايى پيلوتتىق جوبا دا بار. سول وڭىرلەردىڭ قاتارىنا ماڭعىستاۋ وبلىسى دا كىرىپ وتىر. ايماقتا ەلەكتروندى دەنساۋلىق ساقتاۋ پاسپورتىنا كوشىرۋ شارالارى قارقىندى جۇرگىزىلۋدە. جەرگىلىكتى تۇرعىنداردىڭ 94 پايىزى مەديسينالىق تولقۇجاتپەن قامتىلعان.
اتالعان ناتيجەگە قول جەتكىزۋ ءۇشىن مەديسينالىق ورتالىقتاردىڭ ماماندارى تەر توگۋگە ءماجبۇر بولدى. الدىمەن ايماق تۇرعىندارى تۋرالى اقپاراتتاردى قولعا ءتۇسىرىپ، ارتىنشا دەنساۋلىق ساقتاۋ ورتالىعىنا كەلگەن ادامداردىڭ مالىمەتتەرىن بازاعا تۇسىرگەن. بۇل جۇيەنىڭ ەرەكشەلىگى سول دارىگەرلەر بۇرىڭعىداي ءار ەمدەلۋشىدەن سىرقاتناماسىن سۇراپ اۋرە بولمايدى. نەگە دەسەڭىز، پاسيەنت تۋرالى بارلىق مالىمەت بازادا ساقتاۋلى تۇرادى. ول ءۇشىن اق حالاتتىلار ناۋقاستىڭ جەكە كۋالىگىندەگى شتريح-كودىن سكانەر ارقىلى نەمەسە كارتريدەر ارقىلى كومپيۋتەرگە وقىتۋ قاجەت. وسىلايشا، ەمدەلۋشىنىڭ دەنساۋلىعى بويىنشا اقپاراتىنا قول جەتكىزەدى.
ەلەكتروندى دەنساۋلىق پاسپورتىنىڭ باستى پايداسى – بۇل دارىگەرلەردىڭ ناۋقاستىڭ سىرقاتناماسىمەن جىلدام تانىسۋى جانە ونىڭ ارقاسىندا كەنەتتەن كەلگەن ناۋقاسقا دۇرىس ەم جۇرگىزە الۋىندا. بۇل مەديسينالىق قاتەلىكتەرگە جول بەرمەيدى. سونداي-اق، اۋرۋىن جاسىراتىن ادامدار دا ەندى ونداي قادامعا بارا المايدى. سەبەبى، بارلىق دۇرىس دەرەك قوردا تۇرادى. ايتا كەتەتىنى، بۇرىڭعى ءتاسىل ەكى تاراپتىڭ دا كوپ ۋاقىتىن الاتىن (دەرتىن سۇراۋ، ونى قاعازعا ءتۇسىرۋ). ال قازىرگى ءتاسىل بىردەن ەم جۇرگىزۋگە مۇمكىندىك بەرىپ وتىر.
ماڭعىستاۋ وبلىسىندا مەديسينالىق قىزمەتتى ەلەكتروندى نۇسقادا الۋعا بايلانىستى ءموبيلدى قوسىمشا جۇمىس ىستەۋدە. بۇل باعدارلاما مىناداي قىزمەتتەردى ۇسىنادى: قابىلداۋعا جازىلۋ، دارىگەردى ۇيگە شاقىرۋ، ەڭبەككە جارامسىزدىق پاراعىن تولتىرۋ، جازىلعان دارى-دارمەكتەردىڭ رەسەپتەرىن كورۋ، زەرتحانالىق ناتەجيلەرىن كورۋگە جانە قيىڭ جاعدايدا قاۋىپ-قاتەر باتىرماسىن باسا الادى.
وڭىردەگى ابزال جانداردىڭ ايتۋىنشا، ءموبيلدى قوسىمشا ارقىلى ناۋقاستىڭ مەكەنجايىن بىلۋگە بولادى. بۇل اسىرەسە ءحال ۇستىندە جاتقان ادامعا جەدەل جاردەم كولىگىنىڭ تەزىرەك بارۋىنا ىقپال ەتەدى. ناتيجەسىندە ناۋقاس ۋاقتىلى مەديسينالىق كومەك الا الادى. بۇعان قوسا، كەز كەلگەن ناۋقاستىڭ قاي ەمحانادا ەمدەلىپ جاتقاندىعى انىق جازىلىپ تۇرادى.
مۇنداي يگىلىكتى ىستەردىڭ بارلىعى «سيفرلىق قازاقستان» مەملەكەتتىك باعدارلاماسىنىڭ اياسىندا ورىندالىپ وتىر. باعدارلاما 2017 جىلدىڭ 12ء-شى جەلتوقسانىندا قابىلدانعان بولاتىن. جالپى ايتقاندا، قازاقستاننىڭ مەملەكەتتىك ساياساتىنداعى باستى باعىتتاردىڭ ءبىرى – ۇلت ساۋلىعىن جاقسارتۋ، ءولىم-جىتىم كورسەتكىشتەرىن تومەندەتۋ. ءارى حالىققا كورسەتىلەتىن قىزمەت ساپاسىن كۇن وتكەن سايىن جاقسارتۋ. وسى تۇرعىدان ەلەۋلى وزگەرىستەر جاسالىپ، زاماناۋي تەحنولوگيالار جوعارى دەڭگەيدە ەنگىزىلىپ جاتىر.
