اقتوبە وبلىسىنىڭ ۇزدىك اۋىل ەڭبەككەرلەرىنە سىياقىلار مەن اۆتوكولىكتەر تابىستالدى.
اقتوبەدە اۋىل شارۋاشىلىعى كۇنىنە وراي جارمەڭكە وتكىزىلىپ، ءبىر ليتر ءسۇتتىڭ باعاسى 200 تەڭگە ءبىر كەلى ەت 1250 تەڭگە، كارتوپ 60 تەڭگە بولدى.
ءبىر عانا مارتوك اۋدانىنىڭ اۋىل شارۋاشىلىعىن وندىرۋشىلەرى وبلىس ورتالىعىنا ءبىر سەنتنەردەن استام سيىر جانە جىلقى ەتىن، 100 كەلى قوي مەن شوشقا ەتىن، 300 كەلىدەن استام ءسۇت ونىمدەرىن اكەلدى.
وبلىستىق اۋىل شارۋاشىلىعى باسقارماسىنىڭ باسشىسى قۇسايىن سارسەمبايەۆ بيىل اۋىل حالقىنىڭ ەڭبەك ونىمدىلىگى ءبىر جۇمىسشىعا 48%-عا (وتكەن جىلمەن سالىستىرعاندا 705 مىڭ تەڭگەدەن 1،2 ملن تەڭگە دەيىن) وسكەنىن، اسىل تۇقىمدى مال باسى 51%-عا (28 مىڭ باستان 42 300 باسقا دەيىن) ارتقانىن ايتتى.
قۇسايىن سارسەمبايەۆ:
* ەگىستىكتىڭ 15%-عا، 754 100 گەكتارعا دەيىن، سۋارمالى جەرلەردىڭ 41%-عا، 30 600 گەكتارعا دەيىن ءوسۋى، يننوۆاسيالىق جوبالار مەن وڭدەۋ ءوندىرىسىن ەنگىزۋ ءوڭىردىڭ ازىق-تۇلىك قاۋىپسىزدىگىن كۇشەيتۋگە مۇمكىندىك بەرەدى. ءداستۇرلى ەمەس اۋىل شارۋاشىلىعى بەلسەندى دامىپ كەلەدى. قازىرگى تاڭدا ارا، قويان، بالىق، بودەنە وسىرەتىن 600-دەن اسا شارۋاشىلىق بار. جاڭا ەگىننىڭ استىعى ورتاشا العاندا 12 سەنتنەردەن 17 سەنتنەرگە دەيىن جينالدى، قوي شارۋاشىلىعى بەلسەندى دامىپ جاتىر. اۋىل شارۋاشىلىعى ەڭبەككەرلەرى الدا كەلەدى جانە ءارقاشان ەل پرەزيدەنتىنىڭ ساياساتىن بەلسەندى تۇردە قولدايدى،- دەپ اتاپ ءوتتى.
بۇدان باسقا، اتالمىش سالا ەڭبەككەرلەرىن ماراپاتتاۋ سالتاناتى ءوتتى. بورانياز ەرىشوۆ («قازسۋشار» رمك اف باس مامانى)، نادەجدا نۇرجانوۆا ( «ايبەك» اكك) مەن ءقادىر قيباشيەۆ (قارعالى اۋدانى) «ەڭبەك ارداگەرى» مەدالىمەن، 18 اۋىل تۇرعىنى اۋىل شارۋاشىلىعى مينيسترلىگىنىڭ گراموتالارىمەن، 62 قىزمەتكەر وبلىس اكىمىنىڭ العىس حاتتارىمەن ماراپاتتالدى. ماراپاتتالعانداردىڭ قاتارىندا «كازاحستانسكايا پراۆدا» گازەتىنىڭ ءتىلشىسى جۇبانىش بايگۋرينوۆ تە بار. شوپاندار، جىلقى، تۇيە باقتاشىلارى دا باعالى سىيلىقتارعا يە بولدى. مال دارىگەرلەرىنە، مالشىلارعا، اۋىل شارۋاشىلعى قۇرىلىمدارىنىڭ مەحانيزاتورلارىنا، بريگاديرلەرىنە جاڭا اۆتوكولىكتەردىڭ كىلتتەرى تارتۋ ەتىلدى. سىياقى العانداردىڭ ىشىندە ايتەكە بي اۋدانىنداعى «كومسومول» جشس-دە 26 جىل ەڭبەك ەتىپ كەلە جاتقان تراكتورشى سەرجان بيماعامبەتوۆ تە بار.
- مەن كومسومول اۋىلىندا ءتۋىپ-وستىم جانە ءالى كۇنگە دەيىن وسىندا تۇرامىن. جۇمىس بار، ايلىعى دا جاقسى، ءبىراق وسىنداي سىيلىق العانىما ەرەكشە قۋانىشتىمىن، ءبىر جاعىنان بۇل مەنىڭ ءبىرىنشى سىيلىعىم،-دەيدى سەرجان بيماعامبەتوۆ.
