الماتىدا تەمىرجول بويىمەن ەستاكادا ارقىلى نازاربايەۆ داڭعىلىن جانسۇگىروۆ كوشەسىنە دەيىن ۇڭگىلەۋ جۇمىستارى اياقتالدى. جۇمىس ساپارى بارىسىندا الماتى اكىمى باۋىرجان بايبەك «سولتۇستىك-وڭتۇستىك» باعىتى بويىنشا سەيفۋللين داڭعىلىنىڭ جۇكتەمەسىن ازايتاتىن جاڭا جول ايرىعىن كوردى.

تەحنيكالىق جاعىنان كۇردەلى جوبانىڭ جالپى قۇنى 7،4 ملرد. تەڭگە، ول ەكى جىل بويىنا سالىندى، قۇرىلىس كەزىندە 500-دەن استام جاڭا جۇمىس ورنى قۇرىلدى. ۇڭگىلەۋدىڭ وتكىزۋ قابىلەتى تاۋلىگىنە 48 مىڭ كولىك.

تىرەك قوندىرعىلارى مەن قابىرعالارى مەن ەستاكادا قۇرىلىستارى ءۇشىن 7 مىڭ تەكشە مەتر بەتون جانە 4 مىڭ توننادان استام مەتاللوكونسترۋكسيا پايدالانىلدى.

قالا اكىمى باۋىرجان بايبەك جاياۋ جۇرگىنشى ينفراقۇرىلىمىن قۇرۋ جانە قوعامدىق كولىكتى دامىتۋمەن قاتار قالادا اۆتوموبيليستەردىڭ جاعدايىن جاقسارتۋ دا قولعا الىنعانىن ايتتى. جول ايرىقتارى سالىنۋدا، جولدار جوندەلۋدە، ءبىرجاقتى قوزعالىس ەنگىزىلۋدە، ادامداردىڭ ەكپىنى ارتىپ، بيزنەستىڭ لوگيستيكالىق شىعىنى تومەندەۋدە.

جۇمىس ساپارى كەزىندە مەگاپوليس باسشىسى قالانىڭ دامۋىنا ۇلەس قوسقان جۇمىسشىلارعا ەرەن ەڭبەكتەرى ءۇشىن العىس ايتتى.

«پرەزيدەنتىمىزدىڭ ساياساتى ارقاسىندا الماتى تۇراقتى دامۋدا، ەكونوميكالىق جاعىنان وسۋدە. سوڭعى ون جىل ىشىندە 30 جول ايرىعى اشىلدى، جاڭا ۇيلەر سالىنۋدا، قالانىڭ تاريحي ورتالىعى جاڭارۋدا، بيزنەس وركەن جايۋدا. مىنە، مۇندا سىزدەردىڭ ۇلەستەرىڭىز ايتارلىقتاي، اتقارىلعان ىستەردىڭ بارلىعى جۇمىسشىلار ەڭبەگىنىڭ ناتيجەسى. جاڭا جول ايرىعى تۇڭعىش پرەزيدەنت كۇنى قارساڭىندا قالا تۇرعىندارىنا جاسالعان ۇلكەن سىيلىق»، - دەدى باۋىرجان بايبەك.

ايتا كەتەرلىگى، ۇزىندىعى 800 مەتر بولاتىن ەستاكادامەن كولىك قوزعالىسى بۇگىننەن باستالدى. قوزعالىس بولىگىنىڭ ەكى جاعىندا تروتۋارلار بار، ەنەرگيا جيناقتاۋشى شامدارى بار جارىق باعانالارى ورناتىلعان. شىعۋ ساتىلارىن جانە اينالانى اباتتاندىرۋ جۇمىستارى جالعاسۋدا.