الماتىدا تۇڭعىش پرەزيدەنت كۇنىنىڭ قارساڭىندا كوپفۋنكسيونالدى «جارىس ارەنا» سپورت كەشەنى اشىلدى. جوبا دەمەۋشىلەر قارجىسى ەسەبىنەن جۇزەگە استى، كەشەن وربيتا-3 ىقشام اۋدانىنداعى №40 جالپى ءبىلىم بەرەتىن مەكتەپ اۋماعىنا ورنالاسقان.

مەملەكەت باسشىسى قازاقستان حالقىنا جولداۋىندا بۇقارالىق سپورتتى دامىتۋعا جانە كەم دەگەندە 100 دەنەشىنىقتىرۋ-ساۋىقتىرۋ كەشەندەرىن سالۋ قاجەتتىگىنە نازار اۋدارعان ەدى.

ەل پرەزيدەنتى قويعان مىندەتتەردى ورىنداۋ ماقساتىندا الماتىدا قالانىڭ ينفراقۇرىلىمىن مودەرنيزاسيالاۋ، سپورت ورتالىقتارى مەن الاڭدارىن رەكونسترۋكسيالاۋ جانە اشۋ جۇمىستارى بەلسەندى تۇردە جۇرۋدە. وسى رەتتە مەملەكەتتىك-جەكە ارىپتەستىك اياسىندا ىسكە اساتىن جوبالارعا ايرىقشا ءمان بەرىلۋدە. ءوز كەزەگىندە كوپفۋنكسيونالدى «جارىس ارەنا» سپورت كەشەنى مەملەكەت باسشىسى جولداۋىن جۇزەگە اسىرۋ اياسىنداعى العاشقى وبەكت بولىپ تابىلادى.

«ءبىزدىڭ پرەزيدەنتىمىز نۇرسۇلتان نازاربايەۆ بۇقارالىق سپورتتى جانە ەلىمىزدىڭ سپورتتىق ينفراقۇرىلىمىن دامىتۋعا تۇراقتى نازار اۋدارۋدا. وزدەرىڭىز كورگەندەي، جەكە سەكتور مەملەكەتتىڭ قولداۋى بارىسىندا ۇلكەن جۇمىستاردى اتقارۋدا، سونىڭ ارقاسىندا ءبىزدىڭ بالالارىمىز سپورتپەن شۇعىلدانىپ، سالاۋاتتى ءومىر سالتىن قالىپتاستىرۋدا تاماشا مۇمكىندىكتەرگە قول جەتكىزىپ وتىر. ۋاقىتتان تىس كەزدەرى مۇندا جاقىن ورنالاسقان اۋداندار تۇرعىندارى دا سپورتپەن اينالىسا الادى»، - دەپ اتاپ ءوتتى الماتى اكىمى باۋىرجان بايبەك.