كونكۋرستا ۆەنەسۋەلالىق فوتوگراف رونالدو شەميدتىڭ كاراكاستاعى ۆەنەسۋەلا پرەزيدەنتى نيكولاس مادۋروعا قارسى شەرۋلەردەن تۇسىرگەن سۋرەتتەرى ەڭ ۇزدىك دەپ تانىلعان.
قالعان جۇلدە العان اۆتورلاردىڭ سۋرەتتەرى ءتۇرلى كاتەگوريا - ونەر مەن ويىن-ساۋىقتان باستاپ تابيعات كورىنىستەرىنە دەيىنگى تاقىرىپتاردى قامتيدى. بيىل قازىلار 125 ەلدەن تۇسكەن 73 مىڭنان استام سۋرەت اراسىنان ءتورت جارىم مىڭعا تارتا سۋرەتتى ىرىكتەپ العان.
الماتىداعى World Press Photo-2018 كورمەسى 10 جەلتوقساندا اتاپ وتىلەتىن حالىقارالىق ادام قۇقىعى كۇنىنە وراي ۇيىمداستىرىلىپ وتىر.
كورمە الماتىدا 13 جەلتوقسانعا دەيىن بولىپ، سوسىن شىمكەنتتە وتەدى. كورمە بۇعان دەيىن استانا مەن قاراعاندىدا بولعان.
World Press Photo كونكۋرسى العاش رەت 1955 جىلى ۇيىمداستىرىلعان. جىل سايىن وتەتىن كونكۋرسقا ءار جىلدارى، ونىڭ ىشىندە سوۆەت وداعى كەزىندە قازاقستاننان دا فوتوگرافتار قاتىسقان.
پىكىر قالدىرۋ