20 قاراشا كۇنى الماتى اكىمدىگى  «ميزام» بازارىمەن جالعا بەرۋ شارتىن ۇزگەندىگى جايلى باسپا ءسوز مالىمدەمەسىن تاراتقان بولاتىن. مالىمدەمەدە ونىڭ ءبىر سەبەبى رەتىندە «ميزام – مادەنيەتسىز بازار» دەپ كورسەتىلگەن. بازارعا تەكسەرۋلەر جۇرگىزىلىپ، ونىڭ ارتىنان ايىپپۇل سالىندى. ساۋدا كەشەنىنىڭ قوجايىنى ءوزىن قورعاۋعا ءماجبۇر. بازاردىڭ قوجايىنى - كاسىپكەر دوسمۇقان كەرىمبايەۆ بۇل شەشىممەن كەلىسپەيدى. جۇمىس ورىندارىن قۇرىپ، سالىق تولەپ، بۇكىل قاۋىپسىزدىك تالاپتارىن ساقتاپ وتىرعان ول الماتى اكىمدىگىندە نەلىكتەن «ميزام» ساۋدا ورتالىعىنىڭ جۇمىسىنا نارازىلىق تۋىنداپ وتىرعانىن تۇسىنبەيدى.

د. كەرىمبايەۆ: «ءبىز بۇل جاعدايدىڭ نەلىكتەن تۋىنداعانىن ءوزىمىز تۇسىنبەي وتىرمىز. باسىنان باستاپ بۇل جوبانى الماتى اكىمى قولدادى. باۋىرجان بايبەك كوتەرمە-ۇلەستىرۋ ورتالىعى ءبىرىنشى كەزەگىنىڭ اشىلۋىندا بولدى. ول ءبىزدىڭ تۇجىرىمدامامەن تانىس، بۇل جوبانىڭ دامۋىن ماقۇلداپ وتىر. بۇل جەردەگى شيەلەنىس اكىم ورىنباسارى، باسقارما باسشىلارى سىندى مەملەكەتتىك ورگاندار تاراپىنان تۋىنداپ وتىرعان بولۋ كەرەك. ولار ءارتۇرلى تەكسەرۋلەرگە جول بەرىپ وتىر دەپ ويلايمىن. الماتى قالاسىنىڭ تەكسەرۋشى ورگاندارى تاراپىنان بىزگە بۇلاي «ءجىتى كوڭىل ءبولىنىپ وتىرعاندىعى» قانشالىقتى زاڭدى دەگەن سۇراقتى قويعىم كەلەدى». 

باسپا ءسوز ءماجىلىسىن «ميزام» كوتەرمە-بولشەك ورتالىعىنىڭ قوجايىندارى، ۇلتتىق كاسىپكەرلەر پالاتاسىنىڭ وكىلدەرى، زاڭگەرلەر ۇيىمداستىرىپ وتىر.

ماقساتى – كاسىپكەرلەردى قولداۋعا ارنالعان مەملەكەتتىك باعدارلامالار نەلىكتەن جۇمىس جاساماي وتىرعاندىعىن كەڭ جۇرتشىلىقتىڭ جانە ەل باسشىلىعىنىڭ نازارىنا جەتكىزۋ، جوسپاردان تىس تەكسەرۋلەر قالاي وتكىزىلەتىندىگى جانە شەنەۋنىكتەر مەن الماتىنىڭ اتقارۋشى بيلىگى مەگاپوليستە ءوز بيزنەسىن دامىتۋ ءۇشىن قارجى سالىپ وتىرعان كاسىپكەرلەردىڭ اياعىنان قالاي شالىپ وتىرعاندىعى جايلى اڭگىمەلەۋ. ال كاسىپكەرلىكتى دامىتۋعا باعىتتالىپ وتىرعان بۇل قارجى مىڭداعان قازاقستاندىقتارعا ءوزىنىڭ الەۋمەتتىك-ەكونوميكالىق جاعدايىن جاقسارتۋعا مۇمكىندىك بەرىپ وتىرعانى بەلگىلى.

باسپا ءسوز ءماجىلىسىنىڭ قاتىسۋشىلارى زاڭ جۇزىندە وسى جاعدايدى ءتۇسىندىرىپ بەرۋى ءۇشىن ەلباسىنا، سونداي-اق، جوعارعى قاداعالاۋشى ورگان – ق ر باس پروكۋراتۋراسىنا جانە ۇلتتىق كاسىپكەرلەر پالاتاسىنا سۇراۋ سالىپ وتىر.

باسپا ءسوز ءماجىلىسىنىڭ قاتىسۋشىلارى:

دوسمۇقان سۇلتانبەك ۇلى كەرىمبايەۆ - «ميزام» كوتەرمە-بولشەك بازارىنىڭ قۇرىلتايشىسى؛

بولات ەگىمباي ۇلى قوجاقوۆ - «ميزام» كوتەرمە-بولشەك بازارىنىڭ باسقارۋشى ديرەكتورى؛

اسقار قايماقوۆ – تاۋەلسىز زاڭگەر؛

نۇرسادىق قالي ۇلى ابىشيەۆ – قازاقستان ساۋدا وكىلدەرى قاۋىمداستىعىنىڭ پرەزيدەنتى.