10 جىل ىشىندە شاھارىمىزعا 22،2 ملرد دوللار ينۆەستيسيا تارتىلدى. بيىلعى جىلى ينۆەستيسيا كولەمى 25%، سونىڭ ىشىندە شەتەلدىك ينۆەستيسيالار 24% ارتتى. بۇل تۋرالى الماتى قالاسىنىڭ اكىمى باۋىرجان بايبەك «Almaty Invest» حالىقارالىق فورۋمىندا ايتتى.

وسىمەن 6 رەت وتكىزىلىپ وتىرعان بۇل فورۋمعا ەلىمىزدەن جانە شەتەلدەن مىڭنان اسا دەلەگات قاتىسۋدا. جيىننىڭ اشىلۋى بارىسىندا ءسوز سويلەگەن باۋىرجان بايبەك، الماتى قالاسىنىڭ بيزنەس جاساۋعا وتە ىڭعايلى ەكەندىگىن ايتا كەلە، شاھاردىڭ مۇمكىندىكتەرىنە توقتالىپ ءوتتى.

«الماتى ەكونوميكاسى 35 ملرد دوللاردى قۇرايتىن ورتالىق ازياداعى ەڭ دامىعان مەگاپوليستەردىڭ ءبىرى. قالاداعى الپى وڭىرلىك ءونىم جان باسىنا شاققاندا 20 مىڭ دوللاردى قۇرايدى. قالامىزعا حالىقارالىق كومپانيالار ينۆەستيسيانى بەلسەندى قۇيۋدا. ەلباسىنىڭ سارابدال ساياساتىنىڭ ارقاسىندا تاۋەلسىزدىك جىلدارىندا مەگاپوليس ەكونوميكاسى 100 ەسەگە، حالىق تابىسى 20 ەسەگە ارتتى. بۇگىنگى كۇنى قالا ەكونوميكاسىنىڭ 86% ساۋدا جانە قىزمەت كورسەتۋ قۇرايدى. شاعىن جانە ورتا بيزنەستىڭ ۇلەسى 40%، ياعني الماتىدا مۇنايدان تاۋەلسىز تۇراقتى ەكونوميكا قالىپتاسقان»، – دەدى شاھار اكىمى.

سونداي-اق ول، وسىعان دەيىنگى فورۋمدار اياسىندا جالپى سوماسى 1 ملرد دوللاردى قۇرايتىن 40-تان استام مەموراندۋمعا قول قويىلعانىن جانە قازىرگە دەيىن جالپى قۇنى 400 ملن قۇرايتىن 12 جوبا ىسكە اسىپ جاتقانىن ايتىپ ءوتتى.

«الماتى مىڭ جىلدىق تاريحى بار شاھار. ۇلى جىبەك جولى بويىنداعى ەڭ ءىرى نارىق. الماتى ءومىر ءسۇرۋ مەن بيزنەس جۇرگىزۋگە قولايلى قالا. بۇگىننىڭ وزىندە قالا ەكونوميكاسىنداعى مەملەكەتتىك ۇلەسى 2،4%. مۇندا ەلىمىزدەگى ءىرى سالىق تولەۋشى كومپانيالاردىڭ ۇشتەن ءبىرى ورنالاسقان، 30-دان استام ترانس ۇلتتىق كومپانيا، بىرلەسكەن كاسىپورىنداردىڭ 43% جانە ءىرى حالىقارالىق ۇيىمدار بار»، – دەدى باۋىرجان بايبەك.