الماتىنىڭ بالاباقشالارىندا روبوتوتەحنيكا ۇيىرمەلەرى جۇمىسىن باستاماق. وسىلايشا، جەتكىنشەكتەردى عىلىمعا ەرتە جاستان تاربيلەۋ كوزدەلىپ وتىر.

سونداي-اق، قالاداعى مەكتەپكە دەيىنگى مەكەمەلەردە جاڭا تەحنولوگيالار كەڭىنەن ەنگىزىلگەن. ونىڭ ىشىندە اسىق، قۇم جانە تاس تەراپياسى سىندى جاڭا ادىستەر بار.

بۇگىنگى تاڭدا الماتىدا 773 بوبەكجاي جۇمىس ىستەيدى. بۇگىن بالاباقشا جەتەكشىلەرى سول ادىس-تاسىلدەرمەن جان-جاقتى تانىسۋعا مۇمكىندىك الدى.  

«قۇم تەراپياسى بالالاردىڭ شىعارماشىلىعىن كەڭەيتەدى. بالانىڭ بويىنداعى ويلاۋ قابىلەتىن، تانىمدىق قابىلەتىن جان-جاقتى دامىتادى. ەڭ ءبىرىنشى، بالانى تىنىمسىزدىققا، تىنىش وتىرۋعا، ۇقىپتىلىققا ۇيرەتەدى. سونىمەن قاتار، شىعارماشىلىق ويلاۋ، قيالداۋ قابىلەتى ارتا تۇسەدى. بالا نە جاسايمىن دەسە دە، ەڭ باستىسى، قۇم تەراپياسىن ويناۋدى بىلسە، ارى قاراي ءوزىنىڭ تانىمدىق قابىلەتتەرىن ارتتىرا بەرەتىن بولادى»، – دەيدى الماتى قالاسى №69 بوبەكجاي-بالاباقشا مەڭگەرۋشىسى ايىم ناۋرىزبايەۆا.

«قازاقستان بويىنشا مەكتەپكە دەيىنگى ءبىلىم بەرۋ مەكەمەلەرى 2 جىلدان بەرى جاڭا ستاندارتپەن جۇمىس ىستەپ جاتقانىن بىلەسىزدەر. جاڭا ستاندارتقا كوشەر الدىندا الماتى قالاسىنىڭ 6 بالاباقشاسى ءبىلىم مينيسترلگىنىڭ ەكسپەريمەنتتىك بازاسى بولعان. ول جەردە 6 جاڭا يننوۆاسيانى جۇرگىزىپ، سونىڭ ناتيجەسىندە 6 مەتوديكالىق كىتاپ شىقتى. ول ادىستەمەلىك كىتاپتاردى ءقازىر قازاقستاننىڭ بارلىق مەكتەپكە دەيىنگى مەكەمەلەرى قولدانىپ وتىر»، – دەدى الماتى قالاسى ءبىلىم باسقارماسى مەكتەپكە دەيىنگى ءبولىمىنىڭ باسشىسى ءاليا ساعييەۆا.